Saturday, August 21, 2010

باقي بوست ...البحر غضبان مابيضحكش

أبدا منين منين ؟؟
خليني أبدا من الاول .....انا مش بقلد غادة هنا و لا بعيد قصص جواز فاشلة ...و لا هتريق علي حد زي ما ضحكت ناس قبل كده علي المصايب اللي حصلت لي
انا مابقيتشي بضحك
خلاص الضحك خلص
عايزة برده تسمعوا الاغنية مع البوست ده
الحكاية انا من قترة قرر حد من اصدقائي المقربين ليا انه يجوزني ...الشخص صديق عارف كويس انا ايه و اخلاقي ايه و دماغي ايه
قالي انا عندي فلان ..بجد ده اللي انت عايزه ترتبطي بيه ...و سيبك بقي من حوار الصلونات و كده و المعارف و الستات القرشانات ...كفاية بقي انت اتبهدلتي كتير ..هو ده و اسمعي كلامي

كنت متردده جدا ...لاني تعبت ...خلاص تعبت ..مفيش امل جوايا خلاص
لكن سبحان الله اللي بيكون عنده مرض خطير و خلاص بيخلص ...لما بيسمع ان في وصفة و لو في بلاد الواك واك هتشفيه ...و لو حتي كانت وصفة بلدي ولبخة علي صدرة و حجاب يعدي فوقه سبع مرات ...بيروح برده يجري ورا العلاج

و انا ايام كتير جريت ...مجاتشي علي دي بس المره دي قاعده ومقابله غير العشريين اللي قبل كده ...ده حد جاي عن طريق صديق للطرفيين ...و قاعده شباب ...انا و صديقي و خطبته و العريس
شفته و شافني و كلمني و كلمته
عايزة بقي تسمعوا الحوار

هو :انت ...انت ...انت عبارة عن ألماظاية ...انت مافيش زيك اصلا
انا : معلش انا محرجة و مش عارفه اتكلم اصل انا اول مره اتحط في موقف زي ده و تكون ماما مش معايا
هو : يا بنتي ده لو كل البنات بتفكر زيك كده كانت مشكلة الجواز اتحلت
أنا : هو انت كنت فيين النهارده
هو : باخد كورس في المعهد البريطاني ...انا كمان عايزك تعملي كده عشان ان شاء الله ان شاء الله لو بقيتي نصيبي ..و لما نقدم للهجرة و نعمل الامتحان نبقي مستعدين

و بعد كام يوم رغي في التليفون
انا :ها بقي انت كلمت مامتك ...انا بحب الاهل يبقوا عارفيين كل حاجة
هو : و الله لسه اصل ماما ست كبيرة و بتزن كتير و انا بحب الموضوع ده افكر فيه بدون ضغط
انا : لا بقي ...لا بقي ...لا بقي انت مش جاد
هو :ايييييييييييييييييييييه ...مش جاد مش جاد ازاي ...انتي ازاي بتقولي كده أزاي أزاي أزاي

و طبعا خلع
و خلع بدون سبب ...بس اللي حسيت بيه انه حاسس اني مش روشه و كوول و مش بت كده جامده و لافه و دايرة و مربع كمان ...خام ..هبله و مش مدردحه كده


معداش كتير شهر تقريبا

و جالي واحد تاني من صديقه ...رحت و اتقبلنا في الشغل ...حد غاية في الاخلاق ...
قرر البيه التاني المحترم انه يكلمني بعد ما قعد معايا ربع ساعه ...و ده عشان نحدد ميعاد نتقابل فيه الامهات مع بعض و كده بقي انتم فاهميين
يوم ما كلمني في التليفون كان بيقولي حضرتك حضرتك حضرتك ...الرجل محترم و فعلا باين عليه الاحترام
و في وسط الكلام حبيت اعرف منه بعض التفاصيل عشان لما اقول للبيت

انا : هو انت ارتبطت قبل كده
هو : اه ...و قبل ما اتجوز ب 15 يوم جالي البوكس و اخدني ...امن دولة ....خدوني غلط اشتباه
( أنا جالي صرع طبعا ...بس و الله وارد في بلدنا المصونة ان أمن الدولة يجي لمجرد الاشتباه فيك و يخدك المعتقل و يعمل خرم في حياتك الي يوم الدين ...عادي اوي )
أنا : ليه كده ...ليه ...ليه يا بابا كده ليه ؟؟؟
هو : من فضلك .....من فضلك ...نتكلم باحتشام مع بعض ...
انا : نعم!!!
نعم!!!
أحتشااااااااااااااااام
ازاي حضرتك يعني؟؟
هوانا مش محتشمة؟؟

هو : لا بس ايه يا بابا دي؟ ....انا عارف انها عفوية منك ...لكن ارجوكي لازم يكون في حدود في الفترة دي

و الله العظيم كنت هقوله ملعون ابو خاشك
بس مرضتشي عشان الوسطه حبيبتي .....كنت هقفل السكة بس مسكت نفسي و هزقته بالراحة
و بعد ساعه من محاضرة عصماء عن الشيخ الغزالي و التابعيين

البيه عايز واحده تقعد في البيت و تلبس لبس محتشم برده ...و يكون عملها ما بين البيت و الاستزاده في الدين (فقط)

انا مش هعلق علي البوست ده ...و لا هحلل اللي حصل انا هسيبكم شوية و اسمع رايكم ...و ما تنسوش انا بطلت ضحك خلاص
معلومه
الاتنين مهندسيين ...الاتنين عندهم 30 سنة الاتنين ولاد ناس جدا ...الاتنين معهم حالتهم المادية كويسه ...الاتنين شكلهم مقبول
حد يقولي انا لسه في مصر و لا في حته تانية عشان انا تعبت


Wednesday, August 18, 2010

البحر غضبان مابيضحكش



عايزة اللي يقرا الكلام ده يسمع الاغنية معه ....البوست ده مش ههرج فيه زي الاول و لا حضحك و اتريق ...خلاص ماعدشي فيه قدرة علي المرور فوق المواقف بالضحك و السخرية

مشكلتي لسه زي ما هي ...انا مع ميين انا مع اهل الخطوة و الحاضرة و السنة و التدين و الالتزام و لا مع أهل الكافيهات و الفيس بوك و الفريندز و الكوول و الجونة و السفر عشان اجيب شوبينج

مش هعمل زي غادة عبد العال و أقول انا عايزة اتجوز و ابدا اتضحك زي زمان ...مش قادرة...خلاص (البحر غضبان مابيضحكش أصل الحكاية ماتضحكش

خلاص مش قادرة اضحك

هبقي احكي في البوست اللي جاي كل اللي حصل

و دي كلمات الاغنية اسمعوها كويس

اسمعوها من الشيخ امام ...الكلمات نجيب سرور
البحر بيضحك ليه
وانا نازله ادلع املا القلل

البحر غضبان ما بيضحكش
أصل الحكاية ما تضحكش
البحر جرحه ما بيدبلش
وجرحنا ولا عمره دبل
والبحر بيضحك ليه
وانا نازله ادلع املا القلل

مساكين بنضحك من البلوة
زي الديوك و الروح حلوة
سارقاها من السكين حموة
و لسة جوا القلب أمل
والبحر بيضحك ليه
وانا نازله ادلع املا القلل

قللنا فخارها إناوي
بتقول حكاوي و غناوي
يا قلة الذل أنا ناوي
ما شرب و لو في المية عسل

والبحر بيضحك ليه
وانا نازله ادلع املا القلل

ياما ملينا وملينا
لغيرنا وعطشنا ساقينا
صابرين وبحر ما يروينا
شايلين بدال العلة علل
والبحر بيضحك ليه
وانا نازله ادلع املا القلل

في بالي ياما وعلى بالي
واللي بيعشق ما يبالي
ما يهمنيش من عزالي
يا حلوة لو مرسالي وصل
والبحر بيضحك ليه
وانا نازله ادلع املا القلل

بيني وبينك سور ورا سور
وانا لا مارد ولا عصفور
في إيدي عود قوال وجسور
وصبحت انا في العشق مثل
والبحر بيضحك ليه
وانا نازله ادلع املا القلل