Monday, June 18, 2007

عودة الندل

غلست كتيييييير و رخمت كتيييييييير و بقي البلوج بتاعي نكد, لكن النهارده هنشوف العجب

قرب يا بيك قربي يا هانم فين الولد الولد الولد لاني مش لاقيه ولا ولد و شكلهم راحوا في الحرب او شكل كوتشنتي من غير ولد اصلا

بصراحه شر البليه ايييييييييه ,,,, ,كلنا عرفينه و للناس اللي بتذاكر البلوج بتاعي هتعرف انه جزء تاني

لمأساه في حياتي:(
قوم ايه بقي .....من فترة كده جت لي رسالة بتقولي انت عارفه الممثله بتاعت فيلم النجمة الساطعه , يحس اني شايفك قصادي
طبعا النمرة كانت غريبه و معرفش هي من مين و اتمنيت طبعا انه يكون حد عدل و قلبي ما بيني و ما بينكم فرح وزغرد و انشكحت علي الاخر بس قعدت اقول مين يا بت يا فوزية مين ما انتي قطعتي رجلهم كلهم يا لوزه بغباءك مييييييين
يا لوزه
مين
مين
و هوووب
جت رساله تانيه وراها مكتوب فيها امضاء
الولد الولعه
http://dodyssilver.blogspot.com/2007/04/blog-post.html

يخرب بيتك
انت تاني انت لسه عايش
اتاري السهوكه اللي بتشر من الرسالة دي غريبه
ده ايه ده بعد 10شهور من الحدثه الاولي

ينهار يا نهار ده ايه ده يا ولاد و ايه اللي حدفه عليناااا اليمه دي اخس علي كيديه, و انا اللي قلت معجب ولا حد عدل يا حظك يا لوزة يا حظك
لكن طبعا نظرا لاني من الناس اللي بتبص للدنيا بان الاشياء اتوجدت مش لمجرد الصدفه, و ان رعاية السماء فوق كل شئ قلت مش يمكن يلوزلوز دي رساله من الرب

اه و ليه لأ!

ايه اللي يخلي واحد بعد الفترة دي كلها يشوف ممثله شبهي في التلفزيون و بعدين نفسه تهفه عليا,,طب ما و الله فكرة يمكن الولد بيحاول يرجع الميه لمجاريها, بس هو فعلا رجع بس في كيس و الموضوع فعلا بقي في المجاري

قوووم هوووب تن تن ,,تن تن,,, ايه ؟؟؟رساله تانية بتقول انا عايز اكلمك علي النت لو سمحتي و عايز اتكلم معكي في حجات كتير
الله !!!ده انا في سري,, الولد ده بقي عايز ايه,, ما بيني و ما بين نفسي في دلع كده و دلال
و الله انت سكر يا مضروب فيك الخير برده اهو عبرتي
قلت طب يا فوزه ده انتي زحلقتيه زوحليقه رهيبه مش يمكن راجع عشان ينتقم
ااااه و بدأ الفار و الاسد و الفيل يلعبوا في عبي حكم- لا لا مش عبي واسع- انا كان نفسي ادخل طب بيطري زمان ما علينا
قلت يا لوزة اسالي تعملي ايه في الورطه دي
قالوا لي توكلي علي الله كلميه شوفي هو عايز ايه
مش يمكن خير
قلت ماشي
و ايه المانع يمكن يكون عقل و هدي و بقي راسي
بدا يتكلم عادي و بعدين شويه و رجع يتكلم كاننا اتخنقنا امبارح
و لا جديد يا اخواني
نفس التشنجات العصبيه
ده غير الافكار المهببه لانه كان هيقع في واحده استغفر الله العظيم
فزي ما تقولوا كده حس ان المعقد مفيش احسن منه


ورجع لكلامه التافه انتي صورتك عامله كده ليه ؟؟هو انت اسمريتي كده ليه؟؟, قالوا البياض احلا و لا السمار احلا؟؟انا بموت في البنات البيض؟؟انت ليه مش بتغيري رابطه الايشارب؟؟ ليه مش بتعملي حركات زي باقي البنات في الايشارب؟؟
,و لا جديد يا اخواني

و انا استني انه يقول موضوع واحد عدل ابدا
من ضمن برده هو انت ليه بتكتبي ادعيه دينيه علي الماسنجر
انت دخلتي جماعه و لا ايه,,,اوعي تلبسي عبايه و يبقي شكلك وحش
ده غير انه كان بيدلعني ما بين كل كلمة و التانيه بطريقه فقع
ده انتي شكلك معقده بقي(ده صوت من بعيد)ب

اه

انا معقده و بحب العقد عايز حاجه ياااااض

لكن انا قررت اني افهمه ان مافيش فايده
و هو طبعا بعزة نفس راح قايل لي انا بس حبيت اعرف اخطائي عشان ماقعش فيها تاني
و حبيت اناقش ده معكي



و طبعا هو كان من وقت لاخر بيحاول انه يستظرف قال ايه دمه خفيف و روحه رياضيه
و انا يا حضرات قاعده مستنيه يمكن يتعدل حاله كان برده عندي امل فيه اهو برده ظل راجل
من ضمن الكلام الخفيف بتاعه
اسمعو و اشهدوا



هو : انا زهقان

انا : خلاص اخرج

لا ما لازم انزل مع حد من اصحابي ,

ليه؟

عشان يمسكني لما اتصدم بالبنات في الشارع , انا لسه راجع من السفر و بقالي فترة ما شفتش بنات لبسين جينز و بودي (ببلاهه)ههههههههههه

يعني انت مش لو كنتي قبلتيني ببودي مش كونا اتجوزنا

يااااااااه تخيلي يا فوزيه كلاكيعوا انت ببدي و و بنطلون برموده و خلخال في رجلك(ببلاهه) ههههههههههه و الله ده كان هيبقي شكل فظيع اوي هههه

انا بقرف : ابدا و الله انت اللي خلاك تفكر فيا اني معقده

هو : اه ما انا ماكنتش هتجوزك انا كنت هعلئك (ببلاهه)هههههههههههههههههههههههههههه


و كل ما اشوف ههههههه دي علي المسنجر افتكر هند رستم و هي بتقول (شبه عم شكاليته ههههههههههههه )في فيلم الستات ما يعرفوش يكدبوا لما كانت طالعه بنت الغساله و جابت عيلين تؤم لشاديه
نفس صوت الضحكه كان في دماغي
طب يا ناس ارد عليه انا اقوله ايه
كل ما اقوله نتكلم جد و في مواضيع عامه يقلبها اما خناق علي المشاكل اللي فاتت او كلام علي البنات الحلوه و الوحشه و الطويلة و القصيرة
طبعا في الاخر رحت قايله له انت قليل الادب و مش محترم اصلا و جبت الوش بتاع فوزيه و لو كان قدامي كنت هضربه يعني هضربه
و مش عايزه اقول لكم ماما عملت فيا ايه يا لاهويييييييي مرار
انتي معقده,, انتي مقرفه... انتي غبيه الخ.......... الخ......... الخ
و للعلم هي ال 10 شهور اللي فاتوا كانوا عبارة عن تعديد متواصل عشان خاطر عنيه
و يستمر العويل و النويح علي الفرص اللي بضيعها من باقي افراد العائله
و نراكم في المسرات








9 comments:

اسكندراني في الغربة said...

الزمن مبيغيرش الشخصية -- ممكن يغير طبع
يعني واحد مبيحبش يركب اتوبيس و بعد عشر شهور يغير رأيوا ماشي
بس شخصيتة و تفكيرة و استظرافوا ميتغيروش و لو بعد 100 سنة

Shower-Mirror said...

اوافق على كلام الاخ الاسكندرانى اللى فوق ده و اضيف عليه الحكمه المشهوره

ديل الكلب عمره مايتعدل

امسكى نفسك بعد كده و اوعى ترجعى تكلميه تانى ... عشان المره الجايه هايزيد اكتر

واحشانى يادودو و الله

:)

مع انى زعلان منك ...طبعا انتى عارفه ليه

صوت فيروز said...

اسكندراني

كلامك صح و ده اللي انا قلته لكن سعات بتبص للموضوع ده بانه ممكن مع ناس تبقي قلة خبره ده بالاضافه لانه اتقدملي في البيت و عايز يتقدم تاني
و ده الباب اللي دخلوا لي منه ناس كتير


ميرور
يقطعني
و الله بشوف مدونتك بس مش بلحق اعلق
و ابقي سلم لي علي احمد عز
علي فكره انا قطعت كلامي معه من اول ما حسيت انه ما اتغيرش
ما خدش وقت اصلا معايا
ههههههههههههههههههههههه

LOJAIN said...

والله انتى فقرية فقر
يخرب عقلك
يام بودى انتى
بوودى الفايد
هههههههههههههههههه

عملتيله بلوك و ديليت ولا لسة يا مصيبة
ولا مستنيه لما تلاقيه طالعلك على الشجرة زى اللمبى
بس اللمبى كان فى ايده ورد
ده ممكن يطلع وفى ايده سجاير ملفوفة

بس تصدقى انتى ضحتينى مووووووووت و انا اصلا مكنتش ناقصة خالص و متنكدة
و نتيجة الترم الاولانى نكدت علىاللى خلفونى

بس انتى مكنتيش تعرفى ان ديل الكلب عمره ما يتعدل ولا ايه
العالم دى عنيها بره الجمجة يا قلب امك و ليها رجلين و بتسرح لوحدها
جته خيبه فيه و فى البرمودة بتاعه ابو
شخاليل السيدة ده

بقولك ايه
انا عايزة اكلمك
ابعتيلى على الميل اللى فى المدونة لو معندكيش مانع يا دودو

Regards:
Lojain :)

صوت فيروز said...

اااااه يا لوجي يا اختي شفتي اللي بيحصلي, حاجه بصراحه تجيب هبل و كأن ما فيش في الدنيا رجل عدل
ربنا يولع فيهم كلهم
و ما تزعليش يا قطتي علي النتيجه, اللي جاي احسن ان شاء الله

only spot said...

صحيح شر البريه ما يضحك وصاحبنا الى زيه كده كتير عمره ما هيتغير الا لو حب بجد لو كان حبك بجد كان حبك بعقدك ده لو كنتى معقده فعلا لكن انت صح وصدقينى زى ما فيه معاويج كتير فيه برده ناس كتير كويسين
تحياتى

صاحب البوابــة said...

أضحكتيني للغاية

سعدت كثيراً بإكتشاف مدونتك وقراءة مواضيعك

خاصة مع هذا الذي يفكر دائماً

انه سيخطب إليسا او هيفاء

:)

تحياتي اختاة ولا تتنازلى ابداً عن مبادئك

S H A H said...

اسلوبك سكر قوي
:)
==================
و خير ما فعلتي بجد, ده شكله تافه و عايز واحدة تافهة زيه
بيصعب عليا قوي الشباب اللي زي دي بجد

و احسن حاجة هيا اللي عملتيها
اعمليلو بلوك خالص بقى

اخبار القط ايه:)

Diyaa' said...

الكائن ده مش ممكن أبداً
كويس إني قريت الجزء الأول وبالتالي مرارتي كانت مهيأة للفقعة
بس تعرفي ..رغم إني معرفكيش ..لو في جزء تالت للشخص ده أنا هضربكم بالنار وأريحكم ..أنتي عشان غاوية
_ بطيبة متناهية _
إنك تعذبي نفسك مع السخص ده وهو عشان مش هينفع يتعمل معاه format ولا حتي يتعمل معاه عجين الفلاحة

بس برضه عايز أضحك كتير
لول

عايز أروح أشوفي حوارك عند برايد ده بعد إذنك بقي هبص بصة سريعة كده شكلها قصة مشوقة :))

سلام