دودو و بيل

What Famous Leader Are You?
personality tests by similarminds.com

كر كر كر كر

ده انا

اه انا

'طلع شبهيBill clinton

خرج من مدرستي السياسيه

احنا اتربينا ازاي؟؟؟؟

تعال يا حبيبي

انت مستني يور داد يا عنيا

ياس اي ام

يو كان ستاي ان ماي اوفيس

انت بقي فاكرني يا حبيبي فاكر يوم حفلة السفارة

لما كنت بلعب معاك انت و اخواتك الحلوين

بص بقي

انا مش عندي غير البسكويت ده

بس هو مكسر شوي,,,,,ة

فجاة,,,,,

الواد نتش مني البسكويت

و بزغرة غريبه

تحمل في معناها ,,انتي هتمثلي يا ست انتي

ما تديني البسكويت علي طول

انا عيل و انت اكبر مني و ابويا المدير بتاعك و احنا انجليز و انتي مصرية

اتنيلي علي طول هاتي الهباب البسكوت

او ما كنتيش ادتيني من الاول

امشي عدل و لا اللوع اللي في دم الشرقيين ده علي طول

انا بزهول تداركت الموقف و عديته

بعد كده انت يا حبيبي عايز تطلع ايه

امممممم مش عارف

و في لمحة شاف ابوه ابنننننننن ,,ابوه

لا مش هسيبك غير لما تقولي

اف بقي

هروح اسال داد

طبعا طبعا انتوا مش فاهمين حاجه

انا هفهمكم

بقي القصه دي حصلت مع الواد المزغود في قلبه ابن الريس بتاعي في الشغل

الواد ده انجليزي

بس انجليزي علي حق

جه في يوم عشان كان خارج مع ابوه

المهم يا جماعة انا بشرقيه غريبه و بعفويه شديده

لقيت الواد لايص في الطرقه و مستني ابوه و الريس بتاعي مش في مكتبه

عزمت عليه انه يجي عندي

جدعنه بقي

و طبعا حال اي حد شايف طفل لازم يكرمه ببونبون او شكولا

بس كل اللي كان عندي بكو بسكويت مكسر و حالته زفت

بصراحه بكرم شرقي اصيل ما استخسرتوش في الولد

و حبيت اعمل زي باقي الموظفين و اكون وصوليه

و اتمحلس للمدير

المهم رد فعل الولد الغريب

اني و انا بشرح له ان البسكويت متكسر و اني زعلانه من ده بس العين بصيرة و الايد قصيرة

مع حركة بندول ما بيني و ما بينه

حسيت ان الواد عايز يقولي قصري, و اخد البسكويت من غير حتي مرسي

تعالوا بقي نشوف الحال عندنا احنا كامصريين

بصوا بقي ايه اللي بيحصل

تعالا يا حبيب طنط انت مش فاكرني مع ضحكة خبيثه

لا ياطنط

طبعا الواد من دول مدلدل دماغه لتحت و طنط بتحول ترفعها له و تقريبا رقبته ممكن تتكسر

فاكرني ياحبيبي

خد الشوكولا دي

يجي العيل يمد ايده عشان ياخد الحاجه

و سعتها يكون في موقف من التلاته يحصل

1- ان الست تروح مرجعه ايدها و قايله له مش حديك الشكولا الا لما تديني بوسه

2-او مش هديك الشكولا الا لما تقولي اسمي ايه(و ده اللي حولت اعمله مع ابن الخواجه بس مش نفع

3- ان ام الطفل تروح زغداه او زغراله عشان مايخدش و طبعا في حالة من الجز علي الضروس قول لطنط مرسي و في الحاله دي لو عيل مؤدب بيرجع ايده و لو عيل صايع و لا بيهمه

او لو يا سلام بقي لو دي كانت سلفت الام,,,, يا سيدي

بعد ما العيل ياخد الحاجه تجري ورا اهله بالشبشب ابو ورده

اه يا سافل يا منحط

مش قلت تلك ما تخدش من الوليه العقربه دي حاجه

عايز ولاد عمك يقولوا ايه الواد الشحات ده

و من هنا تغرس الام في الطفل ميول عدوانيه ضد الشكولاته

و يكون اول درس في عدم الصراحه

و اللوع و المجاملات الفاضيه

و طبعا شوفوا الولد بعد الدرس المهم ده

يبقي قدامه الحاجه و لازم يفضل ضاغط علي نفسه

لا يا طنط

مرسي

لااااءءءءءء و طبعا رجليه بتفرك في بعضها

و الست اللي بتديه الشكولاته تبقي فاكرة انه عايز يروح الحمام مثلا

و الواد

شكرااااااااااا يا طننننننط

عينه يا حرام هتطلع علي الحاجه

و يتعلم الولد درسين

انه ازاي يذل اللي قصاده لما يجي يديله حاجه

زي طنط اللي ايدها زي بندول الساعة بتسومه ما بين البوسه و الشكولاته رغم ان ممكن تكون رحتها و حشه و مش عايز يبوسها بس عايز الشكولاته

و ما بين المجاملات الفاضيه و محاولة تغيير الواقع

و كبت الرغبات و عدم القدره علي التعبير و فقد الثقه في ان اللي قدامك مش بيقول الحاجه لوجه الله

و انها مش الحقيقه و ان الناس بوشين

بالرغم من انه طفل

و حقه علي الكبار انه ياخد الشكولاته مع شكر بسيط

و ده اللي كان فهمه ابن الخواجه

و اللي ناتج عن تربية لفهم سن الواحد و متطلباته

و لو انا ما كنتش اديته البسكويت و كان شافه ما كنش الولد اعترض

لانه فاهم برده اني من حقي اني ما ادلوش

معاملة انجليزي ياباشا

لكن ليه احنا بنحاول نزيف الحقيقه

او نعزم عزومة المراكبية زي ما بنقول

موقف تاني افتكرته

لما كنت ماشيه في الشارع و سمعت صوت

طااااخ

طاااااااخ

ما تعيطش

اضربك و ما تعيطش

ده كان بتاع العيش

بيدي درس لابنه في كتم مشاعره

و انه يتضرب و مايعيطش

يقف ساكت

ياخد الالم بدون عياط

عشان طبعا يبقي راجل

انا راضيه حكمكم علي نفسكم و علي الناس دي

و للعلم

الولادين تقريبا كان عندهم 8 سنين

يعني اطفال

مكسر الخشب , و تفاح الجان , و درب سعادة

مش عايزه فتح بؤ و استغراب و علمات تعجب

ايوه,,,,,, مكسر الخشب و تفاح الجان و درب سعادةو كمان المفأجة

مسمط الركيب

لقد همست في اذني :يالا نروح حمام التلات نظرت لها

قائله: اشمعنه يعني, ايه عايزهنا نروح نستحمي هناك, اشمعنا يعني التلات ما كلها ايام ربنا ههههههههههه

قالت: انت كده علي طول مسخره مش باخد منك اي منفعه

طيب ,طيب, ايه ايه هناك في سونة التلات دي؟؟

بيقولوا هناك في حته اسمها كسر الخشب جنبها ,بيبيعوا ادوات المطبخ رخيصه اوي

يخربيت فقرك بتجيبي الحتت دي منين ده انا لما بروح العباسيه بحلف بغربتي

زمايلي في الشغل,,,,هتروحي و لا لأ؟؟؟

طيب ماشي,بس انا مش اعرف السكة و كمان العربيه خربانه نبقي نركنها في جراج الاوبرا , او نروح في الجراج اللي في العتبه

ماشي

المشهد الاول

اركني في جراج العتبه ده هو ,اسمه جراج الموسكي هههههههه

طيب

الدور الاول مافيش

الدور التاني برده مفيش

التالت, الرابع...........

هوب

ايه ده, ده انا بركن و بقول للعربيه ,نخ نخ نخ

هننزل كل ده

قولي هنطلعه تاني كل ده ازاي

طيب

نزلنا

المشهد التاني

الله ايه الجمال ده ايه الريحه دي

مش عارفه بس ريقي جري

يخربيت الريحه الجنان ده ايه ده

و الله ما عارفه و حوالينا مش في اي مطعم

دوري كده يا بنتي

اممممممممممممممم

ايييييييييه ده

هي, تجلس

فلاح عجوز

بيد تكثر بها الثنايات

متعرجه

رسم عليها الزمان خطوطه

امامها حلة ماحشييييييييي كبيييييييييييييره

محشي كرنب

مصفوف في شكل هندسي دائري رائع

تظهر من بين اوراق الكرنب البيضاء الملفوف لوحه فنيه

بجانبها ,هي تلك المراءه العجوز,عدد من الرجال يظهر عليهم التعب و الاعياء , ياكلون يستمتعون بذلك المذاق, مجرد اطباق من اوراق الكراريس

عليها بضع اصابع من الكرنب

بيضاء

لامعه

متألقه في نور الشمس

شمس الظهيره

نظرت لي ,, هي ,ابنت خالتي التي كانت رفيقه تلك المشاهد

انها نظره شيطانيه من عيناها

لا

لا

بقولك لا يمكن علي جثتي

طب مش قادره الريحه تجنن

اه

بس الغسيل المعوي في المستشفي اقوي

و انفجرنا في الضحك

انها الحقيقه جري لعابنا من روعة الرائحه , و التفكير في عمل شئ غير مالوف نوع من انواع المغامرة بالنسبه لاثنان حديثي الخروج من الحضانه

طيب اهو شارع الازهر

طب حمام التلات ده فين

عدي بس عدي

الدنيا زحمه

نبقي نشوف حد نساله

ايه ده بقييييييييييييي

تاني

لأ المره دي الريحه تجنن

ايه يا بنتي

انا هموت من الجوع

ده مسمط

اه

مسسسسسسسسسسسسسسمط

اه

يا مجنونه

لا

يع مش هاكل ابدا

بصي يا عبيطه الناس عليه اد ايه

لا و !!!!!!الله

انا مش بحب الحاجت دي

بصي في مومبار

نعم يا ختي, ييييييييييع

مش انتي يا عبيطه بتاكلي سجق

اه

طب ما ده سجق بس بلدي

لا و الله!!!!!!

يا بنتي الاساس و احد بس الفرق في مكونات الحشو الداخلي

حسستني اني بكلم دكتور سنان , و بطريقه سحريه اقنعتني انها شئ اورينتال و فظيع و انها مغمرة لن يمحوها التاريخ و هتنزل في فيلم موشن امبوسيبل و توم كروز حبيب قلبي ممكن يخترني معه البطله اللي جايه

هو ايه,,,؟؟ بكام ,,, اه المشكل ده؟؟,,, بس انا عايزه و احد مشكل

تاخديييييي يا دودو مشكل-و هي تصيح

لااااااااااااااااااااااا

في سري ارحمي اللي جيبني

مونباااااااااااااااار

السجق البلدي يا نصحه-انا اصيح

انا ببلاهه شديده هو سبايسي يا عم؟؟؟؟؟

كنت هتضرب , و بايه,,, بالسطور

يخرب عقلك ده فيه شطه (انا و انا بشن)يييييييييييح

عندي حسساسيه منها و البتاع ده مولع

هي منفجره في الضحك هههههههههههههههههههه

تشعر بفوزها بما فعلته بي

خدي رشي البرفيوم ده

و الله!!!! بعد العملة اللي عملتيها

يايييييييي استريحت

طيب لما نشوف اللي هيجرلنا

بصي بصي

ايه

مسجد القاضي يحي زين الدين-انا اقراء اللوحه

ده حلو اوي

طب تعالي تعالي

ايه تاني

ده محل العطار ده كبير اوي

طيب

دخلت لتلك الرائحه , مجموعه مخطلته من البهارات و الاعشاب العطريه

هو اليوم كله كده

مناخيري باظت

قائمه طويله جدا

بعلو حوائط المحل, تفاح الجان, و خلطة الانبياء, و بردقوش ,ما ابصر ايه و ما ادرك ايه

يا بنتي تعالي نطلع من هنا

لييييييييه

هنتسخط

هن ايييييه

هنتسخط,,, هنتحول ,,هههههههههههههههه

خدي الكمون اللي عايزاه و اجري يالا

هههههههههههههههههه

اهو

كسر الخشب

يفطه كبيره

درب سعاده

مشاعر مش قادره اوصفها

ما بين الجامع الكبير و عبق التاريخ المصري, و بناء الاجداد

و ما بين صنع في الصين

ده ايطالي يا هانم

ده تركي و احسن حاجه يا انسه ده مش بيلسع الاكل

لا حول و لا قوة الا بالله

اليد الوحيده اللي شفتها

كانت بتعمل بس محشي

و ايادي اخري لناس ماتوا

النهارده مفيش ايادي

بترت ايدينا ام عقولنا سلبت منا

لا لا ده هنا مش حلو

عايزه اروح, تعبت

لا , لا و النبي

يا انسه لو مش عجبك في مول درب سعادة

احنا في نفس و احد

مووووووووول

هو فين يا عم

قدام شويه علي اليمين

امام المول

شرابيه صغيره

تكسرت منها عقل الارابيسك

تركت بها فجوات

لا اعلم ماذا حدث لي عند رؤيتها

لقد ذهبت لبيت السحيمي من قبل

انه مشهد ليس بجديد

لكنها الشرفه الوحيده الباقيه

امام عمل خرساني كبير يسمي غول درب سعاده و ليس مول درب سعادة

اعتقد ان تلك الفجوات جعلتني اتذكر ما بداخلي

لكنها لاتزال فجوات صغيره

و الشرفه كبيره

و الحراملك انتهي

لكن قد ياتي في جينات قد ورثناها

حمام التلات احسن خلاص نروح

و بالفعل تمت المهمه بسلام

و عدنا, هي تحمل طقم من الاستانليستيل

و انا احمل هذا كله لكم

ملحوظه ماتزعلوش مني, انا غريبه اليومين دول

قرفانه

عندي حالة من القرف مش عايزه اكتب, بعيد اوراقي و حسباتي, بحاول اشوف حالة التوهان دي اخرتها ايه, بشتغل زي الحمارة مش بقف , و مش باخد اجازه, و لو في اجازه بروح اقضي مشاوير, و اروح الكلية عشان الدرسات السفليا او العليا اللي بعملها, و لو مش بذاكر بروح كورس الانجليزي, تحولت لاله, كل اللي بعمله اني لما بتخنق بهرج بشكل هستيري و خلاص بدل ما اعيط

بكره اعيط قدام حد

كمان عايزه اعرف انا بكتب المدونه دي ليه؟؟؟؟

ايه اللي قدمته فيها؟؟

ايه الجديد

مجرد بعض المواقف

ايه اللي عملته للناس اللي بيقروا ليا؟؟؟

و لا حاجه

حاسه اني ما اضفتش جديد

طول عمري في ناس بتستريح لمجرد الكلام معايا

و قتها بحس اني عملت حاجه

بس ياتري انا عملت ليكم ايه جديد؟؟؟

انا مش معاهم

اخباركم يا جماعه

بصراحه بعد ما دخلت و شفت اللي حصلي عند برايد و التعليقات الغريبه , ده بالاضافه لان الاخوان المسلمين اهدروا دمي, انا فضلت اني اكتب عن التاني هنا في بيتي انا ,مش في بيت حد تاني

و من خرج من داره اتقل مقداره

و انا مش مع الاخوان و لا مع عبدة الشيطان ( انا مش معاهم مش مع حد معين

اهوه بسم الله

فوزيه تقول :اه يا واد يا ولعه
اهلا بكم
و ده علي طريقه حمدي قنديل و اللي عايزه صوته يبقي في دماغكم (ده مخصوص عشان برايد) و انتم بتقروا البوست ده
في منشط بيقول ( جواز فوزيه باطل من الواد الولعة) ده منشيط في جريدة يامه القمر علي الباب
(فوزيه لا تستطيع تحمل الهجوم القائم من الواد الولعة) ده منشيط من جريدة ما تجوزيني يا ماما
اما عن مجلة خد نص الدنيا و سيبك من النص التاني (فوزيه تعتصم و تضرب عن الجواز من الواد الولعه)


بصراحه يا جماعه انتم فتحتوا نفسي جدا علي الكتابه بجد و طبعا انا هكمل لكم باقي طقم العرسان الحلوين , بس بجد العريس ده كان حلو جدا جدا جدا
اه كان حلو جدا جدا جدا
طب ليه يا منيله ما اتجوزتوش(ده صوت حد بيقول )
ما اصل ده كان في الاول بس
طب و ايه اللي حصل يا موكوسه
اللي حصل ما حصلش لحد ابد (عاااااااااااااااا)

هحكلكم
اولا احب اعرفكم بنفسي بس بصوره جديده انا امثل البنت فوزيه في مسرحية سك علي بناتك ده حقيقي
فوزيه اللي جواها مشاعر لكن مش بتعرف تطلعها و لا تقولها و لا تجذب حد ليها
و اللي قالها ابوها ( سبيه يمسك ايدك يا فوزيه) بس هي قالت ( قال ايه بيعديني)
و اللي لازم تقعد و قت طويل عشان يدوب التلج اللي ما بينها و ما بين اللي هترتبط بيه
ممكن اكون مع الناس عاديه جدا لكن انا في الموضوع ده خيبه و عشان احس بحد لازم و قت و صبر من الطرف الاخر
و ده حال بنات كتير من اللي بيتعاملوا مع المجتمع بوش خشب عشان يحافظوا علي نفسهم
و بنات كتير هيفهموا قصدي ايه

تبدا القصه
باتصال طنط من طنتاتي الكتير و قالت لماما ده انا عندي عريس لقطه لفوزيه

و كان برده المحروس مهندس
ماما قالت لي يالا يا لوزه عشان نشوف العريس
طبعا كالعاده كنت رايحه و مضروبه ميت جزمه قديمه لاني عارفه اللي فيها
المره دي شفت العريس برده في العربيه و هو بيركن لكن المره دي كان حجمه معقول اوي
كل اللي شفته بس زلحه بسيطه لكن الواد بصراحه كان
قمر و صغنن كده و حليوه و مهندس و عنده عربيه و شقه 180 متر و نظيف ( مش نظيف اللي في دماغكم) اصل انا بحب الناس اللي النظافه باينه عليهم اوي اوي ,و كلام في سركم انا اكتر حاجه بتجذبني في الرجل
سنانه
( هو انت مره ركب و مره سنان ارسي لك علي رجل)
اه سنانه ما تستغربوش
لازم تكون مغسوله و حلوه كده
و بعدين انا حسيت في اول كلمتين انه كده طفل زي هشام عباس يا اختشي كاميله و كمان عاقل يعني مش اهبل و لا بلبانه زي ما ناس بتقول
قمر قمر قمر
ياحلولي و الله يا بت يا لوزه الدنيا احلوت و ضحكت لك و هتتجوزي قبل 31 الحمد لله

اعدنا كالعادة في النادي و انا و هو قاعدنا في كرسيين قريبين من بعض و فضلنا نتكلم المهم كلام بيجيب كلام و حديث يجيب التاني
لكن انا مشكلتي بتكلم بعفويه شديده جدا و لما بتكسف بقلب الموضوع تهريج
و هو كان بيضايق اوي اني مش و اخده الموضوع بشكل من الرومانسيه و اني بتكلم عادي جدا و ده حقيقي , هو انا كنت شفته فين عشان ابقي رومنسيه معه حلت امه ده
ما كنتش عارفه اقوله ايه و قتها بس جه سؤال ساذج علي بالي( مع فتحت بؤ زي سليمان باشا) و ده من ضمن الغباء و قلة الخبره الا قولي يا و له هو انت ايه المواصفات اللي انت عايزها في البت اللي هتتجوزها
قالي اهم حاجه – مع تسبيله غريبه( في اول مقبله كانت ممكن تيجي التسبيله دي في تاني مقبله يعني), و بحة صوت كده مع نبره غاريبه سهوكه علي الاخر –
انها تكون جميلة و انثي (انصة الفرخه)و رومانسيه و حساسه و دمها خفيف
كع كع كع كع كع كع ده انا
ما قدرتش امسك نفسي من الضحك ايه الدخله الغريبه دي
زي ما يكون و اد من اياهم ماسك بنت عند مول الزعفران و بيشتغلها
بصلي و قالي انت بتضحكي ليه قلت له : ابدا و معرفتش ارد اقول ايه (لكن في سري ايه ده و جي تتجوزني انا رومانسيه و ورده و شمعه و حساسه و مسهوكه كل ده اوت بس هو قال دمها خفيف حلوه دي في الجون)
سكت
قالي : يعني انا لو قلت للك و حشتيني هتضحكي –وحشتيني هو احنا يا ابني اتقبلنا قبل كده, برده يا جماعه بنفس السهوكه و بحة الصوت انا بصراحه اتخضيت
و كنت هقوله مالك يا و اد انت انت بتعمل كده ليه
المهم رحت اشرب لاني طبعا كنت في حاله منيله بسبب سهوكته الفظيعه و قالوا يالا نمشي و بتاع رجعت لاقيته بيكلم نفسه و وشه مقلوب لان الكلمتين دول كانوا في اخر الاقعده و الظاهر زعلوه لاني ما كنتش متجوبه مع مشاعره اللي طلعت مره و احده في نص ساعه( الواد الولعه بقي)

معلش
دي مشاعر و احاسيس ممكن ربنا حط في قلبه ده من اول نظره ده انا بعد المقبله

لكن اللي بعد كده ٌمر, ٌمر يا جماعه و بزيادة كمان

تاني مقبله و بعد ما اتكلمنا شويه و لقيته بيقرب مني و بيقولي انتي تجنني
طب الحمد لله ده انا , و طبعا كنت بحاول اتكلم في مواضيع غير السهوكه
وفهمته بمنتهي الادب اني من البنات اللي مشاعرها بتيجي بالراحه و اني من النوع اللي بيفكر الاول و بعد كده بيحب بس لما بيحب بيحب اوي

تالت مقابله و اللي و قتها كنت ببوس علي ايد بابا عشان يشوفه و طبعا بابا كان حاسس اني موافقه و ده غير العاده و ده طبعا مش بيفرح اي اب زي ما بيقولوا في الافلام
لانه معني جواز بنته يعني هم و غم وهدت حيل و دفع فلوس ده بالاضافه لانه يربي يربي و بعد كده يديها لواحد و يا يطلع عدل يا ما يطلعش حاجه خالص
و طبعا لان المقبله كانت مع بابا فكان ليها اهميه و لازم اننا نظبط كل التفاصيل عشان بابا ما يتلككش

المهم سئلني المحروس البس ايه؟؟ انا احتمال كبير البس بدله .قلت له و ليه العقد دي ممكن تلبس قميص و بنطلون عادي خالص روش و كده
قالي طب انت هتلبسي ايه؟؟ قلت له هلبس جينز وشميز(كانت و الله غاليه موت كتان فرنساوي ) , قالي اااااااااه انا بموت في الجينز علي البنات يجنن –اييييه ده بقي-
كمان مع بادي يا عيييييييييييني
نعم يا روح خلتك
انا البس بنطلون جينز و عليه بادي
قالي ده يجنن لو لبستيه , قلت له لأ خالص ده انا لما بلبسه لازم تبقي علي حاجه طويله
ما بيني و ما بينكم قلت دي حركه قديمه بيعملوها الولاد اختبار يعني عشان يعرفوا اخلاق البنت (كده و كده يميم يم)
طنشت

بعد كده لقيته انه عايزني طول الوقت عباره عن فتاة اعلانات و طول الوقت بيحكي علي انه عايز انثي متوهجة الانوثه (استغفر الله) انا ما عنديش مانع بس مش بعد تلت مقابلات و مرتين كلام في التليفون ده غير اننا لازم نعرف بعض و المشاعر هتيجي لوحدها

المهم انا فضلت احاول اقنع فيه و اقوله اني مش هحبه بالطريقه دي و انه لازم يشوف الجوانب التانيه اللي فيا مش مجرد ان شكلي كويس
صدمني كذا مره بافكاره منها ( ان الزوج او الزوجة ممكن ينحرفوا لو مسمعوش كلام حلو كتير , و انه كان ليه اصحاب بيكلموا ستات متجوزين)
و كان ردي ان الموضوع اخلاقي بحت و ان مش مبرر انك تنحرف لاني مش مدياك حنان و حب- الرك علي الاصل-
غيره
( انه عمره ما خرج مع بنت الا لما كان بيبقي عارف انه هيمسك اديها, ازاي انا بقي مش عايزاه يمسك ايدي !!!– للعلم اننا حتي ما قريناش فاتحه)
غيره
(انت ليه ما حولتش تدور علي دكتوره و لا مهندسه زيك ؟؟ ده انا بنوع من التهريج مش قاصدي حاجه......اصل دول معقدين -ده هو- و زي الرجاله معانا و انا شغلي صعب و عايز اتدلع و اعيش حياتي مش عايز واحده تقعد تفكر كتير كفايه انا بفكر و طول عمري بضغط علي نفسي عشان المذاكره و الشغل)
غيره
(انا احب مراتي تبقي حلوه و الناس كلها تعرف اني متجوز و احده حلوه , و كلهم يبصوا عليها و علي جمالها و شيكتها , ليه؟؟ لان ده بيحسس الواحد انه معه حاجه الناس كلها بتحسده عليها )
غيره
(انا بنرفزه: انت ليه مش قادر تشوف الطفله اللي جوايا دي اجمل حاجه فيا , بامتعاض شديد رد ابقي اخلف بت و اربيها علي مزاجي)
علي فكره الموضوع ما اخدش اكتر من 3 اسابيع و 3 مقبلات منهم و احده كانت مع بابا يعني مافيش اي ارتباط تقريبا
سئلت الناس المخضرمين ( و اسئلوا اهل الذكر)قالوا لي ده عبييييييط يا هبله و بيرسم نفسه عليكي و ما صعش و لا حاجه هو الصايع بيقول علي نفسه صايع , انتي عبيطه
صدقت كلامهم , بس كانت عندي حاله من القرف من كتر ما حسيت انه متصنع جدا في مشاعره بسبب الافكار الزبالة اللي في دماغه
كلمته في يوم و صالحته و قلت له بجد انا عايزاك تعرف اني مبسوطه ان ربنا هدانا لبعض و اني لازم اصون ده و اني بحمد ربنا كتير علي اننا عرفنا بعض عشان ربنا يسهل الموضوع و نبقي مع ربنا اوي- كان مش عاجبه الكلام- بس بقينا حلوين و اقتنع بكلامي و اننا نمشي خطوه خطوه
في اخر المكالمه
قلت له طب تحب اجيب لك ايه في عيد ميلادك
قالي هاتي بدي احمر و البسيه و قبليني
يا لاهوويييييييييييييييييييييييييي
الله يخربيت الصراصير اللي في دماغك

مش هحكي انا ازاي نهيت الموضوع ده بس عايزه اقولكم
اني بجد اتعقدت جدا و ما كنش ده بس اللي فيه مضايقني, لا, ده كان عصبي جدا و قلوق اوي
و الاغرب اني لقيت الدنيا مش بتدي كل حاجه بالرغم من انه عريس مثالي و مواصفاته كانت تحفه بالنسبه ليا لكن افكاره كانت غريبه جدا
و ان النصيب ده بجد هو اللي في الاخر بيلعب دور كبير
طبعا عايزه اقولكم ان ماما لحد دلوقتي بتتحسر عليه و بتقولي اني ماليش في الطيب نصيب كالعاده

اللهم اعف بنات و شباب المسلمين قولوا امين