Monday, June 09, 2008

عفوا البوست ده للكبار فقط

ايييييييييييييييييييه و الله و كبرنا و عجزنا و داخلين علي الخمسة و عشرين،،،،ايه ثواني كده 25 لا لا قول كلام غير ده بس انا لسه جوايا بس 19 او قول كمان 16 انا يا حاج من جوا حاسة اني لسه مطلعتش بطاقة

خمممممممسة و عشرين ربع قرن ،،،قرن غزال طبعا ما اللي زيي لازم يكون غزال هي هي هي هي


ايه اللي فكرني بده،،،، هحكلكم

كل ما ارفع دماغي و انا ماشية في الشوارع المصرية اشوف افيش فيلم جديد و مرزوع عليه للكبار فقط،،،الله؟؟؟هو في ايه

هي مصر عدمت عيالها و لا ايه ،،،كله للكبار فقط للكبار فقط اييييييييه ما فيش دم ما فيش احساس بان في اطفال زيي ما ينفعش يدخلوا الافلام دي،،،ده حتي في التعداد المصري العيال عماله تكتر و ليهم حزب الاغلابية يعني احترموهم شوية


و بعدين ايه الهوجة دي ده قضية ان في حوالي تالات افلام مكتوب عليهم للكبار فقط طيب حتي لو مضمونهم كويس مفروض نوصل رسايلنا للجيل جديد برده( ; ،،،،و بعدين هو ايه مدلول للكبار فقط ده؟؟؟؟ يعني ايه؟؟؟؟؟،،،انا شخصيا بحس انها كلمة ابيحة يعني ،،،زي بالظبط لما كنا صغيرين و يقولوا لنا لما تكبر هتعرف ،،،و قتها طبعا بالذكاء الفطري للطفل بعرف علي طول ان في حاجة مش مظبوطه


يعني شعور غريب و الله لما تحس ان كل حاجة بتتفرض عليك يعني تخيلوا معايا كده رجل واخد مراته و عياله و طبعا بالمواصلات و القرف و عقبال ما يوصل للسينما او حتي مجمع سينيمات يلاقي كل الافلام مكتوب عليها للكبار فقط ،،،،طب مش ده اسمه هطل ،،،مش يتحط برده تحت مسمي هبل علي قلة ادب ،،،في ايه يا جدعان


هو الكل بيخنق ليه كده علي ام المواطن المصري،،،،، يعني حتي فكريا،،،كل حاجة بزياده و كل حاجة هتشوفها غصب عن عين اللي جيبينك،،،،هتاخد زياده في المرتب بالعافية فالرجل من دول يقول مش عايز زفت يقولوا له لا هنزودلك الزفت (للعلم الاسم المستعار للمرتب بين الموظفين هو الزفت)هنزودك و هنزود الضرايب علي دماغك


هنخليك ابيح انت و مراتك و عيالك و لازم كل الافلام تكون للكبار فقط او تفضل تتفرج علي التلفزيون العقيم او تشوف الدش المقرف و يجيلك قرف من العيشه اكتر ما انت قرفان


او حتي في موديلات الهدوم كل الهدوم و الايشاربات عبارة عن ساتان يا جدعان احنا في بلد حااااااارة ستان ايه و هباب ايه فين قطن بلدنا

و لا مصيبة الايشارب الستان و اعذروني ان كنت بدخل في تفاصيل فرعية بس اعمل ايه خنقاني

تلاقي الايشارب من دول عامل زي المشمع طبعا بيلمع في عز الظهر و اغلب المصريات و ده انا شفته بعيني سمر فالمعه بتاعت الساتان مع الالوان الفقعه مع شمس الساعة تلاته الظهر و حط معهم طبعا حالة من التلزيق علي وش البنت من دول و فوقها الايشارب السالف ذكر مواصفاته و ده بدوره بيزود عفانة شكل الوش و البنات عادي جدا مشيين بيه ،،،يعني يا موكوسة انت و هي انتم ناقصين توقيف حال ،،،اللهم لا اعتراض بس اقول ايه ما ده المفروض علينا ما فيش غيره


نرجع لموضوع السينما انا بقي كنت ماشية جنب سينما روكسي و لا قيت اسم كده غريب لفيلم،، تقريبا!!! افتكري يا بت يا صوت فيروز افتكري يا صووووووووووووت افتكري

تقريبا ليلة القبض علي الفنلة النص كم !لا لا لا لا كان اسمه غير،،،ليلة القبض علي البت ميرفت بالبيبي دول! ،،،،،لا برده كان غير ،،،، ميرفت اتقبض عليها من غير حاجة خالص ،،،،ليلة طين عليكي يا نعيمة انت و البيبي و الدول،،،لا برده طب الليلة اللي جيبنا فيها بيبي يا دولي برده مش متذكرة

ما علينا اهي كانت ليلة مطينة بطين عليهم في جهنم ان شاء الله


راحت صحبتي بنت انكل كمال قالت لي انا عايزة ادخل الفيلم ده ،،،رحت انا بقي شاهقت شاهقة و خبطت علي صدري و قلت لها يالاهوي بالي يا عيب الشوم تعالا يا انكل كمال شوف اللي بنتك عايزة تعمله

البنت طبعا اتفزعت و قالت لي اييييه في ايييييييه ؟؟؟

قلت لها ده للكبار فقط يا هانم،،،

بصت لي بنص عين و قالت لي و هو مش حضرتك كبار برده و معكي بطاقة

قلت لها بكل فخر ايون معايا قالت لي طب ايه انت نسيتي انك كبرتي علي الكلام ده و لا ايه ولا لسه فاكرة نفسك صغنونه

و من اليوم ده عرفت اني فعلا كبرت و كبرت علتي و ورمت مرارتي من اللي بيحصل فينا

و احب افرحكم انا ممكن اعرف ادخل فيلم للكبار فقط و انتم لاااااا ،،،،تيلا لا لا لام:p

احمدك يا رب انا كبرت



4 comments:

حاسوباتيه said...

ههههههههههههه عندك حق والله كل الافلام للكبار عارفه لو كبار بكسف ادخلها برضو عييييييييب بس انا ليا راي هو للكبار فقط ده لازم يكون مش ولابد ولا ممكن مثلا يكون فيه عنف مثلا او يخوف مثلا ولا هو لازم كده زي ما احنا مش فاهمين او زي ما اتعودنا على كده مش عارفه بصراحه
بالنسبه للستان انا بصراحه عاجباني الطرح الستان دي صحيح مش جبت منهم غير واحده بس لاني مابحبش اكرر حاجه من نفس النوع بس حلوين والله مش وحشين قوي كده حتى تلاقي الدنيا كلها منوره نهار او ليل نمشي بنور ذاتي كده هههههه
تحياتي

LOJAIN said...

اه يا حبيبتى للكبار فقط و سيادتك ان مكنتيش حاسة انك كبرتى تعالى اما اعرفك على ذات الانامل البيضاء تقولك المستخبى
و كبار ولا صغار هى ناقصة فرجة على الفساد يا سنية
على راى المثل :
يا فضايح يام جلاجل , يا جرس ياام حناجل
عليه العوض و منه العوض

Regards:
Lojain :)

حمادة زيدان said...

أزيكم أزيكم أنا جاي أعلق عندكم

صوت فيروز
ياةةةةةةةةةةةةةةةةةةةةةةةةةةةةةةةة

ياريت العالم كله ميكونش فيه غير صوت فيروز ... كان زمان كل العالم مبسوط

سوري دخلت كدة من غير ما أخبط
بس أنا شوفت اسم المدونة جريت أشوف مين صوت فيروز

أنا ممكن تسميني الفيروزي , لأني بالفعل ليل مع نهار , بسمع في فيروز من مسرحيات لأفلام لأغاني ... المهم خلينا في موضوعنا

الكبار فقط
أنا بعتبره مجرد حاجة بتتحط عالأفيش علشان تجذب الناس وخلاص , لأننا شعب وسوري في اللفظ "بريالة" والمننوع عندنا مرغوب مع الاسف ... والمنتجين مصريين وأكيد عارفين طبيعتنا كمصريين يعني هو طبعنا ولا هنشتريه

صوت فيروز said...

hahahaha tab3an d7'alt we la2et7ad tane msh sot fairouz <<<3moman ahlan bek we t3alo zorona or (zrone kol sana mara ;)