لخبط لخابيط

ازيكم يا جماعه و احوالكم كده و اخبركم طيب كده

بصراحه انا الامل رجع ليا من جديد لما لقيت في ناس جت و عبرتني الحمد لله كنت خايفه (احم احم) اموت قبل ما حد يشوف انا كنت بكتب ايه

ما انكرش اني كنت بكتب لنفسي بصراحه كتير, لكن ده لا يعني ان ما في حد يعبرني, و لا يزورني (زررررروني كل سنه مره حرام تنسوني بالمرة -بطريقة مري منيب)

بس بجد حصل ليا مواقف كتير مش عارفه متلخبطه كده علي بعضها قلت احطها في بوست و احد و أخلص بس يارب ما تزهقوا

عصفوري

زمان كانت ماما بتقولي اني اول ما اتولدت كان بيجي عصفور علي شباك الاوده بتاعتي و يخبط علي الازاز, لحد ما تميت شهر و ما جاش تاني, انا شخصيا قلت في عقلي يمكن دي صدفه بس جت تيته و قالت لي اه انا نفسي شفته و هو بيخبط علي الشباك بتاعك , مش عايزه اقولكم انا كنت حاسه اني مبسوطه اوي بده

اللي فكرني بالقصه دي اللي حصل لي امبارح,,,, لما جيت امبارح الصبح بدري الشغل و حاليا الشغل نايم و قاعدت اشوف الميل بتاعي و اقرا التعليقات اللي مكتوبه علي العريس ابو ركبه و بحضر لكتابة العريس التاني (علي فكرة انا بعته لبرايد و اظاهر انها هتبعنا يا رجاله و هتتجوز العريس اللي جابه انكل ديسكو , او سيدي يا سيدي مشغوله معه بقي ;) او يا حرام بتنزل الستاير و

بتغسلهم

المهم سمعت صوت في قصرية الزرع اللي فوق الدولاب بتاع زميلي اللي هو .... ما علينا

طبعا انا خفت و قلت ده اكيد فار, يا ماميييييييييييييييييييي فارررررررررر ,و بحركه بطيئه جدا حركت راسي اشوف ايه اللي بيلعب ده,,,, ايييييييييييييه ده

يا حرام,,, ده عصفور ( هتقولوا لي عرفتي ازاي انه عصفور مش عصفورة ) حقولكم اكيد ما كشفتش عليه يعني ,يا ناصحيييييييين العصفور بيبقي ليه الوان لكن العصفورة بتبقي الوانها بهته

يا حرام ده محبوس مش عارف يطلع و خايف اوي

فتحت له الازاز لكن هو كان عصفور غشيم شويه دب و يخبط في الدرفه اللي فيها الازاز دب و هاتك يا خبط و يسيب الدارفه المفتوحه

بصيت له كده! و قلت له عليا النعمة انت عصفور حمار ,انا هقعد و اسيبك لما نشوف, لان و اضح ان و جودي كان بيخليه يهبل زياده

فضل يرفرف في المكتب و بعد كده و قف علي التكيف يا حرااااام و بينهج (بصراحه اترزع كام رزعه في الازاز يخلصوا علي حمار مش عصفور) و منقاره الصغير فتحه بينهج موت يا عيييييينيي

انا بقي فضلت قاعده علي الكرسي انا ابصله و هو يبصلي انا ابصله و هو يبصلي و يحرك راسه في حركه دائريه افقيه راسيه غريبه, بتاع ربع ساعه علي كده و فضلت سرحانه فيه اوي

قلت ما بدهاش بقي ده معجب ,,,انت هتتسلبط ياض انت, و تفضل هنا و لا ايه

نعم يا ختي ابصلك بتاع ايه يا عبيطه

هو في حد دلوقتي يبص لبني ادمايه

هو انا اتهبلت عشان ابصلك و انا عندي وظوظه تانيه عماله تجيب اكل و تبني معايا العش

و من غير ايجار جديد و لا قديم و لا قروض و لا حاجه

ديتها كام فرع شجرة,وكان الله بالسر عليم, ولو في عيل ديتها العصفوره هتبيض بيضه و البيضه تعيش مع نفسها , لا دكتور و لا متابعه و لا اااه يا رجلايا وارمه, ولا انا عايزه ارجع (كتكم الاقرف) و لا حاجه من دي خالص

انت عبيطه يا بت

اسيب ده كله و ابص لك انتي, انتي

قلت له اه يا عصفور يا خاين و انا اللي عماله افتح شبابيك المكتب كله لحد ما استهويت و جالي نزله شعبيه

امال انت و اقف بتهبب عندك ايه

قالي بحسبها يا بنت ادم

قلت له نعم يا خويا , بتحسب ايه

قالي بحسب هخرج من هنا ازاي هو انا زيكم ماشيين و خلاص عاملين نفسكم بتحسبوا و بتشتغلوا و انتم متساقين و متخيلين انكم مختارين مش مسيرين ,و باخد نفسي حاكم السحابه السوده هدت حالي ربنا يهد حيل البني ادمين كلهم

انا بصراحه لقيت الدم غلي في عروقي

بقي انا عماله اروح و اجي و انت مش حاسس بالي بعمله عشانك

اخس اخس علي كده

رحت قايمه عليه و قايله له امشي, امشي يا ابن الذين, امك في العشه و لا طارت (دي كلمة سمعتها في الشارع و مش عارفه معناها ايه بس اكيد لموقف زي ده مع اني اشك لان الولد اللي قالها كانت نيته مش سليمه, قالها باسلوب مش لطيف))

راح طاير و قالي و مين هايعد لك فيها ويييييييييييييييييييييييييييي فرافيروووو (ده صوته و هو بيطير)

فضل طاير شويه كده مش محدد هو رايح فين بس كان شكله بينادي علي البت بتاعته عشان يحكي لها علي المجنونه المحرومه اللي كانت فاكره ان العصافير ممكن يحبوا بني ادمين ههههههههههه

طار عصفوري مني,,,,طار عصفوري مني

اجيب منين عصفور تاني,,,,اصل كنت منه و هو حته مني

نقل اسيوط

اصعب حاجه في الدنيا انك تسوق و انت قدامك عربية نقل, خصوصا لو العربيه بتاعتك عباره عن مطب في الشارع و كل اللي بتشوفه و انت فيها عجل الترلات

ما تقدرش تعرف مين اللي سايق

الاهم انك لو بنت, يا سلااااااام

و عربيه فيها حبه من بتوع التجنيد دول و كلهم فاتحيت بؤهم و بيبصولك

خصوصا لو كنت مش و اخد بالك و بتدندن مع شريط كاسيت و لا نجوم اف ام

مش عايزه اقولكم

عض علي الشفايف و هوهوه و اعووووووووووو و ضحك و كلام بكل اللهجات

حاكم عربيات التجنيد دي بتلم من الشرق للغرب

لكن اللي حصل النهارده كان من اسيوط دايركت

عربيه نص نقل محمله شولة بطاطس

و قاعد في العربيه من و را تلت رجاله شنبتهم بس تدل علي فحوله خطيره

و تقريبا عشان ما فيش مكان , مدلدلين رجليهم من بره و حطين اديهم علي خدهم و بصين ليا في قمة الانشكاح

انا طبعا كنت مش عارفه اعمل ايه

الحمد لله كنت لابس نظاره شمس

عشان مايبانش ان و شي في و شهم

من كتر الكسوف فضلت باصه علي نمر العربيه لحد ما حفظتها

نقل اسيوط 265847

و طبعا من كتر ما هما رسمين ضحكه عريضه ,بان التسوس الرهيب و العته اللي ضاربه في سنانهم يععععععع

احلام مفزعه

بحلم كتير اليومين دول و اعصابي بايظه

من كام يوم ماما بتفتح باب الاوده قمت مفزوعه من السرير الف في الاوده كلها و اقولها عنكبوت, عنكبوت كبير

لحد ما دخت و وقعت في الارض هههههههههه زي بالظبط شاديه في فيلم الزوجه 13 لما كانت بتستهبل علي حبيب قلبي رشدي اباظه و تقوله(ماما ماما , سبوني اروح لماما) ف

بقي في حد يستهبل علي رشدي اباظه -استغفر الله

طب ده اللي انا فيه ده عشان ماعنديش رشدي اباظه حتي اللي في جعلتني مجرما

حكم و اللهي او زي ماما ما بتقول-انت بتتبطري يابت يا شادية