Saturday, August 21, 2010

باقي بوست ...البحر غضبان مابيضحكش

أبدا منين منين ؟؟
خليني أبدا من الاول .....انا مش بقلد غادة هنا و لا بعيد قصص جواز فاشلة ...و لا هتريق علي حد زي ما ضحكت ناس قبل كده علي المصايب اللي حصلت لي
انا مابقيتشي بضحك
خلاص الضحك خلص
عايزة برده تسمعوا الاغنية مع البوست ده
الحكاية انا من قترة قرر حد من اصدقائي المقربين ليا انه يجوزني ...الشخص صديق عارف كويس انا ايه و اخلاقي ايه و دماغي ايه
قالي انا عندي فلان ..بجد ده اللي انت عايزه ترتبطي بيه ...و سيبك بقي من حوار الصلونات و كده و المعارف و الستات القرشانات ...كفاية بقي انت اتبهدلتي كتير ..هو ده و اسمعي كلامي

كنت متردده جدا ...لاني تعبت ...خلاص تعبت ..مفيش امل جوايا خلاص
لكن سبحان الله اللي بيكون عنده مرض خطير و خلاص بيخلص ...لما بيسمع ان في وصفة و لو في بلاد الواك واك هتشفيه ...و لو حتي كانت وصفة بلدي ولبخة علي صدرة و حجاب يعدي فوقه سبع مرات ...بيروح برده يجري ورا العلاج

و انا ايام كتير جريت ...مجاتشي علي دي بس المره دي قاعده ومقابله غير العشريين اللي قبل كده ...ده حد جاي عن طريق صديق للطرفيين ...و قاعده شباب ...انا و صديقي و خطبته و العريس
شفته و شافني و كلمني و كلمته
عايزة بقي تسمعوا الحوار

هو :انت ...انت ...انت عبارة عن ألماظاية ...انت مافيش زيك اصلا
انا : معلش انا محرجة و مش عارفه اتكلم اصل انا اول مره اتحط في موقف زي ده و تكون ماما مش معايا
هو : يا بنتي ده لو كل البنات بتفكر زيك كده كانت مشكلة الجواز اتحلت
أنا : هو انت كنت فيين النهارده
هو : باخد كورس في المعهد البريطاني ...انا كمان عايزك تعملي كده عشان ان شاء الله ان شاء الله لو بقيتي نصيبي ..و لما نقدم للهجرة و نعمل الامتحان نبقي مستعدين

و بعد كام يوم رغي في التليفون
انا :ها بقي انت كلمت مامتك ...انا بحب الاهل يبقوا عارفيين كل حاجة
هو : و الله لسه اصل ماما ست كبيرة و بتزن كتير و انا بحب الموضوع ده افكر فيه بدون ضغط
انا : لا بقي ...لا بقي ...لا بقي انت مش جاد
هو :ايييييييييييييييييييييه ...مش جاد مش جاد ازاي ...انتي ازاي بتقولي كده أزاي أزاي أزاي

و طبعا خلع
و خلع بدون سبب ...بس اللي حسيت بيه انه حاسس اني مش روشه و كوول و مش بت كده جامده و لافه و دايرة و مربع كمان ...خام ..هبله و مش مدردحه كده


معداش كتير شهر تقريبا

و جالي واحد تاني من صديقه ...رحت و اتقبلنا في الشغل ...حد غاية في الاخلاق ...
قرر البيه التاني المحترم انه يكلمني بعد ما قعد معايا ربع ساعه ...و ده عشان نحدد ميعاد نتقابل فيه الامهات مع بعض و كده بقي انتم فاهميين
يوم ما كلمني في التليفون كان بيقولي حضرتك حضرتك حضرتك ...الرجل محترم و فعلا باين عليه الاحترام
و في وسط الكلام حبيت اعرف منه بعض التفاصيل عشان لما اقول للبيت

انا : هو انت ارتبطت قبل كده
هو : اه ...و قبل ما اتجوز ب 15 يوم جالي البوكس و اخدني ...امن دولة ....خدوني غلط اشتباه
( أنا جالي صرع طبعا ...بس و الله وارد في بلدنا المصونة ان أمن الدولة يجي لمجرد الاشتباه فيك و يخدك المعتقل و يعمل خرم في حياتك الي يوم الدين ...عادي اوي )
أنا : ليه كده ...ليه ...ليه يا بابا كده ليه ؟؟؟
هو : من فضلك .....من فضلك ...نتكلم باحتشام مع بعض ...
انا : نعم!!!
نعم!!!
أحتشااااااااااااااااام
ازاي حضرتك يعني؟؟
هوانا مش محتشمة؟؟

هو : لا بس ايه يا بابا دي؟ ....انا عارف انها عفوية منك ...لكن ارجوكي لازم يكون في حدود في الفترة دي

و الله العظيم كنت هقوله ملعون ابو خاشك
بس مرضتشي عشان الوسطه حبيبتي .....كنت هقفل السكة بس مسكت نفسي و هزقته بالراحة
و بعد ساعه من محاضرة عصماء عن الشيخ الغزالي و التابعيين

البيه عايز واحده تقعد في البيت و تلبس لبس محتشم برده ...و يكون عملها ما بين البيت و الاستزاده في الدين (فقط)

انا مش هعلق علي البوست ده ...و لا هحلل اللي حصل انا هسيبكم شوية و اسمع رايكم ...و ما تنسوش انا بطلت ضحك خلاص
معلومه
الاتنين مهندسيين ...الاتنين عندهم 30 سنة الاتنين ولاد ناس جدا ...الاتنين معهم حالتهم المادية كويسه ...الاتنين شكلهم مقبول
حد يقولي انا لسه في مصر و لا في حته تانية عشان انا تعبت


Wednesday, August 18, 2010

البحر غضبان مابيضحكش



video

عايزة اللي يقرا الكلام ده يسمع الاغنية معه ....البوست ده مش ههرج فيه زي الاول و لا حضحك و اتريق ...خلاص ماعدشي فيه قدرة علي المرور فوق المواقف بالضحك و السخرية

مشكلتي لسه زي ما هي ...انا مع ميين انا مع اهل الخطوة و الحاضرة و السنة و التدين و الالتزام و لا مع أهل الكافيهات و الفيس بوك و الفريندز و الكوول و الجونة و السفر عشان اجيب شوبينج

مش هعمل زي غادة عبد العال و أقول انا عايزة اتجوز و ابدا اتضحك زي زمان ...مش قادرة...خلاص (البحر غضبان مابيضحكش أصل الحكاية ماتضحكش

خلاص مش قادرة اضحك

هبقي احكي في البوست اللي جاي كل اللي حصل

و دي كلمات الاغنية اسمعوها كويس

اسمعوها من الشيخ امام ...الكلمات نجيب سرور
البحر بيضحك ليه
وانا نازله ادلع املا القلل

البحر غضبان ما بيضحكش
أصل الحكاية ما تضحكش
البحر جرحه ما بيدبلش
وجرحنا ولا عمره دبل
والبحر بيضحك ليه
وانا نازله ادلع املا القلل

مساكين بنضحك من البلوة
زي الديوك و الروح حلوة
سارقاها من السكين حموة
و لسة جوا القلب أمل
والبحر بيضحك ليه
وانا نازله ادلع املا القلل

قللنا فخارها إناوي
بتقول حكاوي و غناوي
يا قلة الذل أنا ناوي
ما شرب و لو في المية عسل

والبحر بيضحك ليه
وانا نازله ادلع املا القلل

ياما ملينا وملينا
لغيرنا وعطشنا ساقينا
صابرين وبحر ما يروينا
شايلين بدال العلة علل
والبحر بيضحك ليه
وانا نازله ادلع املا القلل

في بالي ياما وعلى بالي
واللي بيعشق ما يبالي
ما يهمنيش من عزالي
يا حلوة لو مرسالي وصل
والبحر بيضحك ليه
وانا نازله ادلع املا القلل

بيني وبينك سور ورا سور
وانا لا مارد ولا عصفور
في إيدي عود قوال وجسور
وصبحت انا في العشق مثل
والبحر بيضحك ليه
وانا نازله ادلع املا القلل













Wednesday, January 27, 2010

لما الكذب يبقي حلو

الاغنية دي انا عشتها بشكل قريب
بجد اول مره ابقي عارفه ان اللي قدامي كذاب اللي قدامي مخادع و مش كويس
و ابعد عنه في عالم الواقع
و اعيش في كذبه ما بيني و بين نفسي
اول حد احس ان عندي 16 سنه و بفكر فيه في صمت
ماكنشي حب
بس كانت حاله من كذب قلبي و خيانة عقلي ليا
عشان كان كذبة حلو
http://www.youtube.com/watch?v=AfH2F3mIrqs

Thursday, November 26, 2009

غريبة دي

غريبة اوي ان المدونه بتاعتي يكون اسمها صوت فيروز و عمري ما اتكلمت عنها
حسيت ان جملة لو كانت الاشياء تتجسد لكان صوت فيروز انا
هي اكثر الاشياء تعبيرا و تجسيدا لحبي و شعوري لفيروز و صوتها
كل اغنيه لفيروز بكل انفعالها و غضبها و طفولتها و انوثتها ممكن تكون احسن سفير يعبر عني و عن مشاعري
حاسه دلوقتي اني عايزه اغني اغنيه مش من اشهر اغاني فيروز يعني لكن حستها اوي و بسمعها و انا بكتب
هقولكم عليها
شو بخاف

شو بخاف دق عليك وما لاقيك
شو بخاف نص الليل ما حاكيك
شو بحس الليلة صعبة
بسمعها ضربة ضربة
بيخطرلي آخد حبة
تاإقدر نام
شو بخاف حتى الخط ما يلاقيك
شو بحس انو لازم يلقيك
وترد وحاكيك
وضل عم حاكيك
حبيبي تاإقدر نام
شو بداري هالحب حتى يدوم
شو بخاف انت وهون فجأة تقوم
بتصور صورة وحدي
مش حلوة سودا وحدة
وبالليل الصوت بيودي
ولو مش مفهوم
يا ريت بيتك كان منو بعيد
والباب تحت البيت مش حديد
بلحظة بلاقيك بطلع تاحاكيك
حبيبي تاإقدر نام
انا بجد خايفه دلوقتي

Friday, November 06, 2009

لو عايز القرطاس موجود


هو :مش نافع كده

هي :هو ايه اللي مش نافع ده

هو: انت عايزة تبقي الرجل و انا اللي انفذ كلامك

هي: انا عمري ما قلت كده بس ما ينفعش كل كلمة تقولها اني اعملها علي طول بدون ما افهم

هو :لا انت عايزة واحد يقولك حاضر و طيب و انا مش ده و انت عارفاني

هي :انا بكره الرجل الشخصيته للي ضعيفه اصلا ..يبقي ازاي عايزاك تقول حاضر و طيب كده و خلاص

يا ابني الحياة مشاركة ما بينا

هو :كمان ابني ...بصي لاسلوب كلامك, حاسس انك المدرسه

هي :ييوووووووووووووه لا بجد كده كتير

هو :اااااااااه اما ده اللي ديما بتعمليه تهربي لما اوجهك

هي: انت اكيد عندك مشكله

هو : انا اللي عندي مشكلة و لا انت اللي مخك متركب شمال

هي:.....هو :......هي :....هو ....

و يظل الصراع الدامي ما بينهم هي لا تريد اي قيود ...هو عايز يكون سي سيد حتي و لو كان من الظاهر بس و هي اللي ممشياه

عزيزي لو عايز تتقرطس القرطاس موجود ...لو عايزني اصطنع انا ليا الف وش ...بس كنت بحب اظهرلك زي ما انا ...الشخصيه اللي حبتها ...حبتها لانطلاقها فاصبح الانطلاق تحرر غير مرغوب فيه

حبتها لطموحها ....فاصبح طموحها عيب و اهمال لك

حبتها لاجتماعيتها ...فاصبحت اجتماعيتها تثير غيرتك

حبتها لخطوتها السريعه اللي مافيهاش مياصه و لا دلع و قلة ادب ...فاصبحت دي خطوات العسكري الاخضر

عزيزي انت عرفتني زي ما انا و انا حبيت اكون انا مش حد تاني


كل ما اضحك عليك بتكون مبسوط و كل ما اكون انا بدون تزييف تتحول كل مميزاتي السابقه الي عيوب فورا

عزيزي مازلت احبك لنفس المميزات الاولي و لم تتحول لعيوب ...انانيتي قتلتها امام حبك

ارجوك بلاش تخليني اقرطسك لان ممكن القرطاس يبقي ضيق عليك

و انا بخاف عليك يا حبيبي



ده كان كلام واحده من اصدقائي عن حببها حبيت انقله لكم بس بطريقتي :)


Sunday, November 01, 2009

ابو بق واسع

مش عارفه
ده كده اول القصيدة كفر لما ابدأ البوست بكلمة مش عارفه ..امال مين اللي هيعرف هنا ...بس بجد مش عارفه
انا هحكي و احاول افهمكم
الحكاية بدات لما كنت في تدريب
كنت قاعده في اودة المدير
دخل انا بتكلم مع المدير علي الحجاب و اني سعيده باني لبساه و اني مش مخنوقه زي ما هو متصور و اللي كان اجنبي مع لغتي الضعيفه او اللي مكنتش اعرف انها ضعيفه قبل ما اشوف حضرته ...و فجأة ظهر قدمنا كانت احلا حاجة فيه ضحكة واسعه من بق واااااااااااااسع ...مش بحب اللي بقهم واسع ..بس ضحكته كانت حلوه اوي ...رامي الدنيا ورا ظهره
بعد تفاصيل كتيره و كلام كتير اتضح ان الاخ ابو بق واسع هو اللي هيشرف علي تدريبي بنفسه ...مش مثير و مش جذاب لواحده زيي اول ما تشوفه ...لكن طريقه الشرح كانت تحفه بصراحه
من الاخر عرفته اتكلمت معه عجبتني دماغه ...الطمع اللي جوايا خلاني اعرفه مصلحه غريبه اوي انك تكون عارف انك بتعرف واحد عشان مصلحتك في الشغل و تسال عليه و تعرف اخباره و كانه واحد من اهلك
هو احنا بعيد اوي عن بعض ...لدرجة ان من كتر البعد احنا مش شايفيين اننا بعاد
فجأة برده بدأ يسأل
يبحث
يعرف
يدور جوا دماغي
يكتشف
و انا بجري من الناحيه التانيه
بسمع كلام غير كلمنا ...بكتشف دنيا غير دنيتنا ...حد غير ...شكل غير ...قلب غير ..حتي الاكل و الشرب غير ...عرفت و لاول مره ان في الف بلد جوه البلد دي و احنا مش عارفيين ...احنا بعيد ...بعيد اوي ..حتي التعليم غير التعليم ....النظره غير النظره ...حتي الحب.ده راخر غير
المهم حطيته صورة علي الحيط ..زي اي بوستر ممكن يكون عندي
حطيته كتاب في جيبي كل ما احسس بالملل اخرجه افر ورقه ....حاجه كده زي حول العالم في 365 يوم ...اه نسيت اقول انهم كانوا 365 يوم
اه انا مكملتش صحيح
الكتاب غريب فيه طلاسم ... ...لو حلفت بجد اني حاسه انه زي الكتاب ا
اول مره اشوف حد كده
مش بيهمني لو مش موجود
مش بيهمني لو موجود
لكن بيهمني اد ايه بكتشف ايه الجديد فيه
في 365 يوم عرفت حجات كتيره
من كتاب جيب ...من صورة علي الحيط
و البقيه تاتي





اسفه لو كلامي مش مرتب انا هنشر البوست من غير ما اراجع حتي عليه ...عايزاه بس كده يمكن حد يحس بيه

Saturday, October 31, 2009

حجات قديمة

ده كان رد مني علي مدونة ابو امك و بصراحه حبيت اشكل الرد في بوست جديد
يا رب يعجبكم
ابو امك
انا مش عايزه دماغكم تروح لبعيد انا مش بشتم ده تحليل بسيط لواحد قريب منك اوي بس انت متعرفهوش مكتشفتش هو عمل فيك ايه يا عبيط... بس انا هعرفك عليه من أول و جديد,أبو امك و هو بدوره بيكون جدك" كلنا عرفين ده" بس لاحظ ان انا محدده ابو امك بالذات ،،،،ابو امك اللي ياما لعبت معه،،، أبو امك اللي اخدك في حضنه يهننك و يدلعكو لما امك او ابوك أتوا ليضربوك و يعذبوك و يجلدوك وقف هو في حزم وقال سيبوا الواد ده لسه صغير انتم مالكم بيه ده حبيب جدو ،،،فتشعر انت ان لك ظهر مسنود عليه ،،،أبو امك اللي ياما لعبت في مكتبته و مقتنياته الثمينه اللي حماها من عشرات السنين و يمكن رزع امك علقة لما حاولت تيجي جنبها و يمكن كمان كسرت نظارته و فضل يلطش مش شايف بس قالك يا عفريت مع ابتسامه جميله دون اي غضب،،و هو استحمل و انت طبعا زي الاهبل مش عارف ليه مستحمل سخافتك دي
و ده لانه(كان بيكفر عن ذنبه طبعا)هذا الرجل الذي طالما شعرت انه مخزن كامل من الحنان و يحمل احتياطي و لا احتياطي بترول الخليج من الامان و العطفهذا الرجل الذي احببته و تمتعت باللعب معه و كم سمعت صوت دعائه لك مع كلمات المدح و التهليل لكل سنه دراسيه تنجح فيها "جبت مجموع او مجبتش" ،،،مع هديه او مبلغ من المال ،،،،اااااااااااااااه وا جداااااااااااه
تمر الايام و انا في ذلك الحلم و يبقي إيماني بان جدي هو افضل الناس علي الاطلاق ،،،و لكن اكتشف انه هو اول الناس في ظلمي ،،هو العدو الحقيقي الذي طالما كنت ارتمي في احضانه ،،،فأبو امك يا عزيزي اول مذنب من حفنة المذنبين في حقك نعم هو أولهم فلا تتعجب!!!فهذا الرجل
هو من فكر و خطط و رسم و تكتك ،،و فحص و محص ،،، لفعلة شنعاء و جريمة نكراء و هي زواجه من جدتكثم بدون عقل او تفكير و بدون ادراك لمقتضيات الامور ،،و دون وعي كامل لفعلته الشنعاء،،، انجب امك......نعم ........أنجب امك........ و التي بدورها اتت بك الي الحياة بعد ارادة الله طبعاثم تأتي الجريمةالثالثةفهذا الرجل مرحب بالشاب الحليوه المسبسب المدلع اليافع الشباب الفارس الهمام الذي طرق باب بيته ليأخذ ابنته ليتزوجها "اللي هو ابو حضرتك طبعا "و بدلا من ان يغلق الباب في وجه ابيك او يقوله و هو حانق و في صوت صارم "معنديش بنات للجواز" أو أجري من هنا ياله .....او العب بعيد ياض بدل ما اعورك في وشك و لو عتبت المنطجة دي هانجطعك تجطيع او نطخك....و بدلا من ذلك ، يرحب به و يأخذه بالاحضان و يربت علي كتفيه –مش كتف واحد حتي- و يقوله "احنا بنشتري راجل يا حبيبي " و يسهل كل السبل لكي تتزوج ابنته "اللي هي امك "من ذلك الشاب "اللي هو ابوك"بدلا من ان يصفع امك ألم محترم يتولها او يدخلها في
coma
و يقولها جواز ايه و هباب ايه ،،،يذهب ابو امك و يقولها "هاااااااا يا عروسه ايه رايك" فتحمر وجنتا امك من الخجل و تقوله "اللي تشوفه يا بابا "و يستمر ابو امك في مهزلة من تيسير الامور و توضيب و تستيف المسائل عشان الجوازه تمشي و البت تتستر "أستر يا رب " و طبعا بتمشي و طبعا ابوك و امك يجبوك "و ده اكيد لانك بتقرا الكلام ده دلوقتي"و تتحمل انت الاخطأ دي كلهاشفت بقي ،،،كام غلطه أبو امك عملها شفت كام جريمة مرتبه و مكيده اتعملت فيك عشان تيجي الدنياتيجي و تشوف القرف ده انت شايف القرف معايا ......شايف و لا لأ..... "صحصح "كده ده القرف في كل حته يا جدع اههاما بقي لو ابو امك عايش روح عاتبه عتاب خفيف"خفيف ها" و امسك في كولة بيجامته او في ديل بنطلونه و قوله ليه كده ليه،،،ليه ،،،ليه ؟؟ انا عملت فيك ايه؟؟؟ ذنب امي انا ايه ؟؟؟عشان انت تتجوز و تخلف تجيب اميو بعدين مش تقف وقفة رجاله و تمنعها من انها تتجوز و تجبني ،لأ ده انت بتساعد في الجريمة ديو لو مات بقي اترحم عليه و يبقي راحت عليك انك تعاتبه يا حلو و تعرفه غلطه ،،و قوله ربنا يسامحك علي اللي عملته فيا(متزعلش مني يا جدي... ده بس من غلبي)

Sunday, October 18, 2009

عزيزي الرجل .....روح احلق شنبك كفايه بقي

عزيزي الرجل -مفروض اكتب المحترم بس مش قادرة كده يبقي كدب -انت رجل ؟؟؟ده انا بسال يعني
اصل بصراحه مش شايفه اي رجولة خالص و بصراحة اكتر مش عارفه مين فينا اللي غلط
يا تري انا اللي رجل لدرجة اني ارجل منك يعني..... و لا انا ست اوي لدرجة اني مش لاقيه فرق كبير ما بيني و بينك و حاسه انك بقيت اختي مديحة
ارجوك لو سامع او شايف او حاسس
احترم نفسك و احلق شنبك بقي

Friday, October 09, 2009

عذرا مدونتي

تلت سنين و اربع شهور و سبع ايام
عمر مدونتي اللي اهملتها بشدة
اسفه ليكي ....بصراحه شفتي معايا حجات كتير
بس اوعدك ان في حجات جوايا عايزه اقولهالك
عايزه ارجعلك تاني
عايزة انا و انت نبقي مع بعض زي الاول
بجد انت كنتي معايا في وحدتي وقت ما حبيت احكي
انا رجعتلك تاني
عذرا مدونتي

Thursday, November 13, 2008

ما الدنيا الا ملقف هوا كبير

يااااااااااااااه شبابيك الدنيا عماله تتفتح ،،،،خايفه اخد برد و أستهوي اما انا وقفه في حتة ملقف جرررررررررررررر
و انا قاعده في اوضة صغننه كل شويه يطلع فيها شباك اتفرج منه علي حال الناس ده شباك الناس اللي ناسيه ربنا و ناسيه نفسها و ناسيه اللي حواليها،،،و ده شباك اتفرج منه علي ناس عارفه ربنا اوي و مسلمه امرها له ،،،و ده شباك لناس عامله نفسها عارفه ربنا و بتتشدد عشان حاله الرهبه و الشك في الدنيا و الدين

و انا واقفه بتفرج مش قادرة اتحرك افتح الشباك و اخليه باب اقدر ادخل منه علي اوضه تانيه ،،،و لا افضل زي ما انا
اقف اتفرج علي الناس اللي مسميه نفسها روشه و كلاس ولا الناس المتشدده و عامله نفسها ماشيه علي شريعه ربنا.

اصل انا هقولكم علي المشكله انا للاسف ما قبلتش تقريبا غير النوعين دول ،،،،من 0-180 درجة ما فيش 90 درجة ولا 45 حتي رغم انه معووج شويه بس عادي يعني مش مهم

لكن ده خلاني احلل الناس دي
حسيت ان المنحرفين اللي متصورين ان الصياعه هي نوع من انواع التحرر و الذكاء و الحرفانه
حسيت ان فيهم سذاجة معرفش ليه ،،،،او يمكن انا اللي هبله انتم هتحكموا

يعني بالصدفه اقبلت حد من الجامعه الامريكيه ( و مش كل الناس هناك كده بس ده اللي انا قابلته)
و بعدين فجأه لقيت الشخص ده بيتكلم عن بنت عايز يرتبط بيها المهم بيحكيلي عن مدي التزمها و اخلاقها و انها البنت الوحيده اللي قابلها ما بتشربش (نننننننننننننننننننننننننننننعم ما بتشربش)اه ما بتشربش........ ده علي اساس ان ده قمة الادب و الاحترام
هنا ظهرت اغنيه مروه في الخلفيه ( الصراحه راحه ياعيني و هي ما بتشربش ،،،الصراحه راحه يا روحي و هي ما بتسكرش,,,,,, حاحااااااااا) مع الاعتذار للفنانه اللي بحس انها عامله زي سندوتش الفاهيته بيتزحلق من كل حته ،،،،ما عالينا

كنت عايزه اقوله انت ساذج و لا بتستهبل ،،،،بس سكت اقوله ايه !!!!
و بعدين بدأ يحكيلي علي اد ايه هي فيها حجات مميزه و شدته زي مثلا انها بقالها 15 سنه بترقص صلصه
سعتها بقي قومت وقفت و ايدي في وسطي و في وضع يدل علي ردح من الدرجة الاولي و قلت( لا و الله ييييييييييييييييييهي) الناس دي عبيطه و لا ايه؟؟؟
هو علي راي استفان رستي و هو بيقول* الوسكي ده مشروب البنت المؤدبة*الناس دي فاهمه الدنيا ازاي
منظور الدنيا عندهم شكله ايه
و ده حب دي و ده ارتبط بدي و ده راح يسكر مع ده و ده اخد مرات ده و دي عارفه 9 علي جوزها........ علي اساس انهم و لاد خالتها يعني و لا ايه؟؟؟
يارب ارحمني!!!!ذ
وراح المضروب يتكلم عن الحريه و ان الناس في مصر متخلفه و بتخنق بعض بقلة ادبهم سبونا يا ناس نلبس من غير هدوم ايه قلة الادب دي (ده هو اللي بيقول)

انا بقي عشت في دور الست العقلة الراسيه اللي ما يجلها بلهارسيا و قلت في هدوء......
مين فينا اكثر حريه؟؟؟بنت سامحه لكل كلب في الشارع يبص علي جسمها و شعرها و كلها علي بعضها ولا بنت محترمه نفسها و هيجي يوم يكون في واحد بس هو اللي تختاره و تسمحله بده
يعني انا اللي بسمح لده و بمنع عن ده ،،،مش واحده سايبه نفسها لكلاب الشوارع

مين فينا هتحس بالحب اكتر ،،،اللي كل ما حد يغمزلها بعنيه تجري عليه و تكون جربت ده و ده و ده و لا بنت احساسها بكر و كلمتها من قلبها
بجد مين فيهم مستمتع اكتر؟؟؟؟؟؟،،،،رد يا *#$#$&#$&#$&ذ.....

و قال ان سبب الاختلاف و خوف البنت مش عشان هي عايزه كده لا ده عشان المجتمع بيحد من حركتها و حريتها
أهبل ده بقي و لا ايه؟؟؟؟
طبعا حسيت بكلمه سعد زغلول الله يرحمه ما فيش فايده يا صفيه
ده كان موقف مختصر جدا

سبته و شويه كده ليا واحده صحبتي و يعني احنا عرفين بعض من مده فالتمثيل بقي عليا عيب يعني و لا مؤخذه
المهم كان بقالي فترة ما شفتهاش ،،،قوم ايه البنت دي سمعت ان اخوها بقي ملتزم دينيا و ده مصطلح جديد
يبدا الملتزم دينيا من انه بيصالي الخمس فروض فيمشي من فرحته يقول انا ملتزم دينيا لواحد مربي دقنه و مغطيه كرشه تقريبا فبرده كده و الله أعلم ده ملتزم دينيا برده

المهم فبطبيعه الحال البنت بدات تلتزم و من كتر التزمهم و خوفهم علي الحلال و الحرام ،،صحبتي دي اتخطبت
و بفضول البنات بدأت انا اسألها ،،فين و مين و ازاي و عمل ايه و جه منين طب زاركم و جاب ايه معه و الكلام اللي انتم عرفينوا ده ،،،و سألت سؤال عادي جدا في وسط طوفان الفضول بتاعي (و يا اختشي قاريتوا فاتحه و لا لأ)
ردت هي بكل فخر( لا اصل قرايت الفاتحه بدعه )
تم تم تم طشششششششششششششش

نعم!!!! قرايت ايه....... بتعمل ايه؟؟؟؟
قرايت الفاتحه بدعه
ليه ان شاء الله
عشان الصحابه الاوائل و الرسول مكانوش بيعملوا كده
نعم ؟
اه ...اصل اخويا قال كده و هو زي ما انت عارفه متدين و ملتزم دينيا
لا و الله!!

بصراحه كنت هموت انا سبتها من هنا واذا بيا بروح علي موقع دار الافتاء و بشوف الحوار المهبب ده ايه اخرته
ليكون ابويا و امي جوازهم باطل و انا و خواتي نتشرد في الشوارع

قالت دار الافتاء

الفاتحه ذكر و ثناء و دعاء ، القول ببدعية قراءتها عند الزواج هو في نفسه نوع من البدعه ،لانه تخصيص لعموم الامر المطلق بتلاوة القرأن و ذكر الله تعالي من غير دليل ، و من المقرر في علم الاصول ان الامر المطلق يستلزم عموم الامكنه و الازمنة و الاحوال و الاشخاص فهذا تخصيصي بلا مخصص و تضييق لما وسعه الله تعالي و لارسوله
و ده رقم الفتوي 76914 و اللينك بتاعها
www.dar-alifta.org/fatwaanswer.aspx?ID=76914

ياااااااااااااه تضيق لما وسعه الله ،،، تضيق لما وسعه الله ،،، تضيق لما وسعه الله ،،، تضيق لما وسعه الله ،،، تضيق لما وسعه الله ،،، تضيق لما وسعه الله ،،، تضيق لما وسعه الله ،،،
قلوها ورايا يا بشر سبع مرات تضيق لما وسعه الله ،،،
تخيلوا يا جماعه انا بقي لما اتعامل مع الصنفين دول من البشر
تخيلوا ايه حاله البسطره اللي انا وصلتلها
حسبي الله و نعم الوكيل
هااااااااتسي........... اهو شايفين اخدت برد ازاي ،،،،،لا يا جماعه بجد الدنيا ملقف هوا كبير
انا هدخل من الشباك لحسن بردت ،،،،،جررررررررررر
و زي ما سمعه بيقول سلامووووووووو عليكووووووووووو

Thursday, September 11, 2008

واجب تدويني

س:اذكر 6 أسرار قد لا يكتشفها من يقابلك أول مرةقوانين الواجب

:1. اذكر اسم من طلب منك حل هذا الواجب

.2. اذكر القوانين المتعلقة بهذا الواجب

.3. تحدث عن ستة أسرار قد لا يكتشفها من يقابلك للمرة الأولى

. 4. حول هذا الواجب إلى ستة مدونين ، وأذكر أسماءهم مع روابط مدوناتهم في موضوعك5

.اترك تعليقا في مدونة من حولت الواجب عليهم ، ليعلموا عن هذا الواجب .. تسعدنا مشركتك


اممممممممممم صعب شوية البتاع ده بس ممكن نقول

1-ان قلبي سعات ممكن يكون قاسي

انا بحب اللعب جدا و النوم

اني عصبية جدا بس لجوه

مش اي حد يدخل قلبي

اني بعشق الاكل زي عنيا

ان سعات لساني و انا سايقة بيكون زفر مووووووووت (بس لو لوحدي)ذ


http://hasobatiya.blogspot.com/


http://tender-eyes.blogspot.com/


http://belong-2-za-humanity.blogspot.com/


http://diedalive.blogspot.com/


http://hartalah.blogspot.com/

اللي بعته احمد فياض

Monday, August 18, 2008

هيييييييييييه انت

في المرات القليلة اللي بتفرج فيها علي التيلفزيون لاقيت بعض الظاهرات الغريبه ،،،اللي مش قادره افهمها يمكن في حد فيكم يفسرها لي ،،،فجأه و علي حين غرة (جامده حين غرة دي) و بدون اي انذار لاقيت واحد طالع في التلفزيون يحمل من معاني الاناقة و الشياكة و سعات بيقولوا عليها شاياكة موضة 1970 ،،،،الله ،،،الله عليه
و اللي هنختصرها في الاتي

نظارة درجرادية سماوي احتمال تكون ماركة رمش العين يا لالالي
بدلة لميع تجبها يمين تكب علي كحلي تجبها شمال تلاقيها مقلمة بنفسجي ماركة شكوريل او عمر افندي
عدد واحد سلسة جنزير معتبر عيار 51 في 43 من محل فيفيان للمجوهرات و الذهب الخالص 280 شارع الصاغة
خاتم رشدي اباظة في فيلم الرجل الثاني لما كان بيقولوا شايف الخاتم ده و حيات طنط كيمة و يروح ملبسه بونية في وشة
كل ده متركب علي بطل رياضي تجاوز الستين بس اللهم لا حسد و ده بجد يعني بألف عيل من اللي بنشفهم في الشوارع ( اجيال البوزو)ذ


يجي البطل الهمام و يقولك هيييييييييييييييه انتِ و طبعا بشكله الجامد ده لازم تتفزع يروح عم زورو ده يقولك عايزه تبقي راشيقة ،،،و طبعا زي الهبله هزيت راسي مظهرة كل معاني الفرحة مع ابتسامه بلهاء

راح سايبني و مكملش كلامه معايا و بص لأخويا و قاله هيييييييييييييه انت عايز تبقي رشيق ،،،،........... مش هقول اخويا قال ايه
راح البطل قال يالا اتصل علي 0900 و شوفوا معنا توصلوا ازاي للرشاقة مع اشارة منه بصوابعه الحلوين و خاتم رشدي اباظة

يالا انت ،،يالا انتِ اتصلوا بي 0900

طيب هيييييييييييييييه انت تف علي وشي انا لو اتصلت بيك انت

Monday, June 09, 2008

عفوا البوست ده للكبار فقط

ايييييييييييييييييييه و الله و كبرنا و عجزنا و داخلين علي الخمسة و عشرين،،،،ايه ثواني كده 25 لا لا قول كلام غير ده بس انا لسه جوايا بس 19 او قول كمان 16 انا يا حاج من جوا حاسة اني لسه مطلعتش بطاقة

خمممممممسة و عشرين ربع قرن ،،،قرن غزال طبعا ما اللي زيي لازم يكون غزال هي هي هي هي


ايه اللي فكرني بده،،،، هحكلكم

كل ما ارفع دماغي و انا ماشية في الشوارع المصرية اشوف افيش فيلم جديد و مرزوع عليه للكبار فقط،،،الله؟؟؟هو في ايه

هي مصر عدمت عيالها و لا ايه ،،،كله للكبار فقط للكبار فقط اييييييييه ما فيش دم ما فيش احساس بان في اطفال زيي ما ينفعش يدخلوا الافلام دي،،،ده حتي في التعداد المصري العيال عماله تكتر و ليهم حزب الاغلابية يعني احترموهم شوية


و بعدين ايه الهوجة دي ده قضية ان في حوالي تالات افلام مكتوب عليهم للكبار فقط طيب حتي لو مضمونهم كويس مفروض نوصل رسايلنا للجيل جديد برده( ; ،،،،و بعدين هو ايه مدلول للكبار فقط ده؟؟؟؟ يعني ايه؟؟؟؟؟،،،انا شخصيا بحس انها كلمة ابيحة يعني ،،،زي بالظبط لما كنا صغيرين و يقولوا لنا لما تكبر هتعرف ،،،و قتها طبعا بالذكاء الفطري للطفل بعرف علي طول ان في حاجة مش مظبوطه


يعني شعور غريب و الله لما تحس ان كل حاجة بتتفرض عليك يعني تخيلوا معايا كده رجل واخد مراته و عياله و طبعا بالمواصلات و القرف و عقبال ما يوصل للسينما او حتي مجمع سينيمات يلاقي كل الافلام مكتوب عليها للكبار فقط ،،،،طب مش ده اسمه هطل ،،،مش يتحط برده تحت مسمي هبل علي قلة ادب ،،،في ايه يا جدعان


هو الكل بيخنق ليه كده علي ام المواطن المصري،،،،، يعني حتي فكريا،،،كل حاجة بزياده و كل حاجة هتشوفها غصب عن عين اللي جيبينك،،،،هتاخد زياده في المرتب بالعافية فالرجل من دول يقول مش عايز زفت يقولوا له لا هنزودلك الزفت (للعلم الاسم المستعار للمرتب بين الموظفين هو الزفت)هنزودك و هنزود الضرايب علي دماغك


هنخليك ابيح انت و مراتك و عيالك و لازم كل الافلام تكون للكبار فقط او تفضل تتفرج علي التلفزيون العقيم او تشوف الدش المقرف و يجيلك قرف من العيشه اكتر ما انت قرفان


او حتي في موديلات الهدوم كل الهدوم و الايشاربات عبارة عن ساتان يا جدعان احنا في بلد حااااااارة ستان ايه و هباب ايه فين قطن بلدنا

و لا مصيبة الايشارب الستان و اعذروني ان كنت بدخل في تفاصيل فرعية بس اعمل ايه خنقاني

تلاقي الايشارب من دول عامل زي المشمع طبعا بيلمع في عز الظهر و اغلب المصريات و ده انا شفته بعيني سمر فالمعه بتاعت الساتان مع الالوان الفقعه مع شمس الساعة تلاته الظهر و حط معهم طبعا حالة من التلزيق علي وش البنت من دول و فوقها الايشارب السالف ذكر مواصفاته و ده بدوره بيزود عفانة شكل الوش و البنات عادي جدا مشيين بيه ،،،يعني يا موكوسة انت و هي انتم ناقصين توقيف حال ،،،اللهم لا اعتراض بس اقول ايه ما ده المفروض علينا ما فيش غيره


نرجع لموضوع السينما انا بقي كنت ماشية جنب سينما روكسي و لا قيت اسم كده غريب لفيلم،، تقريبا!!! افتكري يا بت يا صوت فيروز افتكري يا صووووووووووووت افتكري

تقريبا ليلة القبض علي الفنلة النص كم !لا لا لا لا كان اسمه غير،،،ليلة القبض علي البت ميرفت بالبيبي دول! ،،،،،لا برده كان غير ،،،، ميرفت اتقبض عليها من غير حاجة خالص ،،،،ليلة طين عليكي يا نعيمة انت و البيبي و الدول،،،لا برده طب الليلة اللي جيبنا فيها بيبي يا دولي برده مش متذكرة

ما علينا اهي كانت ليلة مطينة بطين عليهم في جهنم ان شاء الله


راحت صحبتي بنت انكل كمال قالت لي انا عايزة ادخل الفيلم ده ،،،رحت انا بقي شاهقت شاهقة و خبطت علي صدري و قلت لها يالاهوي بالي يا عيب الشوم تعالا يا انكل كمال شوف اللي بنتك عايزة تعمله

البنت طبعا اتفزعت و قالت لي اييييه في ايييييييه ؟؟؟

قلت لها ده للكبار فقط يا هانم،،،

بصت لي بنص عين و قالت لي و هو مش حضرتك كبار برده و معكي بطاقة

قلت لها بكل فخر ايون معايا قالت لي طب ايه انت نسيتي انك كبرتي علي الكلام ده و لا ايه ولا لسه فاكرة نفسك صغنونه

و من اليوم ده عرفت اني فعلا كبرت و كبرت علتي و ورمت مرارتي من اللي بيحصل فينا

و احب افرحكم انا ممكن اعرف ادخل فيلم للكبار فقط و انتم لاااااا ،،،،تيلا لا لا لام:p

احمدك يا رب انا كبرت



Sunday, May 11, 2008

قطوف في فروة الخاروف لبنت رشد اباظة 2

حكومتنا يا حبيبتنا
قررت الحكومه الحفاظ علي شعبها من اي محاولة للانتحار او الإضرار بالصحة فقامت حكومتنا المصونه اسم النبي حارسها و صاينها بعمل ارتفاع أسعار الجاز و قالت ( يا كلاب -اللي هو الشعب- احنا غلينا الجاز عشان محدش يشربوا و لا يولع في نفسه،،،،و حتي السجاير مضرة للصحة يا حمرة يا كلبييين ،،،و الادوية غالية من زمان لان الدواء فيه سم قاتل )و طبعا احنا بدورنا اتاخد مننا الادوية و سابوا لنا القاتل في أرابيزنا
غاندي بيعادي
فجاة قرر واحد يشبة المرحوم غاندي انه يعدي في اوسع نقطة في شارع صلاح سالم ،،،قرر غاندي المصون انه ينزل رجلة و يرفع ايده و يعدي و اللي ما يعدهوش يقوله ملعون ابوك ابن ،،،،، ما علينا ربنا يلطف بعابيده
أتحسبن انا و لا تتحسبن انت
دي كانت كلمة واحده ست بتحط بنزين للرجل اللي في المحاطه بيشتغل ،،،الرجل بصلها بمنتهي الاسي و كأن ابوه هو السبب في الغلاء ده ،،،بعد كده حطيت انا بنزين و جيت كالعادة اديلة بقشيش بصلي و قال مش كفاية هما هنبقي احنا كمان ،،،و كلمة هما دي كان دولة تانيه مش ناس من مصر،،او عيل صغير بيحكي لامه عن البعبع و مش لاقي اسم فبيقول هما،،بصيتله و قلت له هي جات عليك يا عم خد البقشيش ما تتكسفش

Wednesday, April 30, 2008

قطوف في فروة الخاروف لبنت رشد اباظة

كارينا معرينا
يحكي ان في شيطان اخترع حاجه اسمها بودي كارينا المهم البودي ده هو عباره عن فكرة بدلة الغطس حاجه كده تحس انها كاوتش بتلبسها عشان تلزق علي جسمك و بدال ما دراعات البنات تبان بتحط الهباب ده قال يعني مغطي دراعاتهم,,,,,لعنه اتحطت علي دماغ المصريين و طبعا لان دراع الست المصريه مشهور بمركزه و واخد وضعه بين الدراعات ,,,تلاقي احجام غريبه محشورة في الهباب ده و تكاد تكون دراعاتهم باينه و لو باينه بصراحه يكون احسن ,,,,توب علينا يا رب من القرف ده بقي
الشكوي لغير الله،،،،مذلة
كنت في الميكروباص و بعدين قعدت جنبي واحده ست محترمه سالتها الساعه كام ردت عليا تمانيه الاعشرة و من هنا بدات الست دي تحكيلي علي اد ايه الرجل المدير مكفرهم في المواعيد و الاغرب من ده بيسيب ناس و بيقفش علي ناس تانيه,,,و فضلت تتكلم معايا و انا بصالها مش بنطق تقريبا زي ما تكون الست كانت مستنيه تتكلم مع حد,,,و واضح جدا ان عندها كبت رهيب ,,,كونها تمشي تشكي حالها للناس اللي في الميكروباص ده مصيبه ,,,الست عليها ضغط رهيب و كمان محدش بيسمع لها ,,,دي كانت صورة بسيطة اوي لست عاديه جدا عندها بيت و اولاد و شغل و ميكروباص تتاخر فيه
نظرية الديل
مشكلة كونك من غير ديل ,,يعني دي مشكلة كبيرة ,,لازم تكون بديل عشان تعرف تعيش حتي لو كنت بنص ديل برده شغال ,,,او ديل تحت الانشاء لسه صغنن بينبت ,,,فخير و بركة بكره يكبر و يفرع
ليه بقي بنقول كده ,,السبب ان حياتنا الذيذه دي فيها نوعين من البشر كلاب و سباع,,,و الكلاب بقوا هما كمان بينهشوا فينا و بيحاولوا يفرضوا سيطرتهم علينا و دي طبقة السواقين اللي شيفنهم في الشوارع و البلطجية و العيال الشمامه اما السباع فهم بقي اللهم احفظنا مش هنتكلم عليهم,,,بس ممكن اعرف لامتي حالة الفرم اللي احنا فيها دي؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
البقية تاتي

Thursday, March 13, 2008

مشاعيري و راحت خلاص 2(اين انا منه)ا


عندما اشعر انه يتمتع بطعم الكلام علي شفتي ,,فياكل ما تقدمه افكاري علي مائدة عقله الذهبي,,,, يشعر بان ادم قد اورثه ما جعله يختلف عن حواء,,,يتمتع برحيق نظراتي و انا مستمعه اليه ,,,يشعر بارتعاش مشاعري و سذاجة افكاري ,,,فيستهين بها في عقلة تاركني مغمورة في حل الغازه ,,, ادور و ادور في طوق حلزوني
اين انا منه



يا سلااااااااااااام قولي يا ست كمان و اشجينا ,,,,

بس عشمكم هيطلع علي مافيش لان مشاعيري كانوا البوست ده و اللي قبليه و بس كده و رجعت تاني زي ما انا

:)

Tuesday, March 11, 2008

مشاعيري و راحت خلاص

كنت هعمل مدونه تانيه لان كان في موضوع كده كنت اتمني ان ربنا يوفقني فيه طبعا انتم عارفين موضوع ايه,,هي هي
خلاص بقي بنجزيف,,عموما الموضوع بخ كالعادة
و ده حبت كلام كده حسيت بيهم وقتها قلت مش مشكله اني اكتبهم و اهو عشان الناس تعرف برده اني بعرف اتسهوك
اقروا يالا


لايزال عطرك في هوائي ,,,اهو حب وجودك ام اهوائي,,,هل تجذبني حقا ام هو طعم الاحتياج
,,لوجودك حتي و ان كان منك عطرا في فرائي
اخذت معطفي من بين يديك فوجدت عطرك به زاخر,,,,, فسالتك هل هو فعلا اسكادا فضحكت كانك تعلم ما انت بي فاعل
تري اتكون انت حبي الحقيقي
ام اني علي وشك الاعجاب بزجاجة
وعجبي
ملحوظة
انا ملاحظة ان اغلب المدونات البنات مواضيعهم بتروح بخ تفتكروا ده ليه معني معين؟؟؟؟؟

Thursday, February 21, 2008

محفل علي اكوام الزبالة

كعادتي كل يوم انزل متأخرة عن موعدي ألملم نفسي ادخل سيارتي دون ادني اهتمام بما حولي سوي مفتاح الكونتكنت ابحث عن شريط محمد جبريل لاسمعه و اخرج باقي الشرايط , الطريق طويل يصل للساعتين تقريبا يمكن سماع وصلتين لام كلثوم دون ملل و اهو ساعه لربك و ساعه لقلبك,,,ء


لست مهتمه بما يدور حولي مجرد نظرات سريعه من خلف نظارتي الشمسيه مع النظر في مرأه العربيه لمعرفه الي اي مدي وصل القشف عندي, و هل تمت تغطيته بمعجون الكريمات و خلطة الاسمنت و الصبه اليوميه التي اضعها علي وجهي في محاوله جاده لتغطيه اثار العدوان الثلاثي و الرباعي و الخماسي اثر التعب و الملل و البحلقه عدد اتناشر ساعه كل يوم في الكمبيوتر حاله مذرية وصلت اليها من كثرة التفكير و المجهود و مع بعض الالوان الخفيف (قال يعني طبيعي )لاني ذاهبه اللي العمل مش لملهي ليلي زي ما بشوف ناس عاملين
,,,
برد الشتاء بدأ في عمل تسويس خطير في جهازي الهيكلي و ان كان معروف عند اهل الطب بانه ينقسم اللي هيكل عظمي محوري و هو العمود الفقري و الجمجمه و القفص الصدري,,,و طرفي و يمثل الطرفين السفلي و العلوي
و بالنظر لتلك التقسيمه نجد ان العمود الفقري مصاب بانعواج ولا أنعواج ايد السيد هوك او الاقرب للذهن احدب نوتردام
اما الجمجمه فهي صيف شتا من كتر التفكير تقريبا اتشققت
بالنسبه للقفص الصدري فده طابق عليا علي طول

لكن لا نكذب القول أني اتحايل علي هذا الموقف بعمل غسيل وش يومي في محاولة مني لعدم اظهار النكد و قرف السنين و الايام
ورغم ده كله و يبان من بره هالله هالله و من جوه يعلم الله ,,,يعلم الله اني حزينه و مخنوقه و ان ريحه البرفان اللي الواحد بيحطها بيحطها عشان يغطي علي حالة موعان النفس الموجوده يكفي منظر الزبالة و لا اعلم اصحاب الفيلا التي امامنا مستحملين ازاي المنظر ده

ورغم كل هذا اذا بها فتاة لم تتجاوز من الارض سوي نصف المتر و من عمر السنين سوي الثمانيه اعوام

بين كوم الزبالة التي صنعتها الحكومه في شوارعنا المصريه حيث جعلت علي اول كل شارع مقلب زبالة جميل بدل من ان تتزين شوارعنا بالحدائق (رحمتك يا رب)ثم ياتي الزبالين لكي يزيدوا الطينه باله مخرجين ما في السلال لعمل فرز يومي للكرتون و البلاستك و القرف ده تاركين صناديق الزبالة ما بداخلها خارجها و ما فوقها تحتها

اما هي فتقف وسط كل هذا و كانها ملكة متوجه تجلس في حديقة قلعتها بين الزهور ترقص بحركات متمكنه و كانها تستعرض فيدو كليب من الدرجة الاولي ممتاز للمخرج ابي طارق المعاري و الذي بدوره يقوم بتعرية كل من اتي تحت يديه في فيدو كليب

الاعجب انها لاتشعر باي مشاكل منغمره في رقصتها و كانها ترقص في معبد الاله امون مقدمه له القرابين

تحرك يدها ببراعه تغزل من الموسيقي التي لا نسمع منها شئ سوي في عقلها اثواب حريريه منفصلة تماما عن أثواب الشوك التي غزلتها الحياة بطبعها,,,,, واضعه تلك في الفتاة في كوم الزبالة
تركت كل شئ في يدي و نظرت لها ناسيه الزمان و المكان ذهبت معها اللي عالمها في انتظار الحركة التي تالي ما تفعله متشوقه لمعرفه سر هذا الرقص العنيف الساعه السابعه و النصف صباحا دون موسيقي او الحان او جمهور و تحتها كومة الزبالة و فوقها سحابة الشتاء القارص
بدا عقلي يفكر هل هي سعيده حقا !ام انها تصنع السعاده مثل صبه الاسمنت التي اقوم بها صبحا ؟؟؟ هل هي غافله عن ما يدور حولها ام انها مدركة تمام الادراك و متعايشه مع ما هي فيه؟؟؟
لا اعلم

اكثر من ذلك تشويقا ما الذي يجعل فتاة في هذا السن ترقص بكل هذا الاحتراف؟؟؟؟ و كانها كانت في فرقة رضا للفنون الشعبيه
هل هي جينات موروثه للرقص الشرقي ,,,ام ان ثقافة الفيديو كليب و الوصلات ام تلاتين جنيه هي من وراء الاحداث
لا اعلم
ربما انه شئ عادي و لكن براعتها في تأدية حركتها اللولبيه هو ما استفذني

ولكني لم اري من قبل محفل علي اكوام الزبالة مثل تلك

Tuesday, February 19, 2008

ساعدوني يا اخواني ربنا ما يوقعكم في مشكلة بلوجيه


بصوا يا جدعان ,,,الاخت صوت فيروز اللي هو انا ,,, بتموت في الكرتوون و في شخصيه كرتونيه انا الفتها و صممتها و عايزه اكتب حلقات عنها,,,لكن القرار صعب و مش عارفه اخده و لا لأ سعدوني يا ولاد البلوجات الحلال امشي في الموضوع ده و لا لأ




اسم الشخصيه :علي الله بنت حسب الله



السن :بتاع عشرسنين كده



البلد: مصر حته مش معروفه قرية كوم يجبر الله



ودي صورة الشخصيه


مش حلوه و النبي ,,,عموما انا اللي راسمه الشخصيه و انا الوحيده اللي ليا الحقوق الشرعيه في نشر و تاليف و تفنين هذه الشخصيه و اللي يسرقها هطلع عينه و البسه قضيه و هفجره انتم احرار

ردوا عليا و النبي

Thursday, February 14, 2008

طعم الحجات


بص يا سيدي عمرك حسيت بان لكل حاجه طعم ,,,اممممممم طعم ,طعم بجد يعني تحسه كانك بتشربه بتبلعه


انا بقي بحس اوي بطعم الحجات دي ,,,يعني يا سيدي لما تحس بطعم النوم!!!!! امممممممم طعم النوم علي شفيفك يعني بعد ما تصحي الصبح و تغسل وشك و تصالي و تلبس و تروح الشغل و تركن عربيتك و تدخل و تقول السلام عليكم بالعافيه فحد يرد عليك و بعد كده يجرك للكلام


تروح انت بالع ريقك بالعافيه و مبلل شفيفك اللي لو اتكلمت بيهم ممكن يتشققوا او يقعوا ورادد عليه بالعافيه برده سعتها بتحس بطعم النوم علي شفايفك رغم عملية غسل السنان و المضمضه و الوضوء بس انت من جواك دايق طعم النوم حسه مش قادر تصحا ابدا


طعم الاحباط


اممممممممممم ده بقي طعمه مر و رخم رخاااااااامه استغفر الله حاجه تقرف انا سعات بسميه طعم الاجهاض مش الاحباط كنت امبارح في اجتماع و بعدين يا سيدي الشركة بتتباع ,اوم ايه بقي ,الناس اللي بيشتروا شركتنا كل واحد فيهم و لا مؤخذه يعني تحس انه ماسك في ايده خزوق و مخبيه ورا ظهره لاتعرف ايه نوع و شكل و حجم الخزوق!!!! ,,انت طبعا بتبقي عارف انه خزوق هتخده هتخده بس اللي بيقلق نوع الخزوق يعني خزوق بسن فتقدر تقول انه هيدخل واحده واحده ,,,و لا خزوق من غير سن هتلبسه شحط كده مع اني معايا الخزوق بتاعي استخدام شخصي بس نقول ايه بقي مش عارفه بصراحه

المهم نرجع لموضوع طعم الحجات,,,,كنت انا بقول ايه بقول ايه

,,,,ااااااه افتكرت ,,,طعم الاحباط او الاجهاض الاحباط و الاجهاض واحد هو نفس فرحة الام و احساسها بطعم الامومه و ان في حاجه جواها بتتنفس فتحلو الدنيا معها و بعد كده تحس بان الناس اصحاب الخوازيق الثلاثه دبوا ايدهم في احشائها و اخدوا حلمها منها من جواها من بين ضلوعها نزعوه وقتها برده بيبقي ريقك ناشف و طعم المراره في بؤك و لا اجدعها حته لبان دكر مر (ملحوظه انا دقت البان الدكر ده عشان لاقيته عند جدتي بتغليه للكحه و اهي معلومه يمكن تفيدكم)ء


طعم احساسك بانك بتحب من غير ما يكون في حد


ااااااااه هو احساس عامل بالظبط زي الزنجبيل او الحرنكش مش عارفه تعرفوه و لا لأ بس هو في اوله بتحس بحاجه مايعه كده لان حبك مش موجه لحد و بعدين تلاقي طعم لاسعه كده لذيذه لانك بتدوق و لو في خيالك معني الحب في اغنيه, في فيلم, في كلمه حلوه ممكن يكون حد بيقولها لحد تاني (بلوبيف ,,,بلوبيف) في اي بلا ازرق

و بتتمني انك تحس بالطعم ده بس يكون حقيقي مش حرنكش و لا زنجبيل




حسين بطعم كلامي و لا كلامي مباقش له طعم



Tuesday, January 15, 2008

في الشتي


طبعا في واحد هيقراها فشتي اللي جنب كلوتي هقوله لا طبعا يا اخ في الشتي زي ما الست فيروز كانت بتقولها ما علينا

انا في الشتا ,,,

, بحس ان في حاجه منه فيا و فيه حاجه مني فيه زي ما نكون قريبيين اوي من بعض حسين ببعض( لا يا ماما لا مش بحكي عن واحد معجب انا بحكي عن الشتا) الشتا في مصر رغم غلاسه الصيف و رخامته , الا ان الشتا في مصر له معني تاني,,,,, حد فيكم حس بجمال انه يمشي في شوارع الكوربه و يجري و هو بيعدي الشارع و الهوا الساقع يلمس خده و تمسك الجاكيت بتاعك و تكرمش نفسك جوا البالطوا الطاويل و الشوارع فاضيه و المحلات منورة, و سكان مصر الجديده القدام ناس عواجييييييز ماشيين حواليك في ايدهم عيش فينو سخن مولع بيطلع بخار ابيض,

حد فيكم حس ايه معني انك تشوف انفاس الناس تحس بانه حر الصيف و صهده بيخرج منهم

حد فيكم شاف اول حد كان حبه و قال انه بيحبه,,, قدامك ,,,هناك ,,,علي الرصيف التاني تحت الشتا و عشان انت جرحته سابك مسالمش عليك

و سعتها حسيت ان برد الشتا ما بردش نار خدودك من الاحراج و الكسفه

و انك كل ما تيجي تعدي نفس الرصيف تفتكره , و يبقي نفسك تقوله يا ريتك كنت تنفع ليا , يا ريتك كنت مناسب و كنت ممكن اوافق علي الحب ده

برد الوحده و نار الحيرة مره واحده في اقال من دقيقه, احساس بانك بتعيد حساب اتقفل من زماااااااان اوي

لما تشوف اللي كان بيحبك ده لسا وحيد و انت كمان,,,,, محدش بيعدي بيكم الشارع و جنبك اتنين تانين ماسكين ايد بعض و بيجروا من البرد و هما بيضحكوا

و انت واقف في لحظة صمت راهيبه نفسك الارض تنشق و تبلعك

و حاسس بان الموقف ده كدر عليك صفو استمتاعك بالبرد

بحب البرد و بحب الشتا اوي و نفسي انسا اني شفتك اليوم ده

Tuesday, December 04, 2007

يالا و خلاص

يا بنتي اوعييييييييييي ألعابي بعيد , يا حبيبتي سيبيني اكتب البوست , يا ماما الناس جت عشان تشوف هقول ايه
يادي النيله علي الغلاسه , العيال الصغيره دي تبته

اهلا

يا حببتي العابي بعيد, يالا يالا اجري
اهلا بكم
استغفر الله سيبي الماوس
اهلا بكم
معلش يا جماعه الاطفال احباب الله
؟؟؟؟؟؟؟؟؟؟؟؟؟؟؟؟؟؟؟؟؟؟؟؟
احممممممممم و ليه الاحراج ده
لا حضرتك دي مش بنتي انا لسه حتي ما اتخطبتش دي بنت عمي عندها 3 سنين
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
اه و الله حتي انا ذاكرة بعض المواقف اللي حصلت لي
؟؟؟؟؟؟؟؟؟؟؟؟؟؟؟؟؟؟؟؟؟؟؟
نعم ,,,,,مش سمعاك كويس
؟؟؟؟؟؟؟؟؟؟؟؟؟
اه الحمد لله انا نجاحت اخيرا في الامتحنات
........................
الله يبارك فيك

انا و الله جيت مخصوص النهارده عشان اسلم علي الناس , بصراحه بقالي فترة مش بكتب , قلت يعني اسلم عليكم
.......................
ربنا يكرمك ده من ذوقك
؟؟؟؟؟؟؟؟؟؟؟؟؟؟؟؟؟؟؟؟
و اجيب الافكار الجديده منين بس عشان اكتبها
بصراحه مره واحده كده بقيت فاترة
؟؟؟؟؟؟؟؟؟؟؟؟؟؟؟؟
لا في كل يوم جديد انا عيني مش بتبطل تبص علي الناس و تحلل تصرفاتهم بس زي ما تقول كده الجديد ما يتكتبش , في حاجه كده ساكعه مالهاش طعم زي ما يكونوا بيرشوا بودرة بواخه في الجو
؟؟؟؟؟؟؟؟؟؟؟؟؟؟؟
لا يا عم انا مش بتكلم في السياسه و انا مالي اللي يحصل يحصل
...............
هيبيعوها,بعوها خلاص يا مشمش, اللي ناقص بس يبيعوا قناة السويس,سعتها و رحمة كل اللي ماتوا فيها و ماتوا عشنها لأخرج و اصوت و ألطم زي اللي مات جوزها في ابعد نجع فيكي يا مصر ,و البس عقد حزون و الرجالة ينزلوا القناة من غير ,,,,, انت عارف ايه, يعوموا فيها
................
شكلي بس اني مفقوعه , لا انا فعلا مفقوعه و حاسه بالم و غيظ بس ساكته , و هفضل ساكته, و هفضل فيها مش هسبها , مش هسافر و امشي مش هخرج منها, هدفن فيها , هغوص في طينها , و اشم زبالتها
؟؟؟؟؟؟؟؟؟؟؟
بتضحك ,,, انت بتقول فيها, اه ادمنت زبالتها و لو عاليا اشلها علي اكتافي و امشي بيها ,بقولك مش هخرج منها قاعده فيها, هشتغل فيها ان شالله كناس , بس هزرع فيها خير, مش هكسر الاشارة , مش هرمي زباله, مش هكون معفنه و بتاعة رشاوي , مش ههد فيها, أبني,أبني زي ما البورسعيديه بنوها تاني, هبني زي ما وقعت كتير و قامت , هخلف عيال, اعلمهم الايمان و الصبر و الاخلاق
؟؟؟؟؟؟؟؟؟؟؟؟؟؟؟؟
لا انا مش بورسعيديه , بس لاقيت ان الناس فيها عايشين بنضافه بلد نضيفه , رغم الضربه اللي حصلت لهم و شغلهم اضرب بس لسه برده فيها, عجبتني الفكرة مش اكتر
.........................
انا لا خالص , انا ماليش دعوة بالسياسه و عمري ما مشيت في مظاهرة بس الحكايه ان كل شئ له حدود و حدودي بصراحه قناة السويس بعدها مافيش شتيمه كله ضرب ههههههههههههههههههه
.........................
اه لسه زي ما انا بتاريق ده طبع مصري اصيل
عموما يالا و خلاص ;)








Wednesday, September 26, 2007

الناس بتسأل دودو فين؟؟

كنتي فين يا هانم؟؟
كنت بأمتحن
و عملتي ايه يا ناصحه؟؟
ابدا نظرا لاني اخدت اسبوع اجازة قبل الامتحانات,و ده الاسبوع اللي ذكرت فيه 8 مواد من النوع التقيل
عكيت طبعا و الفت تاليف في حياتي معملتهوش
يادي المصيبه يعني هتعدي و لا لأ؟؟
انا سيباها علي ربنا
حاسه اني كنت بعمل حاجه كويسه لايمكن ربنا مش هيقف معايا
طب و احوالك ايه دلوقتي؟؟
طبعا الخمستاشر يوم الاجازة طلعوا علي عيني
و مسحوله في الشغل
و الله انت قطعتي قلبي يا دودو ربنا معكي
يارب ياختي يا رب

Tuesday, September 18, 2007


رمضان كريم

Sunday, July 15, 2007

ابو سرة و لغتنا الجميلة

بالرغم من عدم اجادتي و عدم امتلاكي لمفاتيح اللغه , الا اني من متذوقي اللغة و محبيها, و كم اتمني ان تكون بحوزتي جميع ادوات اللغة العربية
و من مميزات اللغة انها تتجسد امامك تراها و تراك, تعبر عنا و نعبر بها, و اري من وجة نظري ان اللغه العربيه تطورت تتطور الانسان
و اذا نظرنا للغة العربيه نجد انها اخذت في التطور و التحور و التشكل و التفشكل حيث نتحدث الان بالغة مفشكله, تجيد التعبير عن التأنتخ و الترنخ و التحور و التكور, و الاقوي من ذلك هو ان تجد كلمة تتجسد امامك و كأن لها عينان و لسان و مناخير و سرة
(ايه سرة,,,,,انتي بتقولي سرة)
نعم سرة
و الكلمه التي تجسدت امامي و وضعتني في حيرة من امري هل اكتب البوست ده هنا و لا اكتبه في جازز علي ضروسي لاني وقتها كنت بجز علي ضروسي و لكن استقر الامر علي البلوج ده
نرجع لمرجعنا
ما هي تلك الكلمة التي لها سرة
هي كلمة
الاباحه
و الاباحة في اللغة اصلها من باح , فباح اي سمح و صهين و كبر و نفض للشئ
و باح يبوح اي باح بالسر و اسم الفاعل منها ابوح
و أبوح يا أبوح كلب العرب مدبوح ,,يا مين ياداويني بالمعلقه الصيني
و خليك بحبوح و ما تبقاش ابوح
و من أباح بالسر اي افصح عنه
و نجد هنا كلمة سر لها من الحروف ما لكلمة سّربتشديد الراء اي احكم الشئ و اطبق عليه فسر الشئ و جعل منه سٌرة مثل سُرة من الدراهم والجمع منها سٌرر
و نظرا لان السرر بقت بتبان في شوارعنا ولبس البنات بيبوح بها, عمل ذلك عل التأثير في بورصه البرتقال ابو سرة
لان الناس بقي عندها اكتفاء سُراري فظيع و من هنا زاد الاقبال علي البرتقال البلدي و ترك البرتقال ابو سرة لعدم مقدرته علي اداء مهامه مثل السُرر اللي في الشوارع كذلك تجد ما لكلمة سرة من الحروف كلمة سرَا من سرور اي فرح و انبسط( الرجل ما ينبسطش يا زينب) و من هنا نجد انه كلما زادت المساحه المباحه من رؤيه السرر زادت السرور و الفرحه
و لذلك قررت الحكومة ان تدخل السرور علي قلب الجماهير و تترك السرر تمشي في الشارع من غير اي رقيب او نذير
و نجد ان السرة هي مربط الحياة حيث تربط السرة الجنين بالام عن طريق الحبل السري يبقي ازاي نترك هذا الجزء العظيم من جسد الانسان دون اي مراعاه لاظهاره و جعله مغمور دون ان نبوح بمكانه لذلك كون بحبوح و لا تسر علي السرة و تأسرها في السرة
طب ايه اللي جاب السيرة ديه
كنت في احد المولات اللطيفه الظريفه و اذ بي اجد ما لا اراه غير في التلفاز و هو عدد اتنين يقال عليهم انثي من النوع اللي بيلبس من غير هدوم و احده تسمي الحية الرقطاء و الثانيه تسمي اخت البعبع
او ممكن نقول هيرا الهة الشر عند الاغريق و كرويلا في فيلم 101 كلب اما بالنسبه للكلبين اللي كانوا معهم فنقدر نقول فهما عبارة عن خنزيرين في شكل كلاب و بيستهبلوا
و الله يا جماعة انا زهلت وبهت و ازبهليت من منظر الاتنين اللي كانوا قاعدين قدامي في الكافية اتنين استغفر الله شكلهم يدعوا الي الرذيله
شئ فاجر بان اتنين ستات يمشوا بالمنظر ده في مول و المفروض بصراحه انهم يتمسكوا بقضيه فعل فاحش بالطريق العام من كتر قلة ادب اللبس اللي لبسينه
حسيت وقتها برغبه رهيبه في اني اقوم اقلع اللي في رجلي و اديهم بيه, و لا تتخيلوا من كتر ما منظرهم حقير كل اللي في الكافيه كان بيبص عليهم بقرف
اضاف لذلك اربع شباب جنبهم كلهم كانوا فتحين بؤهم علي الاخر من هول المنظرو حسيت و بدون مبالغة ان الاولاد الاربعه تحولوا و بقوا الذئاب الاربعه او الكلاب الاربعه كل منهم يحمل ديل و ناب يقطر دماً و علي وشك انهم يعووووا و يقولوا لكرويلا و اختها اكلك منين يا بطه و طبعا لوجود الثورين خرجوا ليبحثوا عن شلة بط تانيه و لحد ما خرجوا من الكافيه كانوا لسه فتحين بؤهم حصل لهم تيبس بئوئي رهيب
تري ماذا افعل انا مش عارفه !!!ماكنتش عارفه ايه بجد اللي اعمله., امرقهم بنظرات مهينه و خلاص طب ما هما شيفين الناس كلها بتبص لهم و مع كل بصه تفه علي وشهم
اتف فعلا عليهم طب ما الحيوانات اللي متشكله بشكل اتنين رجاله دول اعمل فيهم ايه
اطلع علي القسم و اعمل فيهم شكوي هيقولولي انتي عبيطه يا بت
اسنغفر الله
مش عارفه بصراحه كنت اعمل ايه كان هاين عاليا اشتم كل رجل كان قاعد في الكافيه و اقوله اللي في وشك ده شنب و لا وساخه
من كتر الفحشاء او الفشحاء مش مهم ما احنا اتقلب كيانا هنيجي عند دي يعني و نبصلها
توب عليا يا رب و ما نخلنيش انفعل كده
جرسوووووووووووووون
اديني و احد برتقال بس يكون من غير سرة

Monday, June 18, 2007

عودة الندل

غلست كتيييييير و رخمت كتيييييييير و بقي البلوج بتاعي نكد, لكن النهارده هنشوف العجب

قرب يا بيك قربي يا هانم فين الولد الولد الولد لاني مش لاقيه ولا ولد و شكلهم راحوا في الحرب او شكل كوتشنتي من غير ولد اصلا

بصراحه شر البليه ايييييييييه ,,,, ,كلنا عرفينه و للناس اللي بتذاكر البلوج بتاعي هتعرف انه جزء تاني

لمأساه في حياتي:(
قوم ايه بقي .....من فترة كده جت لي رسالة بتقولي انت عارفه الممثله بتاعت فيلم النجمة الساطعه , يحس اني شايفك قصادي
طبعا النمرة كانت غريبه و معرفش هي من مين و اتمنيت طبعا انه يكون حد عدل و قلبي ما بيني و ما بينكم فرح وزغرد و انشكحت علي الاخر بس قعدت اقول مين يا بت يا فوزية مين ما انتي قطعتي رجلهم كلهم يا لوزه بغباءك مييييييين
يا لوزه
مين
مين
و هوووب
جت رساله تانيه وراها مكتوب فيها امضاء
الولد الولعه
http://dodyssilver.blogspot.com/2007/04/blog-post.html

يخرب بيتك
انت تاني انت لسه عايش
اتاري السهوكه اللي بتشر من الرسالة دي غريبه
ده ايه ده بعد 10شهور من الحدثه الاولي

ينهار يا نهار ده ايه ده يا ولاد و ايه اللي حدفه عليناااا اليمه دي اخس علي كيديه, و انا اللي قلت معجب ولا حد عدل يا حظك يا لوزة يا حظك
لكن طبعا نظرا لاني من الناس اللي بتبص للدنيا بان الاشياء اتوجدت مش لمجرد الصدفه, و ان رعاية السماء فوق كل شئ قلت مش يمكن يلوزلوز دي رساله من الرب

اه و ليه لأ!

ايه اللي يخلي واحد بعد الفترة دي كلها يشوف ممثله شبهي في التلفزيون و بعدين نفسه تهفه عليا,,طب ما و الله فكرة يمكن الولد بيحاول يرجع الميه لمجاريها, بس هو فعلا رجع بس في كيس و الموضوع فعلا بقي في المجاري

قوووم هوووب تن تن ,,تن تن,,, ايه ؟؟؟رساله تانية بتقول انا عايز اكلمك علي النت لو سمحتي و عايز اتكلم معكي في حجات كتير
الله !!!ده انا في سري,, الولد ده بقي عايز ايه,, ما بيني و ما بين نفسي في دلع كده و دلال
و الله انت سكر يا مضروب فيك الخير برده اهو عبرتي
قلت طب يا فوزه ده انتي زحلقتيه زوحليقه رهيبه مش يمكن راجع عشان ينتقم
ااااه و بدأ الفار و الاسد و الفيل يلعبوا في عبي حكم- لا لا مش عبي واسع- انا كان نفسي ادخل طب بيطري زمان ما علينا
قلت يا لوزة اسالي تعملي ايه في الورطه دي
قالوا لي توكلي علي الله كلميه شوفي هو عايز ايه
مش يمكن خير
قلت ماشي
و ايه المانع يمكن يكون عقل و هدي و بقي راسي
بدا يتكلم عادي و بعدين شويه و رجع يتكلم كاننا اتخنقنا امبارح
و لا جديد يا اخواني
نفس التشنجات العصبيه
ده غير الافكار المهببه لانه كان هيقع في واحده استغفر الله العظيم
فزي ما تقولوا كده حس ان المعقد مفيش احسن منه


ورجع لكلامه التافه انتي صورتك عامله كده ليه ؟؟هو انت اسمريتي كده ليه؟؟, قالوا البياض احلا و لا السمار احلا؟؟انا بموت في البنات البيض؟؟انت ليه مش بتغيري رابطه الايشارب؟؟ ليه مش بتعملي حركات زي باقي البنات في الايشارب؟؟
,و لا جديد يا اخواني

و انا استني انه يقول موضوع واحد عدل ابدا
من ضمن برده هو انت ليه بتكتبي ادعيه دينيه علي الماسنجر
انت دخلتي جماعه و لا ايه,,,اوعي تلبسي عبايه و يبقي شكلك وحش
ده غير انه كان بيدلعني ما بين كل كلمة و التانيه بطريقه فقع
ده انتي شكلك معقده بقي(ده صوت من بعيد)ب

اه

انا معقده و بحب العقد عايز حاجه ياااااض

لكن انا قررت اني افهمه ان مافيش فايده
و هو طبعا بعزة نفس راح قايل لي انا بس حبيت اعرف اخطائي عشان ماقعش فيها تاني
و حبيت اناقش ده معكي



و طبعا هو كان من وقت لاخر بيحاول انه يستظرف قال ايه دمه خفيف و روحه رياضيه
و انا يا حضرات قاعده مستنيه يمكن يتعدل حاله كان برده عندي امل فيه اهو برده ظل راجل
من ضمن الكلام الخفيف بتاعه
اسمعو و اشهدوا



هو : انا زهقان

انا : خلاص اخرج

لا ما لازم انزل مع حد من اصحابي ,

ليه؟

عشان يمسكني لما اتصدم بالبنات في الشارع , انا لسه راجع من السفر و بقالي فترة ما شفتش بنات لبسين جينز و بودي (ببلاهه)ههههههههههه

يعني انت مش لو كنتي قبلتيني ببودي مش كونا اتجوزنا

يااااااااه تخيلي يا فوزيه كلاكيعوا انت ببدي و و بنطلون برموده و خلخال في رجلك(ببلاهه) ههههههههههه و الله ده كان هيبقي شكل فظيع اوي هههه

انا بقرف : ابدا و الله انت اللي خلاك تفكر فيا اني معقده

هو : اه ما انا ماكنتش هتجوزك انا كنت هعلئك (ببلاهه)هههههههههههههههههههههههههههه


و كل ما اشوف ههههههه دي علي المسنجر افتكر هند رستم و هي بتقول (شبه عم شكاليته ههههههههههههه )في فيلم الستات ما يعرفوش يكدبوا لما كانت طالعه بنت الغساله و جابت عيلين تؤم لشاديه
نفس صوت الضحكه كان في دماغي
طب يا ناس ارد عليه انا اقوله ايه
كل ما اقوله نتكلم جد و في مواضيع عامه يقلبها اما خناق علي المشاكل اللي فاتت او كلام علي البنات الحلوه و الوحشه و الطويلة و القصيرة
طبعا في الاخر رحت قايله له انت قليل الادب و مش محترم اصلا و جبت الوش بتاع فوزيه و لو كان قدامي كنت هضربه يعني هضربه
و مش عايزه اقول لكم ماما عملت فيا ايه يا لاهويييييييي مرار
انتي معقده,, انتي مقرفه... انتي غبيه الخ.......... الخ......... الخ
و للعلم هي ال 10 شهور اللي فاتوا كانوا عبارة عن تعديد متواصل عشان خاطر عنيه
و يستمر العويل و النويح علي الفرص اللي بضيعها من باقي افراد العائله
و نراكم في المسرات








Wednesday, June 13, 2007

رقيه و شمس


تلمع عيناها

تحتد كثيرا لأتفه الاسباب

اعلم ما بها

سوف ترحل

تذهب لبلد ليس بها عبير حبنا

نعم اعلم ذلك يا امي

سوف ترحل رقيه و شمس

الي اميريكا

رقيه بلغت من العمر فوق الخمسين

تخافي ان تذهب بعد ذلك العمر الذي اكتسب لون وجهها بتراب مصر

دون عودة

لا تحزني ارجوكي

سوف نذهب لها

نقضي ليله جميله
لا تخلوا من الضحك الممزوج بالدمع
نخفي جميعا خوفنا من عدم اللقاء بعد الفراق
اما شمس
صغيره
تشعر بالخوف

قالت لي
عارفه يعني ايه تسيبي مكان كل حته فيه ليها معني عندك

شمس صغيره جدا
نظرت لها
انها تجربه جديده
انت صغيرة وسوف تتعلمي من ذلك كثير, اكتسبي الخبرة و اللغه, تعلمي الجديد, اجعلي هناك شغف لمعرفه عوالم اخري غير عالمك الصغير

نظرت لغرفة شمس
كانت تذاكر علي الحائط لغة عربيه و رياضيات و كل المواد الدراسيه
طفلة لاقصي الحدود

جاءت ابنت خالتي
و رحلت قبل ان احضر انا و امي
احتدت امي
و صرخت
لماذا رحلت قبل ان نمضي الليلة معا
كان صوتها يختنق كثيرا و هي تتكلم
لم استطع ترك امي هكذا
قطعت مسافه طويله جدا لاحضار ابنت خالتي
جعلتها مفجأه لشمس
لنقضي معا اخر ليله لرقيه و شمس

كنا خمس نساء
جافي عيونا النوم
جلجلت ضحكاتنا
جلست رقيه ترينا صور من زمان فات
كانت هناك تجلس سيدات اشبه بشادية و عماد حمدي
روت لنا قصص من الماضي
حكت لنا كم كانت مصر جميله
حتي الفجر

دعونا جميعا بان لا نفترق
قالت شمس ضاحكة
هعدي المحيط و شكلنا هنغرق هناك
و السمك ياكلني
طب اقول انا مت ازاي؟؟
اكلني السمك!!


لازلت متيقظه من امس اشعر بتعب شديد
لا اعلم ماذا حدث حتي تلك اللحظه
انهم جميعا في المطار ,اما انا انطلقت لعملي
لازال حضن رقيه و شمس يحتضني
ضمتناني بقوة شديده
لم اجد غير كلمه واحده

استودعكم الله

استودعكم الله

اعلم ان امي سوف تبكي كثيرا
و لكن تلك هي الحياة
شمس ورقيه في قلوبنا
و الفارق ليس بكبير

فقط المحيط

Sunday, June 10, 2007

عيوني

كل ما اروح حته الاقي عيوني بتشوف حاجه جديده
عايشه في مهزلة اسمها التفكير المستمر في كل حاجه و لا اي حاجه و فلسفة الامور طول الوقت و ايجاد اسرار الكون في بعض لقطات لحياتي اليومية
سعات بحس بلذة الم ان دماغك توجعك من التفكير
و سعات بيكون الالم اقوي مني
حبت حجات كده هي صغيره بس عيوني جت عليها
فتاة الشيكولاته
ركبت جنب و احده , هي بنت كلبوزة شويه لكن مش معني اني اكون كلبوزه ان ده يكون شكل وشي:(حسيت ان البنت مرسوم علي وشها العلامه دي,قلت مش مشكله
؟ امال فين المشكله
المشكله يا اخواني ان البنت دي كان معها كيس فيه شيكولاته كتير جد
و دي بقي
فتح و كل
فتح و كل
بحاله هستيريه رهيبه
و اختكم قاعده علي لحم بطنها
بس ايه,,,اوعي,,
طلعت انا بقي قدام ده بونبونايه من شنطتي اي نعم هي كانت نعناع و حرقت قلبي بس برده كان ليا دور في مذبحة الحلويات دي
انا مهتمتش و انتبهت اوي
غير لما البنت خلصت كيس الشكولا و بعد كده راحت جايبه من شنطة تحت رجلها 1/2 كيلو لبن رايب
و افتح وعلي بؤها
و برقع
برقع
برقع
طبعا انا كنت بضحك في سري في الاول بس بعد كده بصيت و قلت ليه البنت دي عندها كل اليائس ده
ايه الحاله دي
للدرجة دي هي و غيرها و غيرها تعبانين
كان نفسي اطبطب عليها و اقولها الحل مش
في اكل الشيكولاته
تامر حسني ارجوك كفايه
بحب اغاني تامر حسني
الا اني بحس انه شخصيه
فقع
ايوه
فقع
انا من البنات القلائل اللي مش بيحبوا سهوكة و سخافة تامر حسني
بصراحه دمه بقي تقيل اوي علي قلبي
رغم ان اغانيه تحفه سبحان الله يعني
بس ارحمونا بقي عشان قرفنا

ايمن نور
رغم اني مش سياسيه و لا حتي بستظرف اللي اسمه ايمن نور اصلا
بس عايزه اقول ده كتير
و كان مفروض يفرجوا عنه لظروفه الصيحه
ملحوظه
لا اعتقد ان السيد تامر حسني افضل منه رغم هروبه من التجنيد


لو كنت شحاته
كانوا اتنين صغيرين اوي
و لد و بنت في الشارع و ملفوفين بحاجه كده مطينه
و الست امهم الشحاته هانم مقعداهم جنبها
بصيت اوي و سالت نفسي
لو كان ربنا حكم عليا باني اكون بنت للست دي
كان ايه الوضع سعتها
و قتها قاعدت احمد ربنا كتييييييييييير اوي
الحمد لله
شجرة الفل
جدتي ليها تاثير فيا كبير اوي
مش عايزه اقول اد ايه هي جميله
في طيبتها و رقتها و قلبها اللي زي الفل
حببتي جدتي بتموت في الزرع
و الورد
اشترت شجرة فل صغيره
و حطتها علي باب الشقه
عشان اول ما ادخل اشفها
حسيت و قتها اد ايه رقيقه
و بتعمل اي حاجه و لو بسيطه عشان تفرحني
ربنا يخليكي ليا يا تيته
و يديكي الصحه