حمارتك العارجه ........تغنيك عن ركوب الاوتوبيس

اهلا بكم

النهارده اول ما دخلت من بابا الشغل وقبل ما حد يطلب مني حاجه و كبايه الكبتشينو(يا سونه) سيد عملها و الله ما حطتها علي بؤي قلت اكتب اللي حصلي امبارح

ااااااااااااااااه من اللي حصل امبارح بتحضرني الان الست اصاله و هي بتغني علي ال جري و متشحتفه علي الاخر و بتشن وتمسح.....دموعها-دموعها ماتفهموش غلط-في كمها, والله اللي حصل امبارح كان مفروض يتعمل في فيلم أكشن

ما علينا, طلعت من الشغل الساعه 5:30 تقريبا عشان اخد ميكروباص لحد مترو الانفلق و استغفر الله و لا واحد

راضي يروح عند المترو لدرجة اني من طول الوقت اللي الناس قعدين فيه علي المحطه مستنين المواصلات حصل ما

بينهم عشره و بقوا يكلموا بعض و يشكوا همهم لهم بعض

,

المهم , مالقتش قدامي غير ميني بص الاخضر ده ابو جنيه ركبت( عاااااااا, و يارتني ما ركبت عاااااا), ايه ده حرام كده

الاول لما طلعت ماكنتش لاقيه حاجه امسك فيها عشان ماقعش فبقيت بألوش اللي امسك في كم جكتته و تبقي هتطلع في ايدي و اللي امسك في بنطلونه و برده كان هيطلع في ايدي و اللي اهبشه من صدر قميصه , يعني حاجه في منتهي قله الادب بصراحه قعدت استغفر ربنا علي اليوم ده طول الليل, و بعدين اختكم قصيره( اؤزعه) مش باينه من الارض رحت مسكت في المصوره اللي فوق دي ويا رب ما اشوف ده في حد غالي ,كنت عامله زي القرد ميمون فوق الشجرة كنت حاسه ان الناس اللي بره الاتوبيس عايزين يحدفولي سوداني, عارفين متعلقه في المصوره رجلي بالعفيه و صله للارض و سعات ما كانتش بتوصل زي اللي بيلعبوا عقله تخيلوا

, شويه وايدي وجعتني, رحت منزلاهم وطبعا الرجاله و الحمد لله محوطني من كل جنب كنت بمووووووووت خلاص كنت عامله زي ورقة النعناع في كبايه شاي و اتقلبت و الورقه بتلف حولين نفسها و خايفه تخبط في حرف الكبايه..

وبعدين انا طبعا واقفه لقيت الاخ اللي قاعد علي الكرسي قدامي نام, اااااه يا واطي لك نفس كمان تنام , و المحروس نام تقلوش في حضن امه و راح مريح عليا _يا اخ يا عم قوم_يا نهار اسود ايييييييه ده الواد مستريح نام خلاص و متكيف شويه شويه يقولي غطيني و النبي _ انا بقي عايزه ارزعه علي قفاه قلم بس اعمل ايه _يا حماده قوم بابا جاب جوافه, الجوافه هتبرد يا واااااااااااد , و الله الكلمه دي كانت علي لساني خلاص

يا حماده قوم عشان نازلين المحطه الجيه, وحماده يا اخواني ولا هو هنا قتيل لحد ما في واحد راح قاله فوق يا أخ بس لما فاق كنت انا نزلت تقريبا مش هحكي علي بقيت المواصلات اللي ركبتها اصل انا ركبت المترو وبعد كده ميكروباص- اااااااااااااااه حسبي الله ونعم الوكيل -

النهارده رحت الشغل بعربيتي اي نعم هي حالتها كرب بس حمارتك العارجه تغنيك عن ركوب الاتوبيس

و نراكم في المسرات....................

مغامره علي الطريق.....لم لم لم لم لم

طبعا كلكم عايزين تعرفوا ايه لم لم لم لم دي , دي الموسيقه التصويريه للأحداث المهببه اللي بشوفها كل يوم وانا رايحه او جايه من الشغل اللي طبعا بياخد مني وقت حوالي ساعه وربع بالتقريب , سواء كنت سايقه او رايحه عن طريق الافيال ..........اسفه الميكروباص -علي طريقة هنيدي- و من وحي اليكروباص لقيت نفسي بدندن واقول:

يا ميكروباص حياتي يا كلاكس فشيتي........

ماتدوسش علي الفرامل فجأه قلبت معدتي.........

هزتلي فقره فقره يا خرابي يا ركبتي

و ده طبعا يا جماعه من اثر المخمضه و البهدله و الرجرجه اللي بشوفها كل يوم بحس اني جوه غساله فول اتوماتيك في العصره الاخيره ساعت الشطف (اللي عنده غساله يعرف معني الكلام ده) و الله بحس انها حركه لولبيه ولا الست في في و الا الست كيتي حتي في زمنها تعرف تعملها, و كل اللي في الميكروباص بيتشخلع من كتر الهز و الفرامل و الغرز اللي بيخدها

و ياعيني علي الناس اللي عندها سكر و بتتزنق كتير يا سلام السواقيين بيخلوا اعصبهم تبوظ زياده ويهوروا علي نفسهم , و لا حتي بتوع السكر بس ده كل الناس, و بتوع الضغط , اه علي بتوع الضغط اللي ضغطه عالي يعلا زياده و اللي ضغطه واطي يوطه زياده( مرمطه), و لا كمان طريق الشغل بتاعي يا نهااااااار ربنا ما يوري حد طريق الاتوستراد استغفر الله مرمطه سحل وربنا ولا يا سلام علي الفوعليه اللي بيركبو معايا , يا عيني, و كل واحد بيحكي حكايه مع كمان صوت الفونتكس بتاعهم يا سيدي, منتهي الموسيقه عزف صولو منفرد ليس له مثيل. ديك النهار _و فرخة بليل _( ما علينا )كنت قاعده واتنين عمال ورايا وبعدين و احد قال للتاني انت بس بتودي فلوسك فين راح رد عليه وقال له يا عيماتش -ايييييه عيماتش سعتها كان هيغمي عليا من الضحك- ده انا بااكل باربعه جنيه و المواصلاتش و طبعا ماتنسوش ان اي تيه بيقبلها بتبقي مشكله

و غيره و غيره بس انا دلوقتي في الشغل ولازم امشي عشان اشتغل و بكره اكمل باقي المغامرات..................

نلقاكم غدا ان شاء الله