Tuesday, February 19, 2008

ساعدوني يا اخواني ربنا ما يوقعكم في مشكلة بلوجيه


بصوا يا جدعان ,,,الاخت صوت فيروز اللي هو انا ,,, بتموت في الكرتوون و في شخصيه كرتونيه انا الفتها و صممتها و عايزه اكتب حلقات عنها,,,لكن القرار صعب و مش عارفه اخده و لا لأ سعدوني يا ولاد البلوجات الحلال امشي في الموضوع ده و لا لأ




اسم الشخصيه :علي الله بنت حسب الله



السن :بتاع عشرسنين كده



البلد: مصر حته مش معروفه قرية كوم يجبر الله



ودي صورة الشخصيه


مش حلوه و النبي ,,,عموما انا اللي راسمه الشخصيه و انا الوحيده اللي ليا الحقوق الشرعيه في نشر و تاليف و تفنين هذه الشخصيه و اللي يسرقها هطلع عينه و البسه قضيه و هفجره انتم احرار

ردوا عليا و النبي

17 comments:

كلبوزة لكن سمباتيك said...

الصورة مش ظاهرة يا فيرو

صوت فيروز said...

انا حطتها تاني اهوه يارب تكون ظهرت

اسكندراني في الغربة said...

صباح الخير يا صوت فايروز الي هوانت
بصي الفكرة لذيذة و احنا معاكي
بس مش شايفة ان اسم على الله ولادي اكتر منة بناتي؟؟
على العموم ادينا مستنيين اول حلقة من المسلسل

الصورة جمييييلة
كيوووت كيوووت يعني

تحياتي

Ana keda said...

بصى يا ستى والله مش مطنشة ولا حاجة بس الفترة الاخيرة مبقتش ادخل زى الاول

ثانيا بقى بصى الشخصية شكلها لذيذ يعنى مرسومة بطريقة تجذب كويس حتى اللبس باين هتبقى من الريف او كده

اما اسمها مش عارفة ده حسب السياق الى انتى ماشية فيه ازاى يعنى على الله انا الى اعرفه على ولد لكن على الله ولا علا الله

مش محددة يعنى

بس لذيذة

جو اوووووون وكملى

لان الفكرة الى بتطلع منك اكيد بتعبر عن الى جحواكى وهتستفدى منها مهما كان

صوت فيروز said...

يا ستي علي الله (علي) حرف جر مش علي عليوه ضرب الزوميرة
و لو دققتي شويه هتعرفي انها بنت متكلة علي ربنا و اسمها غريب عشان يشد
بس لو عندك اسم تاني انا مستنيه اقترحاتك

Diyaa' said...

ممكن الأسم يبقي توكل أهو نفس المعني وقروي وكمان مختلف..بس مش أسم تليفزيوني ومش هيعجب أي منتج

ومعترض علي أسم القرية
يعني بلاش يبقي فيه لفظ الجلالة بس
كنوع من الأحترام وتفادي أي غلط
والأسامي ذات الدك الخفيف كتير

وشكل الشخصية بنت علي فطرتها أوي ويمكن زيادة كمان ..أكيد ينفع تكملي بيها بس أهم حاجة يكون في دماغك مشروع كامل ويكون عندك صبر
حاولي تجيبي رقم دكتورة مني أبو النصر مخرجة كارتون بكار أكيد هتتبسط بفكرتك وتقف جنبك
أو أتمني ذلك يعني
بالتوفيق
سلام

صوت فيروز said...

ايه يا ضيا ما الست مني تعيش انت و ابنها هو اللي ماسك الموضوع ده
بس بجد بجد توكل ده حلو برده لكن انا بفكر في اسم تاني لان الغالب الناس مش عجبها
و شكرا علي تعليقك

حاسوباتيه said...

جميله جدا شكلها عسوله خااااااااالص ياريت تعملي حاجات تانيه ومدونتك جميله

حاسوباتيه said...

جميله وعسوله قويييييييييييي وكل كتاباتك جحميله

Anonymous said...

Hi Fayrooz
Go ahead, I strongly encourage you to develop a new character. we (her in Egypt) need a kind of national character, like yours and bakaar etc...
I have just reached ur blog, I am not an artist but I may give u some criticism and/or ideas.
I will write you later
Miso Soup

صوت فيروز said...

miso
thanx alot for ur support ,and i'm waiting for ur ideas

*سمر* said...

شخصية جميلة جدا..ومعبرة عن مصر..شكلها هتكون بنت شقية ..بس بجد جميلة

اتنمنى انك تكملى الفكرة دى ...وخليكى وراها للأخر.. وربنا معاكى

Diyaa' said...

ممم خفة الدم والشخصية الجميلة راحوا فين ؟ أنا دخلت البلوج مخصوص أدور عليها بس شكلك مشغولة بتصليح العربية
ابقي طمنينا برضه ومكنتش أعرف والله باللي حصل للدكتورة مني
دي أخرة الأنعزال :(
لو في أخبار حلوة معلش لو أنا قصرت في زيارة المدونة ممكن تبقي تعرفيني في مدونتي ؟:) بعمل تشيك ميل كل يومين تقريباً
بالتوفيق يا سكر وفداكي ميتين عربية

محمود الدوح said...

كويس لقيت حد زى بيحب الكرتون

وانا بنصحك تستمرى وتكتبى حلقات لبنت حسب الله وتكون جميلة زى صورتها كدا بالظبط

-------
على الهامش
اول زيارة لمدونتك

بجد جميلة

صوت فيروز said...

شكرا يا محمود و ياريت تكون هنا علي طول انا عندي مشكلة لاني مش عارفة اجيب افكار للشخصية خالص
وقت ما عملت علي الله كانت نفسيتي طفولية جدا لكن دلوقتي لا بصراحة فمعلش اعذروني

Anonymous said...

حلوه بس نتابع اخبارها فين
ودي حتلاقيلها عريس ازاي

mimi said...

يلا شدي حيلك وفكرتني بشخصية بكار
شكلها بنت ذكية وبتعمل كل الحاجات الصح وأقترح انها تكون حلقات بنت صغيرة مثلا تقع في مشكلة وتجرب كذا حل ليها لحد ماتتعلم بنفسها
يعني ممكن نتكلم في التفاصيل
سعيدة بقي