قطوف في فروة الخاروف لبنت رشد اباظة 2

حكومتنا يا حبيبتنا

قررت الحكومه الحفاظ علي شعبها من اي محاولة للانتحار او الإضرار بالصحة فقامت حكومتنا المصونه اسم النبي حارسها و صاينها بعمل ارتفاع أسعار الجاز و قالت ( يا كلاب -اللي هو الشعب- احنا غلينا الجاز عشان محدش يشربوا و لا يولع في نفسه،،،،و حتي السجاير مضرة للصحة يا حمرة يا كلبييين ،،،و الادوية غالية من زمان لان الدواء فيه سم قاتل )و طبعا احنا بدورنا اتاخد مننا الادوية و سابوا لنا القاتل في أرابيزنا

غاندي بيعادي

فجاة قرر واحد يشبة المرحوم غاندي انه يعدي في اوسع نقطة في شارع صلاح سالم ،،،قرر غاندي المصون انه ينزل رجلة و يرفع ايده و يعدي و اللي ما يعدهوش يقوله ملعون ابوك ابن ،،،،، ما علينا ربنا يلطف بعابيده

أتحسبن انا و لا تتحسبن انت

دي كانت كلمة واحده ست بتحط بنزين للرجل اللي في المحاطه بيشتغل ،،،الرجل بصلها بمنتهي الاسي و كأن ابوه هو السبب في الغلاء ده ،،،بعد كده حطيت انا بنزين و جيت كالعادة اديلة بقشيش بصلي و قال مش كفاية هما هنبقي احنا كمان ،،،و كلمة هما دي كان دولة تانيه مش ناس من مصر،،او عيل صغير بيحكي لامه عن البعبع و مش لاقي اسم فبيقول هما،،بصيتله و قلت له هي جات عليك يا عم خد البقشيش ما تتكسفش

قطوف في فروة الخاروف لبنت رشد اباظة

كارينا معرينا

يحكي ان في شيطان اخترع حاجه اسمها بودي كارينا المهم البودي ده هو عباره عن فكرة بدلة الغطس حاجه كده تحس انها كاوتش بتلبسها عشان تلزق علي جسمك و بدال ما دراعات البنات تبان بتحط الهباب ده قال يعني مغطي دراعاتهم,,,,,لعنه اتحطت علي دماغ المصريين و طبعا لان دراع الست المصريه مشهور بمركزه و واخد وضعه بين الدراعات ,,,تلاقي احجام غريبه محشورة في الهباب ده و تكاد تكون دراعاتهم باينه و لو باينه بصراحه يكون احسن ,,,,توب علينا يا رب من القرف ده بقي

الشكوي لغير الله،،،،مذلة

كنت في الميكروباص و بعدين قعدت جنبي واحده ست محترمه سالتها الساعه كام ردت عليا تمانيه الاعشرة و من هنا بدات الست دي تحكيلي علي اد ايه الرجل المدير مكفرهم في المواعيد و الاغرب من ده بيسيب ناس و بيقفش علي ناس تانيه,,,و فضلت تتكلم معايا و انا بصالها مش بنطق تقريبا زي ما تكون الست كانت مستنيه تتكلم مع حد,,,و واضح جدا ان عندها كبت رهيب ,,,كونها تمشي تشكي حالها للناس اللي في الميكروباص ده مصيبه ,,,الست عليها ضغط رهيب و كمان محدش بيسمع لها ,,,دي كانت صورة بسيطة اوي لست عاديه جدا عندها بيت و اولاد و شغل و ميكروباص تتاخر فيه

نظرية الديل

مشكلة كونك من غير ديل ,,يعني دي مشكلة كبيرة ,,لازم تكون بديل عشان تعرف تعيش حتي لو كنت بنص ديل برده شغال ,,,او ديل تحت الانشاء لسه صغنن بينبت ,,,فخير و بركة بكره يكبر و يفرع

ليه بقي بنقول كده ,,السبب ان حياتنا الذيذه دي فيها نوعين من البشر كلاب و سباع,,,و الكلاب بقوا هما كمان بينهشوا فينا و بيحاولوا يفرضوا سيطرتهم علينا و دي طبقة السواقين اللي شيفنهم في الشوارع و البلطجية و العيال الشمامه اما السباع فهم بقي اللهم احفظنا مش هنتكلم عليهم,,,بس ممكن اعرف لامتي حالة الفرم اللي احنا فيها دي؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

البقية تاتي

مشاعيري و راحت خلاص 2(اين انا منه)ا

عندما اشعر انه يتمتع بطعم الكلام علي شفتي ,,فياكل ما تقدمه افكاري علي مائدة عقله الذهبي,,,, يشعر بان ادم قد اورثه ما جعله يختلف عن حواء,,,يتمتع برحيق نظراتي و انا مستمعه اليه ,,,يشعر بارتعاش مشاعري و سذاجة افكاري ,,,فيستهين بها في عقلة تاركني مغمورة في حل الغازه ,,, ادور و ادور في طوق حلزوني
اين انا منه

يا سلااااااااااااام قولي يا ست كمان و اشجينا ,,,,

بس عشمكم هيطلع علي مافيش لان مشاعيري كانوا البوست ده و اللي قبليه و بس كده و رجعت تاني زي ما انا

:)

مشاعيري و راحت خلاص

كنت هعمل مدونه تانيه لان كان في موضوع كده كنت اتمني ان ربنا يوفقني فيه طبعا انتم عارفين موضوع ايه,,هي هي

خلاص بقي بنجزيف,,عموما الموضوع بخ كالعادة

و ده حبت كلام كده حسيت بيهم وقتها قلت مش مشكله اني اكتبهم و اهو عشان الناس تعرف برده اني بعرف اتسهوك

اقروا يالا

لايزال عطرك في هوائي ,,,اهو حب وجودك ام اهوائي,,,هل تجذبني حقا ام هو طعم الاحتياج

,,لوجودك حتي و ان كان منك عطرا في فرائي
اخذت معطفي من بين يديك فوجدت عطرك به زاخر,,,,, فسالتك هل هو فعلا اسكادا فضحكت كانك تعلم ما انت بي فاعل
تري اتكون انت حبي الحقيقي
ام اني علي وشك الاعجاب بزجاجة

وعجبي

ملحوظة

انا ملاحظة ان اغلب المدونات البنات مواضيعهم بتروح بخ تفتكروا ده ليه معني معين؟؟؟؟؟

محفل علي اكوام الزبالة

كعادتي كل يوم انزل متأخرة عن موعدي ألملم نفسي ادخل سيارتي دون ادني اهتمام بما حولي سوي مفتاح الكونتكنت ابحث عن شريط محمد جبريل لاسمعه و اخرج باقي الشرايط , الطريق طويل يصل للساعتين تقريبا يمكن سماع وصلتين لام كلثوم دون ملل و اهو ساعه لربك و ساعه لقلبك,,,ء

لست مهتمه بما يدور حولي مجرد نظرات سريعه من خلف نظارتي الشمسيه مع النظر في مرأه العربيه لمعرفه الي اي مدي وصل القشف عندي, و هل تمت تغطيته بمعجون الكريمات و خلطة الاسمنت و الصبه اليوميه التي اضعها علي وجهي في محاوله جاده لتغطيه اثار العدوان الثلاثي و الرباعي و الخماسي اثر التعب و الملل و البحلقه عدد اتناشر ساعه كل يوم في الكمبيوتر حاله مذرية وصلت اليها من كثرة التفكير و المجهود و مع بعض الالوان الخفيف (قال يعني طبيعي )لاني ذاهبه اللي العمل مش لملهي ليلي زي ما بشوف ناس عاملين

,,,

برد الشتاء بدأ في عمل تسويس خطير في جهازي الهيكلي و ان كان معروف عند اهل الطب بانه ينقسم اللي هيكل عظمي محوري و هو العمود الفقري و الجمجمه و القفص الصدري,,,و طرفي و يمثل الطرفين السفلي و العلوي

و بالنظر لتلك التقسيمه نجد ان العمود الفقري مصاب بانعواج ولا أنعواج ايد السيد هوك او الاقرب للذهن احدب نوتردام

اما الجمجمه فهي صيف شتا من كتر التفكير تقريبا اتشققت

بالنسبه للقفص الصدري فده طابق عليا علي طول

لكن لا نكذب القول أني اتحايل علي هذا الموقف بعمل غسيل وش يومي في محاولة مني لعدم اظهار النكد و قرف السنين و الايام

ورغم ده كله و يبان من بره هالله هالله و من جوه يعلم الله ,,,يعلم الله اني حزينه و مخنوقه و ان ريحه البرفان اللي الواحد بيحطها بيحطها عشان يغطي علي حالة موعان النفس الموجوده يكفي منظر الزبالة و لا اعلم اصحاب الفيلا التي امامنا مستحملين ازاي المنظر ده

ورغم كل هذا اذا بها فتاة لم تتجاوز من الارض سوي نصف المتر و من عمر السنين سوي الثمانيه اعوام

بين كوم الزبالة التي صنعتها الحكومه في شوارعنا المصريه حيث جعلت علي اول كل شارع مقلب زبالة جميل بدل من ان تتزين شوارعنا بالحدائق (رحمتك يا رب)ثم ياتي الزبالين لكي يزيدوا الطينه باله مخرجين ما في السلال لعمل فرز يومي للكرتون و البلاستك و القرف ده تاركين صناديق الزبالة ما بداخلها خارجها و ما فوقها تحتها

اما هي فتقف وسط كل هذا و كانها ملكة متوجه تجلس في حديقة قلعتها بين الزهور ترقص بحركات متمكنه و كانها تستعرض فيدو كليب من الدرجة الاولي ممتاز للمخرج ابي طارق المعاري و الذي بدوره يقوم بتعرية كل من اتي تحت يديه في فيدو كليب

الاعجب انها لاتشعر باي مشاكل منغمره في رقصتها و كانها ترقص في معبد الاله امون مقدمه له القرابين

تحرك يدها ببراعه تغزل من الموسيقي التي لا نسمع منها شئ سوي في عقلها اثواب حريريه منفصلة تماما عن أثواب الشوك التي غزلتها الحياة بطبعها,,,,, واضعه تلك في الفتاة في كوم الزبالة

تركت كل شئ في يدي و نظرت لها ناسيه الزمان و المكان ذهبت معها اللي عالمها في انتظار الحركة التي تالي ما تفعله متشوقه لمعرفه سر هذا الرقص العنيف الساعه السابعه و النصف صباحا دون موسيقي او الحان او جمهور و تحتها كومة الزبالة و فوقها سحابة الشتاء القارص

بدا عقلي يفكر هل هي سعيده حقا !ام انها تصنع السعاده مثل صبه الاسمنت التي اقوم بها صبحا ؟؟؟ هل هي غافله عن ما يدور حولها ام انها مدركة تمام الادراك و متعايشه مع ما هي فيه؟؟؟

لا اعلم

اكثر من ذلك تشويقا ما الذي يجعل فتاة في هذا السن ترقص بكل هذا الاحتراف؟؟؟؟ و كانها كانت في فرقة رضا للفنون الشعبيه

هل هي جينات موروثه للرقص الشرقي ,,,ام ان ثقافة الفيديو كليب و الوصلات ام تلاتين جنيه هي من وراء الاحداث

لا اعلم

ربما انه شئ عادي و لكن براعتها في تأدية حركتها اللولبيه هو ما استفذني

ولكني لم اري من قبل محفل علي اكوام الزبالة مثل تلك

ساعدوني يا اخواني ربنا ما يوقعكم في مشكلة بلوجيه

بصوا يا جدعان ,,,الاخت صوت فيروز اللي هو انا ,,, بتموت في الكرتوون و في شخصيه كرتونيه انا الفتها و صممتها و عايزه اكتب حلقات عنها,,,لكن القرار صعب و مش عارفه اخده و لا لأ سعدوني يا ولاد البلوجات الحلال امشي في الموضوع ده و لا لأ

اسم الشخصيه :علي الله بنت حسب الله

السن :بتاع عشرسنين كده

البلد: مصر حته مش معروفه قرية كوم يجبر الله

ودي صورة الشخصيه

مش حلوه و النبي ,,,عموما انا اللي راسمه الشخصيه و انا الوحيده اللي ليا الحقوق الشرعيه في نشر و تاليف و تفنين هذه الشخصيه و اللي يسرقها هطلع عينه و البسه قضيه و هفجره انتم احرار

ردوا عليا و النبي

طعم الحجات

بص يا سيدي عمرك حسيت بان لكل حاجه طعم ,,,اممممممم طعم ,طعم بجد يعني تحسه كانك بتشربه بتبلعه

انا بقي بحس اوي بطعم الحجات دي ,,,يعني يا سيدي لما تحس بطعم النوم!!!!! امممممممم طعم النوم علي شفيفك يعني بعد ما تصحي الصبح و تغسل وشك و تصالي و تلبس و تروح الشغل و تركن عربيتك و تدخل و تقول السلام عليكم بالعافيه فحد يرد عليك و بعد كده يجرك للكلام

تروح انت بالع ريقك بالعافيه و مبلل شفيفك اللي لو اتكلمت بيهم ممكن يتشققوا او يقعوا ورادد عليه بالعافيه برده سعتها بتحس بطعم النوم علي شفايفك رغم عملية غسل السنان و المضمضه و الوضوء بس انت من جواك دايق طعم النوم حسه مش قادر تصحا ابدا

طعم الاحباط

اممممممممممم ده بقي طعمه مر و رخم رخاااااااامه استغفر الله حاجه تقرف انا سعات بسميه طعم الاجهاض مش الاحباط كنت امبارح في اجتماع و بعدين يا سيدي الشركة بتتباع ,اوم ايه بقي ,الناس اللي بيشتروا شركتنا كل واحد فيهم و لا مؤخذه يعني تحس انه ماسك في ايده خزوق و مخبيه ورا ظهره لاتعرف ايه نوع و شكل و حجم الخزوق!!!! ,,انت طبعا بتبقي عارف انه خزوق هتخده هتخده بس اللي بيقلق نوع الخزوق يعني خزوق بسن فتقدر تقول انه هيدخل واحده واحده ,,,و لا خزوق من غير سن هتلبسه شحط كده مع اني معايا الخزوق بتاعي استخدام شخصي بس نقول ايه بقي مش عارفه بصراحه

المهم نرجع لموضوع طعم الحجات,,,,كنت انا بقول ايه بقول ايه

,,,,ااااااه افتكرت ,,,طعم الاحباط او الاجهاض الاحباط و الاجهاض واحد هو نفس فرحة الام و احساسها بطعم الامومه و ان في حاجه جواها بتتنفس فتحلو الدنيا معها و بعد كده تحس بان الناس اصحاب الخوازيق الثلاثه دبوا ايدهم في احشائها و اخدوا حلمها منها من جواها من بين ضلوعها نزعوه وقتها برده بيبقي ريقك ناشف و طعم المراره في بؤك و لا اجدعها حته لبان دكر مر (ملحوظه انا دقت البان الدكر ده عشان لاقيته عند جدتي بتغليه للكحه و اهي معلومه يمكن تفيدكم)ء

طعم احساسك بانك بتحب من غير ما يكون في حد

ااااااااه هو احساس عامل بالظبط زي الزنجبيل او الحرنكش مش عارفه تعرفوه و لا لأ بس هو في اوله بتحس بحاجه مايعه كده لان حبك مش موجه لحد و بعدين تلاقي طعم لاسعه كده لذيذه لانك بتدوق و لو في خيالك معني الحب في اغنيه, في فيلم, في كلمه حلوه ممكن يكون حد بيقولها لحد تاني (بلوبيف ,,,بلوبيف) في اي بلا ازرق

و بتتمني انك تحس بالطعم ده بس يكون حقيقي مش حرنكش و لا زنجبيل

حسين بطعم كلامي و لا كلامي مباقش له طعم

في الشتي

طبعا في واحد هيقراها فشتي اللي جنب كلوتي هقوله لا طبعا يا اخ في الشتي زي ما الست فيروز كانت بتقولها ما علينا

انا في الشتا ,,,

, بحس ان في حاجه منه فيا و فيه حاجه مني فيه زي ما نكون قريبيين اوي من بعض حسين ببعض( لا يا ماما لا مش بحكي عن واحد معجب انا بحكي عن الشتا) الشتا في مصر رغم غلاسه الصيف و رخامته , الا ان الشتا في مصر له معني تاني,,,,, حد فيكم حس بجمال انه يمشي في شوارع الكوربه و يجري و هو بيعدي الشارع و الهوا الساقع يلمس خده و تمسك الجاكيت بتاعك و تكرمش نفسك جوا البالطوا الطاويل و الشوارع فاضيه و المحلات منورة, و سكان مصر الجديده القدام ناس عواجييييييز ماشيين حواليك في ايدهم عيش فينو سخن مولع بيطلع بخار ابيض,

حد فيكم حس ايه معني انك تشوف انفاس الناس تحس بانه حر الصيف و صهده بيخرج منهم

حد فيكم شاف اول حد كان حبه و قال انه بيحبه,,, قدامك ,,,هناك ,,,علي الرصيف التاني تحت الشتا و عشان انت جرحته سابك مسالمش عليك

و سعتها حسيت ان برد الشتا ما بردش نار خدودك من الاحراج و الكسفه

و انك كل ما تيجي تعدي نفس الرصيف تفتكره , و يبقي نفسك تقوله يا ريتك كنت تنفع ليا , يا ريتك كنت مناسب و كنت ممكن اوافق علي الحب ده

برد الوحده و نار الحيرة مره واحده في اقال من دقيقه, احساس بانك بتعيد حساب اتقفل من زماااااااان اوي

لما تشوف اللي كان بيحبك ده لسا وحيد و انت كمان,,,,, محدش بيعدي بيكم الشارع و جنبك اتنين تانين ماسكين ايد بعض و بيجروا من البرد و هما بيضحكوا

و انت واقف في لحظة صمت راهيبه نفسك الارض تنشق و تبلعك

و حاسس بان الموقف ده كدر عليك صفو استمتاعك بالبرد

بحب البرد و بحب الشتا اوي و نفسي انسا اني شفتك اليوم ده

يالا و خلاص

يا بنتي اوعييييييييييي ألعابي بعيد , يا حبيبتي سيبيني اكتب البوست , يا ماما الناس جت عشان تشوف هقول ايه

يادي النيله علي الغلاسه , العيال الصغيره دي تبته

اهلا

يا حببتي العابي بعيد, يالا يالا اجري

اهلا بكم

استغفر الله سيبي الماوس

اهلا بكم

معلش يا جماعه الاطفال احباب الله

؟؟؟؟؟؟؟؟؟؟؟؟؟؟؟؟؟؟؟؟؟؟؟؟

احممممممممم و ليه الاحراج ده

لا حضرتك دي مش بنتي انا لسه حتي ما اتخطبتش دي بنت عمي عندها 3 سنين

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

اه و الله حتي انا ذاكرة بعض المواقف اللي حصلت لي

؟؟؟؟؟؟؟؟؟؟؟؟؟؟؟؟؟؟؟؟؟؟؟

نعم ,,,,,مش سمعاك كويس

؟؟؟؟؟؟؟؟؟؟؟؟؟

اه الحمد لله انا نجاحت اخيرا في الامتحنات

........................
الله يبارك فيك

انا و الله جيت مخصوص النهارده عشان اسلم علي الناس , بصراحه بقالي فترة مش بكتب , قلت يعني اسلم عليكم

.......................

ربنا يكرمك ده من ذوقك

؟؟؟؟؟؟؟؟؟؟؟؟؟؟؟؟؟؟؟؟

و اجيب الافكار الجديده منين بس عشان اكتبها

بصراحه مره واحده كده بقيت فاترة

؟؟؟؟؟؟؟؟؟؟؟؟؟؟؟؟

لا في كل يوم جديد انا عيني مش بتبطل تبص علي الناس و تحلل تصرفاتهم بس زي ما تقول كده الجديد ما يتكتبش , في حاجه كده ساكعه مالهاش طعم زي ما يكونوا بيرشوا بودرة بواخه في الجو

؟؟؟؟؟؟؟؟؟؟؟؟؟؟؟

لا يا عم انا مش بتكلم في السياسه و انا مالي اللي يحصل يحصل

...............

هيبيعوها,بعوها خلاص يا مشمش, اللي ناقص بس يبيعوا قناة السويس,سعتها و رحمة كل اللي ماتوا فيها و ماتوا عشنها لأخرج و اصوت و ألطم زي اللي مات جوزها في ابعد نجع فيكي يا مصر ,و البس عقد حزون و الرجالة ينزلوا القناة من غير ,,,,, انت عارف ايه, يعوموا فيها

................

شكلي بس اني مفقوعه , لا انا فعلا مفقوعه و حاسه بالم و غيظ بس ساكته , و هفضل ساكته, و هفضل فيها مش هسبها , مش هسافر و امشي مش هخرج منها, هدفن فيها , هغوص في طينها , و اشم زبالتها

؟؟؟؟؟؟؟؟؟؟؟

بتضحك ,,, انت بتقول فيها, اه ادمنت زبالتها و لو عاليا اشلها علي اكتافي و امشي بيها ,بقولك مش هخرج منها قاعده فيها, هشتغل فيها ان شالله كناس , بس هزرع فيها خير, مش هكسر الاشارة , مش هرمي زباله, مش هكون معفنه و بتاعة رشاوي , مش ههد فيها, أبني,أبني زي ما البورسعيديه بنوها تاني, هبني زي ما وقعت كتير و قامت , هخلف عيال, اعلمهم الايمان و الصبر و الاخلاق

؟؟؟؟؟؟؟؟؟؟؟؟؟؟؟؟

لا انا مش بورسعيديه , بس لاقيت ان الناس فيها عايشين بنضافه بلد نضيفه , رغم الضربه اللي حصلت لهم و شغلهم اضرب بس لسه برده فيها, عجبتني الفكرة مش اكتر

.........................

انا لا خالص , انا ماليش دعوة بالسياسه و عمري ما مشيت في مظاهرة بس الحكايه ان كل شئ له حدود و حدودي بصراحه قناة السويس بعدها مافيش شتيمه كله ضرب ههههههههههههههههههه

.........................

اه لسه زي ما انا بتاريق ده طبع مصري اصيل

عموما يالا و خلاص ;)

الناس بتسأل دودو فين؟؟

كنتي فين يا هانم؟؟

كنت بأمتحن

و عملتي ايه يا ناصحه؟؟

ابدا نظرا لاني اخدت اسبوع اجازة قبل الامتحانات,و ده الاسبوع اللي ذكرت فيه 8 مواد من النوع التقيل

عكيت طبعا و الفت تاليف في حياتي معملتهوش

يادي المصيبه يعني هتعدي و لا لأ؟؟

انا سيباها علي ربنا

حاسه اني كنت بعمل حاجه كويسه لايمكن ربنا مش هيقف معايا

طب و احوالك ايه دلوقتي؟؟

طبعا الخمستاشر يوم الاجازة طلعوا علي عيني

و مسحوله في الشغل

و الله انت قطعتي قلبي يا دودو ربنا معكي

يارب ياختي يا رب

رمضان كريم

ابو سرة و لغتنا الجميلة

بالرغم من عدم اجادتي و عدم امتلاكي لمفاتيح اللغه , الا اني من متذوقي اللغة و محبيها, و كم اتمني ان تكون بحوزتي جميع ادوات اللغة العربية

و من مميزات اللغة انها تتجسد امامك تراها و تراك, تعبر عنا و نعبر بها, و اري من وجة نظري ان اللغه العربيه تطورت تتطور الانسان

و اذا نظرنا للغة العربيه نجد انها اخذت في التطور و التحور و التشكل و التفشكل حيث نتحدث الان بالغة مفشكله, تجيد التعبير عن التأنتخ و الترنخ و التحور و التكور, و الاقوي من ذلك هو ان تجد كلمة تتجسد امامك و كأن لها عينان و لسان و مناخير و سرة

(ايه سرة,,,,,انتي بتقولي سرة)

نعم سرة

و الكلمه التي تجسدت امامي و وضعتني في حيرة من امري هل اكتب البوست ده هنا و لا اكتبه في جازز علي ضروسي لاني وقتها كنت بجز علي ضروسي و لكن استقر الامر علي البلوج ده

نرجع لمرجعنا

ما هي تلك الكلمة التي لها سرة

هي كلمة

الاباحه

و الاباحة في اللغة اصلها من باح , فباح اي سمح و صهين و كبر و نفض للشئ

و باح يبوح اي باح بالسر و اسم الفاعل منها ابوح

و أبوح يا أبوح كلب العرب مدبوح ,,يا مين ياداويني بالمعلقه الصيني

و خليك بحبوح و ما تبقاش ابوح

و من أباح بالسر اي افصح عنه

و نجد هنا كلمة سر لها من الحروف ما لكلمة سّربتشديد الراء اي احكم الشئ و اطبق عليه فسر الشئ و جعل منه سٌرة مثل سُرة من الدراهم والجمع منها سٌرر

و نظرا لان السرر بقت بتبان في شوارعنا ولبس البنات بيبوح بها, عمل ذلك عل التأثير في بورصه البرتقال ابو سرة

لان الناس بقي عندها اكتفاء سُراري فظيع و من هنا زاد الاقبال علي البرتقال البلدي و ترك البرتقال ابو سرة لعدم مقدرته علي اداء مهامه مثل السُرر اللي في الشوارع كذلك تجد ما لكلمة سرة من الحروف كلمة سرَا من سرور اي فرح و انبسط( الرجل ما ينبسطش يا زينب) و من هنا نجد انه كلما زادت المساحه المباحه من رؤيه السرر زادت السرور و الفرحه

و لذلك قررت الحكومة ان تدخل السرور علي قلب الجماهير و تترك السرر تمشي في الشارع من غير اي رقيب او نذير

و نجد ان السرة هي مربط الحياة حيث تربط السرة الجنين بالام عن طريق الحبل السري يبقي ازاي نترك هذا الجزء العظيم من جسد الانسان دون اي مراعاه لاظهاره و جعله مغمور دون ان نبوح بمكانه لذلك كون بحبوح و لا تسر علي السرة و تأسرها في السرة

طب ايه اللي جاب السيرة ديه

كنت في احد المولات اللطيفه الظريفه و اذ بي اجد ما لا اراه غير في التلفاز و هو عدد اتنين يقال عليهم انثي من النوع اللي بيلبس من غير هدوم و احده تسمي الحية الرقطاء و الثانيه تسمي اخت البعبع

او ممكن نقول هيرا الهة الشر عند الاغريق و كرويلا في فيلم 101 كلب اما بالنسبه للكلبين اللي كانوا معهم فنقدر نقول فهما عبارة عن خنزيرين في شكل كلاب و بيستهبلوا

و الله يا جماعة انا زهلت وبهت و ازبهليت من منظر الاتنين اللي كانوا قاعدين قدامي في الكافية اتنين استغفر الله شكلهم يدعوا الي الرذيله

شئ فاجر بان اتنين ستات يمشوا بالمنظر ده في مول و المفروض بصراحه انهم يتمسكوا بقضيه فعل فاحش بالطريق العام من كتر قلة ادب اللبس اللي لبسينه

حسيت وقتها برغبه رهيبه في اني اقوم اقلع اللي في رجلي و اديهم بيه, و لا تتخيلوا من كتر ما منظرهم حقير كل اللي في الكافيه كان بيبص عليهم بقرف

اضاف لذلك اربع شباب جنبهم كلهم كانوا فتحين بؤهم علي الاخر من هول المنظرو حسيت و بدون مبالغة ان الاولاد الاربعه تحولوا و بقوا الذئاب الاربعه او الكلاب الاربعه كل منهم يحمل ديل و ناب يقطر دماً و علي وشك انهم يعووووا و يقولوا لكرويلا و اختها اكلك منين يا بطه و طبعا لوجود الثورين خرجوا ليبحثوا عن شلة بط تانيه و لحد ما خرجوا من الكافيه كانوا لسه فتحين بؤهم حصل لهم تيبس بئوئي رهيب

تري ماذا افعل انا مش عارفه !!!ماكنتش عارفه ايه بجد اللي اعمله., امرقهم بنظرات مهينه و خلاص طب ما هما شيفين الناس كلها بتبص لهم و مع كل بصه تفه علي وشهم

اتف فعلا عليهم طب ما الحيوانات اللي متشكله بشكل اتنين رجاله دول اعمل فيهم ايه

اطلع علي القسم و اعمل فيهم شكوي هيقولولي انتي عبيطه يا بت

اسنغفر الله

مش عارفه بصراحه كنت اعمل ايه كان هاين عاليا اشتم كل رجل كان قاعد في الكافيه و اقوله اللي في وشك ده شنب و لا وساخه

من كتر الفحشاء او الفشحاء مش مهم ما احنا اتقلب كيانا هنيجي عند دي يعني و نبصلها

توب عليا يا رب و ما نخلنيش انفعل كده

جرسوووووووووووووون

اديني و احد برتقال بس يكون من غير سرة

عودة الندل

غلست كتيييييير و رخمت كتيييييييير و بقي البلوج بتاعي نكد, لكن النهارده هنشوف العجب

قرب يا بيك قربي يا هانم فين الولد الولد الولد لاني مش لاقيه ولا ولد و شكلهم راحوا في الحرب او شكل كوتشنتي من غير ولد اصلا

بصراحه شر البليه ايييييييييه ,,,, ,كلنا عرفينه و للناس اللي بتذاكر البلوج بتاعي هتعرف انه جزء تاني

لمأساه في حياتي:(

قوم ايه بقي .....من فترة كده جت لي رسالة بتقولي انت عارفه الممثله بتاعت فيلم النجمة الساطعه , يحس اني شايفك قصادي

طبعا النمرة كانت غريبه و معرفش هي من مين و اتمنيت طبعا انه يكون حد عدل و قلبي ما بيني و ما بينكم فرح وزغرد و انشكحت علي الاخر بس قعدت اقول مين يا بت يا فوزية مين ما انتي قطعتي رجلهم كلهم يا لوزه بغباءك مييييييين

يا لوزه

مين

مين

و هوووب

جت رساله تانيه وراها مكتوب فيها امضاء

الولد الولعه

http://dodyssilver.blogspot.com/2007/04/blog-post.html

يخرب بيتك

انت تاني انت لسه عايش

اتاري السهوكه اللي بتشر من الرسالة دي غريبه

ده ايه ده بعد 10شهور من الحدثه الاولي

ينهار يا نهار ده ايه ده يا ولاد و ايه اللي حدفه عليناااا اليمه دي اخس علي كيديه, و انا اللي قلت معجب ولا حد عدل يا حظك يا لوزة يا حظك

لكن طبعا نظرا لاني من الناس اللي بتبص للدنيا بان الاشياء اتوجدت مش لمجرد الصدفه, و ان رعاية السماء فوق كل شئ قلت مش يمكن يلوزلوز دي رساله من الرب

اه و ليه لأ!

ايه اللي يخلي واحد بعد الفترة دي كلها يشوف ممثله شبهي في التلفزيون و بعدين نفسه تهفه عليا,,طب ما و الله فكرة يمكن الولد بيحاول يرجع الميه لمجاريها, بس هو فعلا رجع بس في كيس و الموضوع فعلا بقي في المجاري

قوووم هوووب تن تن ,,تن تن,,, ايه ؟؟؟رساله تانية بتقول انا عايز اكلمك علي النت لو سمحتي و عايز اتكلم معكي في حجات كتير

الله !!!ده انا في سري,, الولد ده بقي عايز ايه,, ما بيني و ما بين نفسي في دلع كده و دلال

و الله انت سكر يا مضروب فيك الخير برده اهو عبرتي

قلت طب يا فوزه ده انتي زحلقتيه زوحليقه رهيبه مش يمكن راجع عشان ينتقم

ااااه و بدأ الفار و الاسد و الفيل يلعبوا في عبي حكم- لا لا مش عبي واسع- انا كان نفسي ادخل طب بيطري زمان ما علينا

قلت يا لوزة اسالي تعملي ايه في الورطه دي

قالوا لي توكلي علي الله كلميه شوفي هو عايز ايه

مش يمكن خير

قلت ماشي

و ايه المانع يمكن يكون عقل و هدي و بقي راسي

بدا يتكلم عادي و بعدين شويه و رجع يتكلم كاننا اتخنقنا امبارح

و لا جديد يا اخواني

نفس التشنجات العصبيه

ده غير الافكار المهببه لانه كان هيقع في واحده استغفر الله العظيم

فزي ما تقولوا كده حس ان المعقد مفيش احسن منه

ورجع لكلامه التافه انتي صورتك عامله كده ليه ؟؟هو انت اسمريتي كده ليه؟؟, قالوا البياض احلا و لا السمار احلا؟؟انا بموت في البنات البيض؟؟انت ليه مش بتغيري رابطه الايشارب؟؟ ليه مش بتعملي حركات زي باقي البنات في الايشارب؟؟

,و لا جديد يا اخواني

و انا استني انه يقول موضوع واحد عدل ابدا

من ضمن برده هو انت ليه بتكتبي ادعيه دينيه علي الماسنجر

انت دخلتي جماعه و لا ايه,,,اوعي تلبسي عبايه و يبقي شكلك وحش

ده غير انه كان بيدلعني ما بين كل كلمة و التانيه بطريقه فقع

ده انتي شكلك معقده بقي(ده صوت من بعيد)ب

اه

انا معقده و بحب العقد عايز حاجه ياااااض

لكن انا قررت اني افهمه ان مافيش فايده

و هو طبعا بعزة نفس راح قايل لي انا بس حبيت اعرف اخطائي عشان ماقعش فيها تاني

و حبيت اناقش ده معكي

و طبعا هو كان من وقت لاخر بيحاول انه يستظرف قال ايه دمه خفيف و روحه رياضيه

و انا يا حضرات قاعده مستنيه يمكن يتعدل حاله كان برده عندي امل فيه اهو برده ظل راجل

من ضمن الكلام الخفيف بتاعه

اسمعو و اشهدوا

هو : انا زهقان

انا : خلاص اخرج

لا ما لازم انزل مع حد من اصحابي ,

ليه؟

عشان يمسكني لما اتصدم بالبنات في الشارع , انا لسه راجع من السفر و بقالي فترة ما شفتش بنات لبسين جينز و بودي (ببلاهه)ههههههههههه

يعني انت مش لو كنتي قبلتيني ببودي مش كونا اتجوزنا

يااااااااه تخيلي يا فوزيه كلاكيعوا انت ببدي و و بنطلون برموده و خلخال في رجلك(ببلاهه) ههههههههههه و الله ده كان هيبقي شكل فظيع اوي هههه

انا بقرف : ابدا و الله انت اللي خلاك تفكر فيا اني معقده

هو : اه ما انا ماكنتش هتجوزك انا كنت هعلئك (ببلاهه)هههههههههههههههههههههههههههه

و كل ما اشوف ههههههه دي علي المسنجر افتكر هند رستم و هي بتقول (شبه عم شكاليته ههههههههههههه )في فيلم الستات ما يعرفوش يكدبوا لما كانت طالعه بنت الغساله و جابت عيلين تؤم لشاديه

نفس صوت الضحكه كان في دماغي

طب يا ناس ارد عليه انا اقوله ايه

كل ما اقوله نتكلم جد و في مواضيع عامه يقلبها اما خناق علي المشاكل اللي فاتت او كلام علي البنات الحلوه و الوحشه و الطويلة و القصيرة

طبعا في الاخر رحت قايله له انت قليل الادب و مش محترم اصلا و جبت الوش بتاع فوزيه و لو كان قدامي كنت هضربه يعني هضربه

و مش عايزه اقول لكم ماما عملت فيا ايه يا لاهويييييييي مرار

انتي معقده,, انتي مقرفه... انتي غبيه الخ.......... الخ......... الخ

و للعلم هي ال 10 شهور اللي فاتوا كانوا عبارة عن تعديد متواصل عشان خاطر عنيه

و يستمر العويل و النويح علي الفرص اللي بضيعها من باقي افراد العائله

و نراكم في المسرات

رقيه و شمس

تلمع عيناها

تحتد كثيرا لأتفه الاسباب

اعلم ما بها

سوف ترحل

تذهب لبلد ليس بها عبير حبنا

نعم اعلم ذلك يا امي

سوف ترحل رقيه و شمس

الي اميريكا

رقيه بلغت من العمر فوق الخمسين

تخافي ان تذهب بعد ذلك العمر الذي اكتسب لون وجهها بتراب مصر

دون عودة

لا تحزني ارجوكي

سوف نذهب لها

نقضي ليله جميله

لا تخلوا من الضحك الممزوج بالدمع

نخفي جميعا خوفنا من عدم اللقاء بعد الفراق

اما شمس

صغيره

تشعر بالخوف

قالت لي

عارفه يعني ايه تسيبي مكان كل حته فيه ليها معني عندك

شمس صغيره جدا

نظرت لها

انها تجربه جديده

انت صغيرة وسوف تتعلمي من ذلك كثير, اكتسبي الخبرة و اللغه, تعلمي الجديد, اجعلي هناك شغف لمعرفه عوالم اخري غير عالمك الصغير

نظرت لغرفة شمس

كانت تذاكر علي الحائط لغة عربيه و رياضيات و كل المواد الدراسيه

طفلة لاقصي الحدود

جاءت ابنت خالتي

و رحلت قبل ان احضر انا و امي

احتدت امي

و صرخت

لماذا رحلت قبل ان نمضي الليلة معا

كان صوتها يختنق كثيرا و هي تتكلم

لم استطع ترك امي هكذا

قطعت مسافه طويله جدا لاحضار ابنت خالتي

جعلتها مفجأه لشمس

لنقضي معا اخر ليله لرقيه و شمس

كنا خمس نساء

جافي عيونا النوم

جلجلت ضحكاتنا

جلست رقيه ترينا صور من زمان فات

كانت هناك تجلس سيدات اشبه بشادية و عماد حمدي

روت لنا قصص من الماضي

حكت لنا كم كانت مصر جميله

حتي الفجر

دعونا جميعا بان لا نفترق

قالت شمس ضاحكة

هعدي المحيط و شكلنا هنغرق هناك

و السمك ياكلني

طب اقول انا مت ازاي؟؟

اكلني السمك!!

لازلت متيقظه من امس اشعر بتعب شديد

لا اعلم ماذا حدث حتي تلك اللحظه

انهم جميعا في المطار ,اما انا انطلقت لعملي

لازال حضن رقيه و شمس يحتضني

ضمتناني بقوة شديده

لم اجد غير كلمه واحده

استودعكم الله

استودعكم الله

اعلم ان امي سوف تبكي كثيرا

و لكن تلك هي الحياة

شمس ورقيه في قلوبنا

و الفارق ليس بكبير

فقط المحيط

عيوني

كل ما اروح حته الاقي عيوني بتشوف حاجه جديده

عايشه في مهزلة اسمها التفكير المستمر في كل حاجه و لا اي حاجه و فلسفة الامور طول الوقت و ايجاد اسرار الكون في بعض لقطات لحياتي اليومية

سعات بحس بلذة الم ان دماغك توجعك من التفكير

و سعات بيكون الالم اقوي مني

حبت حجات كده هي صغيره بس عيوني جت عليها

فتاة الشيكولاته

ركبت جنب و احده , هي بنت كلبوزة شويه لكن مش معني اني اكون كلبوزه ان ده يكون شكل وشي:(حسيت ان البنت مرسوم علي وشها العلامه دي,قلت مش مشكله

؟ امال فين المشكله

المشكله يا اخواني ان البنت دي كان معها كيس فيه شيكولاته كتير جد

و دي بقي

فتح و كل

فتح و كل

بحاله هستيريه رهيبه

و اختكم قاعده علي لحم بطنها

بس ايه,,,اوعي,,

طلعت انا بقي قدام ده بونبونايه من شنطتي اي نعم هي كانت نعناع و حرقت قلبي بس برده كان ليا دور في مذبحة الحلويات دي

انا مهتمتش و انتبهت اوي

غير لما البنت خلصت كيس الشكولا و بعد كده راحت جايبه من شنطة تحت رجلها 1/2 كيلو لبن رايب

و افتح وعلي بؤها

و برقع

برقع

برقع

طبعا انا كنت بضحك في سري في الاول بس بعد كده بصيت و قلت ليه البنت دي عندها كل اليائس ده

ايه الحاله دي

للدرجة دي هي و غيرها و غيرها تعبانين

كان نفسي اطبطب عليها و اقولها الحل مش

في اكل الشيكولاته

تامر حسني ارجوك كفايه
بحب اغاني تامر حسني
الا اني بحس انه شخصيه
فقع
ايوه
فقع
انا من البنات القلائل اللي مش بيحبوا سهوكة و سخافة تامر حسني
بصراحه دمه بقي تقيل اوي علي قلبي
رغم ان اغانيه تحفه سبحان الله يعني
بس ارحمونا بقي عشان قرفنا

ايمن نور
رغم اني مش سياسيه و لا حتي بستظرف اللي اسمه ايمن نور اصلا
بس عايزه اقول ده كتير
و كان مفروض يفرجوا عنه لظروفه الصيحه
ملحوظه
لا اعتقد ان السيد تامر حسني افضل منه رغم هروبه من التجنيد

لو كنت شحاته

كانوا اتنين صغيرين اوي

و لد و بنت في الشارع و ملفوفين بحاجه كده مطينه

و الست امهم الشحاته هانم مقعداهم جنبها

بصيت اوي و سالت نفسي

لو كان ربنا حكم عليا باني اكون بنت للست دي

كان ايه الوضع سعتها

و قتها قاعدت احمد ربنا كتييييييييييير اوي

الحمد لله

شجرة الفل

جدتي ليها تاثير فيا كبير اوي

مش عايزه اقول اد ايه هي جميله

في طيبتها و رقتها و قلبها اللي زي الفل

حببتي جدتي بتموت في الزرع

و الورد

اشترت شجرة فل صغيره

و حطتها علي باب الشقه

عشان اول ما ادخل اشفها

حسيت و قتها اد ايه رقيقه

و بتعمل اي حاجه و لو بسيطه عشان تفرحني

ربنا يخليكي ليا يا تيته

و يديكي الصحه

كلمتين وبس

عندما تري الاعين الجمال قبح

و عندما تترك الارواح مكانها و تتحكم الماده في الكون

هنا فقط تعلم انه ليس في الدنيا غير الشرور

عااااااااااااا مررت لي تاج

الاول فرحت و بعد كده قلت هكتب ايه

بس هكتب

ربنا يخليكي يا لوجي يا حببتشي

بسم الله

أحب شخص الى قلبك في الدنيا؟

و الله مش حد معين لان اللي في قلبي كتير و وقفت كتير قدام السؤال ده

لقيت نفسي هعيط لاني ماقدرتش اجي علي حد من اللي في قلبي

بس توءم روحي هي جدتي

انسان مستعد تضحي بحياتك _ركز في كلمة حياتك_عشانه؟

ابويا

معرفش ليه اول واحد جه علي بالي

و متاكده انه لو شاف ده هيعيط

إنسان كرهته لدرجة الجنون و تمنيت لو تمسك سكينة و تنقض عليه و تغرزها في
قلبه تقتله و تقف تبص على جثته و تشفي غليل قلبك؟

بصراحه مش للدرجه دي, بس كان في واحده ظلمتني اوي

اتمنيت اني اشوف الظلم ده فيها

بس بنساها مش بفتكرها و لا عمري حولت اني افكر في المشهد الدموي ده

لكن ممكن اقول ان كان في ناس كرهتها و كنت عايزه اعضها

ههههههههه

متقولوش مسعوره بس بجد هو ده كان شعوري

ما هو إسم أجمل كتاب كتبه بشرقرأته و محتفظ به حتى الآن

هو مش اجمل كتاب اوي

بس كنت بسرح فيه كتير

زيارة للجنه و النار لمصطفي محمود

جامد اوي

إسم كتاب_كتبه بشر برضه_إنت متعلق بيه و بتقراه كل فترة؟

رباعيات صلاح جاهين

والليلة الكبيره

رغم انها مش من الربعيات

بس بحبها اوي

بحس ان الموسيقي بتاعتها بتبقي جوه دماغي

برده اوليفر تويست

قرتها كتير

و بكذا نسخه و كذا اسلوب

أهم جهاز منزلي متعلق بيه أوبتستخدمه كتيرشىء تحس بالراحة النفسية عندما تنظر إليه؟

ههههههههههههه

مش هتصدقوا ايه هو

هو مش جهاز بالمعني الدقيق

هو اختراع بعشقه

اسمه دش الحمام

ياااااااااه بموت فيه

لما دماغي تبقي هتولع من التفكير

ممكن احط دماغي تحتيه كده و بس

بحس وقتها اني اتولدت من جديد

و فعلا بحس بالراحه النفسيه معه

تاني حاجه مطحنة الفلفل الاسود

بموت فيها

و انا اللي بطحن الفلفل ديما

احساس الفيبريشن بتاع

اززززززززززززز

يجنن فيه زغزغه كده

ههههههههه

شىء تحس بالراحة النفسية عندما تنظر إليه؟

النخله

بحبها و هي عاليا كده

و بتبص برشاقه علي الناس

بحب الورد البلدي الابيض

بموت فيه و ديما بدور عليه بس نادر ما تلاقيه

بحب الصحرا جدا و تموجات الرمل

انا رحاله قديم علي فكره

وبحب بحر مرسي مطروح

مكان تحس فيه بالحنين إلى شىء لا تدري ما هو و ذكريات جارفة إلى لا شىء؟

المكان اللي قاعدت فيه اسابيع معدوده في الجامعه انا و شلة سنه رابعه

عند الشجره المعوجه

مكان تحس بالراحة عندما تدخله؟

هو السؤال كان مفروض يتغير شويه عشان في ناس هتيجي في دماغه حاجه تانيه

هههههههههه

لكن بصراحه هي بلكونه جدتي

وقت الغروب

قدامها شجرة كبييييييييييرة اوي

بتلاقي كل العصافير بتجري و تستخبي جواها

و بيعملو صوت رهيب

بحبها اوي

اجمل مدينة زرتها داخل مصر؟

اسوان

و سيوه

و ديما كنت بقسمهم كده

اجمل سما فيها نجوم هي اسوان بالليل

اجمل قرص شمس ساعة الغروب هي سيوه

اجمل بحر

مرسي مطروح

شخصية كرتونية تحبها؟

ياااااااه

كلهم

احترت اوي في السؤال ده

بس بحب بطوط جدا و اكتر من ميكي بكتير

بطوط ده تحفه

و فيه مني تقريبا لما يتنرفز

بحب جدا الجميله و الوحش

بحب الجميله طبعا

بحس انها انا

بحب جدا شركه المرعبين المحدوده

و بحب البنت اللي فيها الصغيره

دي بقي اكيد بنتي لانها معفرته

نوع هاتفك المحمول؟

و ليه الاحراج ده بقي

مقدرش اقول مقدرش

سرعة بروسيسور جهازك؟
معرفش نسيت

ذاكرة _هارد_جهازك؟
80جيجا
المساحة التي تشغلها المساحة الاسلامية على جهازك؟
برده معرفش
أهم هدف انت واضعه لحياتك الآن؟

الغريب يا بنتي ان هدفنا واحد

اكمل دراساتي العليا

و لو شفتي جازز علي ضروسي هتعرفي اني في مشكله جامده

و نفسي اجيب عربيه اوي

و احفظ قراءن

مواصفات فتى الاحلام بالنسبة لي؟

بجد انت قلتي افكاري او قربتي منها اوي

بس اللي اعرفه اني عمري ما كنت عايزه سوبر مان

يعني عايزه حد شبهي و في نفس الدرجه في كل حاجه و لو اعلا شويه يكون افضل

بس مش اعلا كتير
صف ما يأتى
****************
شعورك لما بتسمع كلمة مصر؟
بموت فيها و عايزه اموت و ادفن في تربها

سعات بعيط موت عشانها و الله

ههههههههه

لدرجة اني مره اتفرجت علي برنامج العاشرة مساء و قاعدت اعيط علي حالها

بشتغل عشانها حاسه اني لو بقيت حاجه ممكن اساعدها
شعورك لما بتسمع كلام عن اليهود؟
بجز علي ضروسي

و ببقي عايزه اقلع البلغه و ادي بيها كل عربي سمح لهم يعملوا فينا كده
شعورك لما بتشوف ضابط شرطة؟
سعات بيصعب عليا, و سعات بحتقره

و مش هفسر
شعورك لما بتشوف الكناس العجوز في الطريق؟
بقول الحمد لله

و مش برمي ورق في الشارع لدرجة ان شنطتي مزبلة

و يا ويل لو حد من اصحابي يرمي ورق في الشارع

أفكارك تجاه شاب ماشي في الطريق يلبس جلابية بيضاء قصيرة و عمامة و له لحية و بجيبه السواك و في يده المصحف؟

بسال سؤال ياتري ايه اللي في دماغه؟؟

إحساس يراودك في اشارة مرور مغلقة بسبب مسئول كبير؟
بتمني اني ابقي مسئول مكانه

عشان مش هعمل كده في الناس

قوقعة الحزن

تحجرت دموعي بين جفوني

تكونت بداخلي

احسست اني قوقعه للحزن

تكونت دموعي مثل الؤلؤ

تمكنت من نفسي شجوني

لكن ايماني في قلبي

اشعر به

يخرجني مما انا فيه

لكن تهتز بداخلي تلك الدموع

تريد التحرر

اشعر بتعرج باب قلبي

مثل باب المحار

بداخالي شئ مفقود

شئ غير عادي

صرخه

فرحه

الم

عقل وجنون

حب وكره

http://droosy.blogspot.com/

انا هناك

دودو و بيل

What Famous Leader Are You?
personality tests by similarminds.com

كر كر كر كر

ده انا

اه انا

'طلع شبهيBill clinton

خرج من مدرستي السياسيه